មណ្ឌលគិរី: មហាជនជាច្រើន កន្លងមកបានសម្តែងក្តីងឿងឆ្ងល់ អំពីការតាមដានជីវិតរស់នៅរបស់សត្វ ពិសេសសត្វព្រៃដែលរស់នៅក្នុងព្រៃជ្រៅៗ តើគេធ្វើ
បែបណាទើបអាចដឹងទៅ បើមនុស្សយើងមិនអាចទៅកៀកជិតនិងសត្វផងនោះ។អស់ចម្ងល់ហើយនៅពេលនេះ ដោយសារតែអង្គការក្រៅរដ្ឋាភិបាលមួយបានទម្លាយអំពីបច្ចេកទេសមួយចំនួនលើការតាមដាន អំពីការចល័តទីរបស់សត្វ ក្នុងនោះអង្គការខាងលើបានលើកយកនូវប្រភេទសត្វដំរី ជាឧទាហរណ៍ និងបានបង្ហាញជាសាធារណះលើបណ្តាញសង្គមហ្វេសបុកដែលមានគណនីឈ្មោះអង្គការមូលនិធិសកលដើម្បីអភិរក្សធនធានធម្មជាតិហៅកាត់ថាWWF cambodia។ អង្គការខាងលើបានរៀបរាប់ដូចខាងក្រោម៖
តើអ្នកដឹងទេ ថាតើក្រុមការងារស្រាវជ្រាវរបស់យើងសិក្សាបំលាស់ទីរបស់សត្វដំរីក្នុងព្រៃដោយរបៀបណា? ក្រុមការងារស្រាវជ្រាវ បំពាក់ក្រឡៅកសត្វដំរីជាមួយនឹងឧបករណ៍ពិសេសមួយដែលមានប្រព័ន្ធតាមដានទីតាំង (GPS tracker)។
ដើម្បីបង្កើតបានក្រុមការងារមួយដែលមានសមត្ថភាពគ្រប់គ្រាន់ក្នុងការដាក់ក្រឡៅកតាមដានសត្វដំរីនៅក្នុងតំបន់ទេសភាពខ្ពង់រាបភាគខាងកើត (EPL) WWF-កម្ពុជា បានរៀបចំវគ្គបណ្តុះបណ្តាលស្តីអំពី “ការដាក់ក្រឡៅកតាមដានសត្វដំរី“ ដល់ក្រុមការងារចំនួន ១៧ នាក់ ដែលជាអ្នកស្រាវជ្រាវសហគមន៍ ឧទ្យានុរក្ស ប៉ូលីស និងពេទ្យសត្វ មកពីមន្ទីរបរិស្ថានខេត្តមណ្ឌលគិរី មន្ទីរកសិកម្ម រុក្ខាប្រមាញ់ និងនេសាទ រដ្ឋបាលព្រៃឈើ និងនាយកដ្ឋានប៉ូលីសខេត្ត នៅថ្ងៃទី២ ដល់ទី៥ ខែឧសភា ឆ្នាំ២០១៨ ក្នុងខេត្តមណ្ឌលគិរី។
គោលបំណងចម្បងនៃវគ្គបណ្តុះបណ្តាលនេះ គឺគាំទ្រដល់រដ្ឋាភិបាលក្នុងការបង្កើតក្រុមការងារថ្មីមួយ ប្រកបដោយសមត្ថភាព ក្នុងការដាក់ក្រឡៅកតាមដានសត្វដំរី ដើម្បីសិក្សាស្វែងយល់ឱ្យកាន់តែប្រសើរជាងមុន អំពីបំលាស់ទីរបស់សត្វដំរី និងដោះស្រាយជម្លោះរវាងមនុស្ស និងសត្វដំរីដែលអាចកើតមានឡើង។
ក្រុមការងារបានទទួលចំណេះដឹងពេញលេញនៅក្នុងថ្នាក់រៀន និងការអនុវត្តជាក់ស្តែងនៅពេលចុះកម្មសិក្សា។ មុនពេលដាក់ក្រឡៅកតាមដានសត្វដំរី វាជារឿងចាំបាច់ក្នុងការបាញ់ថ្នាំសន្លប់សត្វតាមបច្ចេកទេសត្រឹមត្រូវ។ ដូច្នេះហើយ ក្រុមការងារបានរៀនអំពីកាយវិភាគសាស្ត្រ និងអកប្បកិរិយារបស់សត្វដំរី របៀបប្រើប្រាស់ថ្នាំសន្លប់សត្វ របៀបបាញ់ថ្នាំសន្លប់លើសត្វ ព្រមទាំងយន្តការចាំបាច់នានាក្នុងការដាក់ក្រឡៅកតាមដានសត្វដំរី ក្នុងវគ្គបណ្តុះបណ្តាលចំនួនពីរថ្ងៃដំបូង។ ចំណែកឯពីរថ្ងៃចុងក្រោយនៃវគ្គបណ្តុះបណ្តាល ក្រុមការងារធ្វើដំណើរទៅកាន់ ជ្រលងដំរី (Elephant Valley Project) ដើម្បីធ្វើការអនុវត្តជាក់ស្តែង។ ជាផ្នែកមួយនៃការអនុវត្ត ក្រុមការងារត្រូវហ្វឹកហាត់ឱ្យក្លាយជាអ្នកបាញ់ថ្នាំសន្លប់សត្វដ៏ពូកែជាមុនសិន។ ពួកគាត់បានសាកល្បងការប្រើចំណុះថ្នាំសន្លប់ក្នុងសឺរាំុងបាញ់ថ្នាំ និងហ្វឹកហាត់បាញ់គ្រាប់សឺរាំុង ឱ្យចំដើមចេកដែលជាគោលដៅសាកល្បង ម្តងហើយម្តងទៀត ស្ទើពេញមួយថ្ងៃ រហូតក្រុមការងារស្ទាត់ជំនាញក្នុងការប្រើថ្នាំសន្លប់សត្វបានត្រឹមត្រូវ និងបាញ់ថ្នាំសន្លប់សត្វចំគោលដៅបានល្អ។ បន្ទាប់ពីក្រុមការងារមានភាពជឿជាក់ក្នុងការប្រើថ្នាំសន្លប់សត្វ និងបាញ់ថ្នាំសន្លប់សត្វ ពួកគាត់បានធ្វើការបាញ់ថ្នាំសន្លប់សាកល្បងលើសត្វគោចំនួនពីរក្បាល និងបានអនុវត្តរាល់យន្តការចាំបាច់ក្នុងការដាក់ក្រឡៅកតាមដានសត្វ ក្នុងពេលកំពុងសាកល្បងនេះ។
ក្រុមការងារនឹងបន្តវគ្គបណ្តុះបណ្តាលស្តីអំពីការបាញ់ថ្នាំសន្លប់ និងដាក់ក្រឡៅកតាមដានសត្វដំរីនៅប្រទេសឥណ្ឌាជាមួយក្រុមអ្នកជំនាញអន្តរជាតិ រយៈពេលមួយសប្តាហ៍ទៀត ក្នុងខែឧសភានេះ។ នៅពេលដែលពួកគាត់ត្រឡប់មកវិញ ពួកគាត់អាចចាប់ផ្តើមការងារពិតប្រាកដក្នុងការបាញ់ថ្នាំសន្លប់ និងការដាក់ក្រឡៅកតាមដានសត្វដំរី ក្នុងតំបន់ទេសភាពខ្ពង់រាបភាគខាងកើត (EPL) ក្នុងខេត្តមណ្ឌលគិរី៕ដោយ សាត ចាន់បុត្រ
