ភ្នំពេញ ៖ យុវជនម្នាក់បានរងរបួសធ្ងន់ធ្ងរដេកដួលនៅក្នុងថ្លុកឈាមនិងម្នាក់ទៀតរងរបួសស្រាល ខណៈពេលជិះម៉ូតូម៉ាកស៊ុយស៊ូគីនិក មួយគ្រឿងក្នុងល្បឿនលឿនដូចហោះហើយព្យាយាមបើកគេចរថយន្តមួយគ្រឿងនៅពីមុខក៏ជ្រុលចង្កូតទៅបុកនិងបង្គោលភ្លើងមួយដើមចំពីមុខពេញទំហឹង កាលពីវេលាម៉ោង២និង០០នាទីរំលងអាធ្រាត្រឈានចូលថ្ងៃទី១៨ខែកុម្ភៈឆ្នាំ២០១៤ ត្រង់ចំណុចមុខផ្ទះសំណាក់ ខេមបូយូណាយធីត តាមបណ្ដោយផ្លូវលេខ២៣០ ស្ថិតក្នុងសង្កាត់ផ្សារដើមគរ ខណ្ឌទួលគោក។ នៅកន្លែងកើតហេតុប៉ូលិសមិនទាន់ស្គាល់អត្តសញ្ញាណយុវជនរងគ្រោះទាំង២នាក់នៅឡើយទេ។
ប្រភពព័ត៌មានពីកន្លែងកើតបានឱ្យដឹងថា មុនពេលកើតហេតុមានម៉ូតូម៉ាកស៊ុយស៊ូគីនិក ពណ៌ស មួយគ្រឿងពាក់ស្លាកលេខ ភ្នំពេញ 1CG-2055 ជិះដោយយុវជន២នាក់បានធ្វើដំណើរយ៉ាងលឿនតាមបណ្ដោយផ្លូវលេខ២៣០ ក្នុងទិសដៅពីកើតទៅលិចដូចហោះ ស្រាប់តែមកដល់ចំណុចកើតហេតុខាងលើក៏បានវ៉ាក់ជាមួយរថយន្តមួយគ្រឿងមិនស្គាល់ម៉ាកដែល
កំពុងបើកបត់ឆ្លងផ្លូវចូលផ្ទះ ទើបបានរេចង្កូតជ្រុលទៅបុកបង្គោលភ្លើងបំភ្លឺផ្លូវមួយដើមចំពីមុខពេញទំហឹងបណ្ដាលអោយយុវជនម្នាក់ជាអ្នកបើកម៉ូតូរងរបួសធ្ងន់ធ្ងរសន្លប់ស្ដូកស្ដឹងនៅក្នុងថ្លុកឈាម ចំណែកមិត្តភ័ក្តម្នាក់ទៀតបានលោតចេញពីលើ
ម៉ូតូទើបរងរបួសស្រាលដោយគ្រាន់តែរលត់ដៃរលត់ជើងបន្តិចបន្តួច។ ក្រោយពេលកើតហេតុយុវជនរងរបួសធ្ងន់ធ្ងរខាងលើត្រូវបានរថយន្តសាមុយដឹកយកទៅសង្គ្រោះបន្ទាន់នៅគ្លីនិកឯកជនមួយ ឯម៉ូតូត្រូវបានមិត្តភ័ក្តិដែលជិះពីក្រោយរងរបួសស្រាលនោះជិះបន្តទៅមុខទៀតបាត់ទៅ៕ 
