តាកែវ ÷ ជនរងគ្រោះដោយរន្ទះបាញ់បានស្លាប់២នាក់ក្នុងថ្ងៃតែមួយពីរកន្លែងផ្សេងគ្នានៅខេត្តតាកែវ។
ភ្លៀងធ្លាក់មួយមេនារសៀលថ្ងៃទី០៨ ខែឧសភា 
ឆ្នាំ២០១៨នេះមានករណីរន្ទះបាញ់សម្លាប់បុរសពីរនាក់ក្នុងទឹកដីខេត្តតាកែវព្រោះតែការធ្វេសប្រហេសនៃជនរងគ្រោះ។ ករណីទី១ កេីតឡេីងនៅវេលាម៉ោង១៥និង០០នាទីរសៀល បានបណ្តាលឲ្យបុរសម្នាក់ឈ្មោះ ជុំ ផែន អាយុ៥៨ឆ្នាំ ស្លាប់នៅកណ្ដាលបឹងវត្តតុំ ស្ថិតនៅភូមិតុំ សង្កាត់រកាក្រៅ ក្រុងដូនកែវខណៈជនរងគ្រោះកំពុងដោះលបកំពឹសក្រោមដំណក់ភ្លៀងរលឹមស្រេចៗ។ ចំណែកករណីទី២ ជនរងគ្រោះបានស្លាប់ដោយរន្ទះបាញ់ដែរ
ខណៈជនរងគ្រោះកំពុងតែយកចបមកកាយបង្ហូរទឹកចេញពីមុខផ្ទះរបស់គាត់។ហេតុការណ៍នេះដែរបានកើតឡើងនៅវេលាម៉ោង១៥និង៣០នាទីរសៀលដែលជនរងគ្រោះមានឈ្មោះ ជុន ខុន ភេទប្រុស អាយុ៤៩ឆ្នាំ រស់
នៅភូមិព្រៃរំពាក់ ឃុំអង្គកែវ ស្រុកទ្រាំង ខេត្តតាកែវ។
បច្ចុប្បន្នសពជនរងគ្រោះដោយរន្ទះបាញ់ទាំងពីរនាក់ខាងលេីនេះត្រូវបានក្រុមគ្រួសាររៀបចំធ្វេីបុណ្យតាមប្រពៃណី៕
គួររំលឹកផងដែរថាកាលពីថ្ងៃអាទិត្យ៧រោចខែពិសាខឆ្នាំចសំរឹទ្ធិស័កព ស២៥៦២ត្រូវនឹងថ្ងៃទី០៦ ខែឧសភាឆ្នាំ២០១៨បុរសម្នាក់ឈ្មោះ បាវ ខុម អាយុ៣៦ឆ្នាំ ជាប្រជាការពារភូមិព្រៃភ្លង បានស្លាប់ដោយសាររន្ទះបាញ់ នៅចំណុចទួលសាំពុត ភូមិព្រៃភ្លង ឃុំសំបួរពេលមានភ្លៀងរលឹម។ សាកសពត្រូវបានយកមកធ្វើបុណ្យតាមប្រពៃណីយ៌នៅលំនៅដ្ឋានគ្រួសារសព៕ 
