កំពង់ឆ្នាំង៖ “បបរគ្រប់គ្រឿង” ជាអាហារបំប៉នសុខភាពដល់កុមារដែលមានអាយុពី៦ខែ ដល់ ៤ឆ្នាំ ។ អ្នកស្រី ពៅ សុភី អាយុ៤៣ឆ្នាំ ជាប្រជាពលរដ្ឋស្ម័គចិត្តភូមិ បាននិយាយបែបនេះខណៈដែលគាត់ កំពុងកូរបបរ គ្រប់គ្រឿងសម្រាប់កុមារ ក្នុងភូមិក្រាំងខ្មែរ ឃុំពពេល ស្រុកបរិបូរណ៏កាលពីថ្ងៃទី ២២ ខែ មិថុនា ឆ្នាំ២០១៤។
អ្នកស្រីបាននិយាយបន្តថាៈ គាត់ត្រូវបានអង្គការក្រៅរដ្ឋាភិបាលមួយ ជ្រើសគាត់ជាអ្នកស្ម័គចិត្ត ភូមិ ដើម្បីធ្វើបបរចែកកុមារក្នុងភូមិហូប ។ដែលនៅក្នុងមួយសប្តាហ៏ គឺត្រូវបបរចែកកុមារមានអាយុពី៦ ខែដល់៤ឆ្នាំចំនួន១ដង និងក្នុងម្តងត្រូវបបរចំនួន៣កន្លែង នៅក្នុងឃុំពពេល ។ អង្គការក្រៅរដ្ឋាភិបាលនោះបានឧបត្ថមជាថវិការចំនួន១ម៉ឺនរៀលសម្រាប់បបរមួយឆ្នាំងហើយក្រៅពីនោះគឺការជួយឧបត្ថមពីប្រជាពលរដ្ឋ
ក្នុងភូមិ ដែលក្នុងមួយឆ្នាំង ត្រូវចំណាយអស់ប្រាក់ជាង២ម៉ឺន រៀលប៉ុណ្ណោះ និងអាចអោយកុមារចំនួនពី២៥ ទៅ៣០នាក់បានហូបឆ្អែត ។បបរគ្រប់គ្រឿងនេះគ្រឿង ផ្សំរបស់វាមាន ត្រកួន ផ្ទី ស្លឹកបាស់ ផ្លែននង ផ្លែត្រឡាច និងបន្លែផ្សេងទៀតដែលមានពណ៏បៃតង ។ ចំណែកការផ្សំគ្រឿង និងបន្លែ សុទ្ឋតែត្រូវធ្វើតាមការណែនាំរបស់អង្គការនោះទាំងអស់ ។
អ្នកស្រីបានបញ្ចាក់ទៀតថា៖ បបរគ្រប់គ្រឿងនេះ ជាអាហារប៉ូវ បំប៉ន និងមានរស់ជាតិល្អសម្រាប់ កុមារ ដែលមានអាយុពី៦ខែ ទៅ៤ឆ្នាំ ។ កុមារក្នុងភូមិ អាចមកទទួលយកបបរគ្រប់គ្រឿងនេះទៅទទួល ទានដោយសេរីតាមតម្រូវការ ។ អ្នកស្រីជាអ្នកស្ម័គចិត្តក្នុងភូមិ ក៏បានបញ្ចាក់ទៀតថា៖ សព្វថ្ងៃនេះ កុមារក្នុងភូមិ បានទទួលអាហារ បែបនេះតែម្តងក្នុង១សប្តាហ៏ ប៉ុណ្ណោះ តែប្រសិនបើមាន សប្បុរសជន ឬអង្គការណាផ្សេងទៀតជួយឧប ត្ថមជាថវិការឬជាបន្លែ សម្រាប់បបរ គាត់នឹងស្ម័គចិត្ត ធ្វើអោយកុមារៗក្នុងភូមិហូប ដោយមិនគិតពីការកំបាកឬនឿយហត់នោះឡើយ៕
