កំពង់ធំ៖ ផ្លែសាវម៉ៅ មង្ឃុត និងធុរេនកន្លងមក ធ្លាប់តែនាំចូលពីប្រទេសជាតិខាង ដូចជាប្រទេសវៀតណាម និងប្រទេសថៃ ដើម្បបំរើសេចក្តីត្រូវការ របស់បងប្អូនប្រជាពលរដ្ឋនៅក្នុងខេត្ត ក៏ដូចជានៅក្នុងប្រទេសផងដែរ តែដោយបងប្អូនប្រជាពលរដ្ឋខ្មែរ មានការយកចិត្តទុកដាក់មកលើសុខភាព ជីវិតប្រចាំថ្ងៃ ទើបបែរមក ប្រើប្រាស់ផលិតផលក្នុងស្រុកវិញ។
នៅក្នុងខេត្តកំពង់ធំ ប្រជាកសិករបាន អភិវឌ្ឍន៍ការដាំបន្លែបង្កា និងផលិតផលផ្លែឈើរួមទាំងដំណាំហូបផ្លែនៅក្នុងមូលដ្ឋាន ដោយមានការគាំទ្រពីសំណាក់ កសិកម្មខេត្តកំពង់ធំ បានផ្តល់នូវបច្ចេកទេស គាំទ្រឲ្យមានការដាំដុះរបស់ប្រជាកសិករ រួមទាំងបានផ្តល់នូវការលើកទឹកចិត្ត ពីឯកឧត្តម សុខ លូ អភិបាល ខេត្តកំពង់ធំ ក្នុងការជម្រុញឲ្យមានការប្រើប្រាស់ផលិតក្នុងស្រុក ដើម្បីភាពរីកចំរើនបង្កើនប្រាក់ចំនូលដល់ ក្រុមគ្រួសារ។
ជាក់ស្តែងខេត្តកំពង់ធំ មានចំការចម្រុះ ក្នុងនោះមានសាវម៉ៅ ធុរ៉េន មង្ឃុត និងធុរ៉េនចំនួន៧កន្លែង សម្រាប់បំរើការប្រជាពលរដ្ឋ នៅក្នុងខេត្តកំពង់ធំ និងអ្នកធ្វើដំណើឆ្លងកាត់ បានចូលភ្លក់រស់ជាតិ សាវម៉ៅធុរ៉េន ដែល មានរស់ជាតិផ្អែមឆ្ងុយឆ្ងាញ់ពិសារ ដែលមានទីតាំងស្ថិតនៅ ភូមិវាលល្ពាក់ចាស់ ឃុំសាលាវិស័យ ស្រុកប្រាសាទបល្ល័ង្គ ខេត្តកំពង់ធំ ។
លោកស្រី អរ នូរ ដែលជាម្ចាស់ចំការ បានឲ្យដឹងកាលពីរសៀលថ្ងៃទី ១៩ ខែកក្តដា ឆ្នាំ ២០១៨ថា ដើមកំណើតរស់នៅខេត្តកំពង់ចាម បានមកទិញដី នៅទីតាំងខាងលើ ហើយបានដាំដំណាំចម្រុះក្នុងចំការលើផ្ទៃដី ៣ ហិចតា មានដំណាំសាវម៉ៅ មង្ឃុត ធុរ៉េន ក្រូច ហើយបានលក់ជារៀងរាល់ឆ្នាំ ជាក់ស្តែងដូចជាឆ្នាំនេះ មានអ្នកទេសចរណ៍ ក្នុងខេត្ត និងក្រៅខេត្ត បានមកទិញជាច្រើន ចំណែកតំលៃសមរម្យ និងអាចរកចំណូលបានយ៉ាងល្អប្រសើរ ។
លោកស្រី អរ នូរ បានបន្តថា ការដាំដំណាំហូបផ្លែនេះ គឺពុំបានប្រើប្រាស់ជីខេមីនោះទេ គឺបានផលិតជីសម្រាប់ប្រើប្រាស់ខ្លួនឯង ហើយបានបណ្តុះកូនឈើហូបផ្លែរ ដែលជាពូជល្អសម្រាប់លក់ជូនដល់បងប្អូន ដែលមានបំណងចង់បាន ហើយក៏សូមអំពាវនាវដល់បងប្អូនប្រជាពលរដ្ឋ ទាំងអស់សូមជួយគាំទ្រផលិតផល ក្នុងស្រុក ដូចជាបន្លែផ្លែឈើ ដើម្បីលើកស្ទួយជីវភាពគ្រួសារ ក៏ដូចជាការកាត់បន្ថយភាពក្រីក្រផងដែរ ។
ដោយ ប៊ុន រដ្ឋា
