ខេត្តរតនគិរី៖ លោកឧត្តមសេនីយ៍ទោ ងួន គឿន ស្នងការនគរបាលខេត្តរតនគិរី បានថ្លែងថា បើសិនជាមន្ត្រីនគរបាលណាម្នាក់ នៃស្នងការដ្ឋាននគរបាលខេត្តធ្វើខុសអំពីតួនាទី និងភារកិច្ច ឬផ្ទុយពីច្បាប់រដ្ឋ និងមិនបានសុំការអនុញ្ញាតិច្បាប់ចាប់ពី១សប្ដាហ៍ទ្បើងទៅ លោកនឹងស្នើរទៅឯកឧត្តម នាយឧត្តមសេនីយ៍ អគ្គស្នងការ
នគរបាលជាតិស្នើសុំគោលការណ៍លប់ឈ្មោះចេញពីក្របខ័ណ្ឌនគរបាលជាតិតែម្ដង ។
ការថ្លែងបែបនេះរបស់លោកឧត្តមសេនីយ៍ទោ ងួន គឿន គឺបានថ្លែងនៅក្នុងពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរស័ក្តិ ដល់មន្ត្រីនគរបាលជាតិ នៃស្នងការដ្ឋាននរគបាលខេត្តរតនគិរី នៅក្នុងសាលមហោស្រព មន្ទីរវប្បធម៌ខេត្ត នាព្រឹកថ្ងៃទី២ ខែឧសភា ឆ្នាំ២០១៨នេះ ។
លោកឧត្តមសេនីយ៍ទោ បានបន្ថែមទៀតថា នៅពេលខាងមុខនេះលោកនឹងចាត់ឲ្យខាងសេនាធិការដ្ឋាន នៃស្នងការដ្ឋាននគរបាលខេត្តចុះទៅ បង្ហាត់ បង្រៀនច្បាប់ ស្ដីពីក្រមសីលធម៌ នៃការបោះឆ្នោត ដល់កងកម្លាំងការពារទីតាំងបោះឆ្នោត ដែលមានគ្រូបង្គោលមកបង្រៀន ដើម្បីឲ្យមានការយល់ដឹងដើម្បីងាយស្រួលក្នុងការអនុវត្តច្បាប់ ។
ទន្ទឹមនឹងនោះដែរលោកឧត្តមសេនីយ៍ទោ ងួន គឿន បានសំណូមពរដល់ការិយាល័យបុគ្គលិក ត្រូវសហការជាមួយការិយាល័យជំនាញ និងអធិការនគរបាល ក្រុង ស្រុក ព្រមទាំងជាមួយនឹងមេបញ្ជាការវីរៈ តាមអង្គភាពនិមួយៗ ត្រូវធ្វើបញ្ជីរាមនាមឈ្មោះមន្ដ្រីរបស់ខ្លួនដែលគ្រប់ឆ្នាំត្រូវតំឡើងឋានន្តរស័ក្តិ ឬហួសឆ្នាំដំឡើងឋានន្តរស័ក្តិ មកផ្ទៀងផ្ទាត់ជាមួយបញ្ជីឈ្មោះរបស់ការិយាល័យបុគ្គលិក ជៀសវាងមានការថ្នាំងថ្នាក់ជាមួយថ្នាក់លើ ។
សូមបញ្ជាក់ថា យោងតាមប្រកាសរបស់អគ្គស្នងការនរគបាលជាតិបានសម្រេចដំឡើងឋានន្តរស័ក្តិថ្នាក់អនុសេនីយ៏ឯកចំនួន៤៨នាក់ ថ្នាក់អនុសេនីយ៏ទោចំនួន៦២នាក់ ថ្នាក់អនុសេនីយ៏ត្រី៥៥នាក់ ថ្នាក់ព្រិន្ទបាលឯកចំនួន២៩នាក់ ថ្នាក់ព្រឹន្ទបាលទោ១៩នាក់ និង ពលបាលឯកចំនួន១នាក់ និង តែងតាំងនាយប៉ុស្តិ៍រដ្ឋបាលចំនួន២រូប នាយរងប៉ុស្តិ៍រដ្ឋបាលចំនួន២រូប នាយផ្នែកចំនួន៣៦រូប ព្រមទាំព្រមទាំងនាយរងផ្នែកចំនួន៤៥រូបផងដែរ ៕ យក្ខឡោម
