គ្រូបង្វឹកក្រុមឡាទីនអឺរ៉ុបព័រទុយហ្គាល់លោក Paulo Bento (ប៉ូឡូបេនតូ) បានអះអាងថា កូនក្រុមរបស់លោក ពិតជាពិបាកក្នុងការឆ្លងផុតវគ្គនេះហើយឈានទៅវគ្គ១៦ក្រុមចុងក្រោយនៃយុទ្ធនាការ World Cup ។ ព័រទុយហ្គាល់តាមបានអាមេរិក២-២នៅម៉ោងបន្ថែមហើយពួកគេនឹងត្រូវ
ជួបជាមួយក្រុមក្អែកខ្មៅហ្គាណាសម្រាប់ ការប្រកួតចុងក្រោយនៅថ្ងៃព្រហស្បតិ៍ហើយពួកគេត្រូវការឈ្នះចាំបាច់ព្រមទាំងរងចាំអ៊ុតលទ្ធផលរបស់ក្រុមឥន្ទ្រីដែក អាល្លឺម៉ង់ផងដែរ ។ លោក Bento ប្រាប់អ្នកសារព័ត៌មានថា “លទ្ធផលនេះគឺមិនល្អទេ ២-២ គឺយើងមិនធ្លាក់ទេ ប៉ុន្តែវាបានធ្វើឲ្យ យើងស្ថិតក្នុងស្ថានភាពដ៏លំបាក យើងមានឱកាសតិចណាស់” ។
“អ្វីដែលយើងត្រូវបារម្ភគឺគ្រាប់បាល់ ព្រោះយើងបានបណ្តោយឲ្យអាល្លឺម៉ង់ស៊ុតចូលច្រើនពេក” ។ គួររម្លឹកឡើងវិញថា កាលពីការប្រកួត World Cup បួនឆ្នាំមុននៅប្រទេសអាហ្វ្រិកខាងត្បូង ព័រទុយហ្គាល់ ត្រូវបានក្រុមគោជល់អេស្ប៉ាញទម្លាក់ត្រឹមវគ្គ១៦ក្រុមចុងក្រោយ ៕
