(ខេត្តព្រះសីហនុ)៖ឯកឧត្តម យន្ត មីន អភិបាល នៃគណៈអភិបាលខេត្តព្រះសីហនុ បានព្រមានថានឹងចាត់វិធានការក្តៅ ទៅលើជនខឹលខូចទាំងឡាយណាដែលកាប់ទន្រ្ទានព្រៃឈើដូចជាតំបន់ក្បាលឆាយ កោះរ៉ុង និងដីព្រៃលិចទឹក ជាជម្រកមច្ឆាជាតិនៅតាមតំបន់នានាក្នុងខេត្តជាពិសេសស្រុកព្រៃនប់ជាដើម។
ក្នុងនោះដែរ លោកបានព្រមានធ្ងន់ៗជាថ្មីទៀត ចំពោះបុគ្គលទាំងឡាយណាដែលបានលួចឃុបឃិតគ្នាធ្វើសកម្មភាពទន្ទ្រានដីព្រៃនៅតំបន់ក្បាលឆាយយកដីកាន់កាប់ នឹងត្រូវអនុវត្តវិធានការច្បាប់ដោយគ្មានការលើកលែងទៀតឡើយ។
ឯកឧត្តម យន្ត មីន បញ្ជាក់បន្ថែមថា៖ ក្បាលឆាយដាច់ខាតត្រូវតែការពារអោយបាន ។ចំពោះតំបន់ដែលរងការកាប់ឆ្ការទន្ទ្រានកន្លងមកនឹងធ្វើការស្តារឡើងវិញដើម្បីរក្សាប្រភពទឹកសាបសំរាប់ប្រើប្រាស់នៅខេត្តព្រះសីហនុទាំងមូល។
នេះបើយោងតាមប្រសាសន៏របស់ ឯកឧត្តម អភិបាលខេត្តព្រះសីហនុ ថ្លែងក្នុងពិធីជួបសំណេះសំណាលជាមួយថ្នាក់ដឹកនាំ មន្រ្តីរាជការ នៃមន្ទីរកសិកម្ម រុក្ខាប្រមាញ់ និងនេសាទខេត្តព្រះសីហនុ នាព្រឹកថ្ងៃទី ០៣ ខែកញ្ញា ឆ្នាំ២០១៨។
ជាមួយគ្នានេះដែរ ឯកឧត្តម យន្តមីន អភិបាលខេត្ត បានជម្រុញអោយជំនាញជលផល និងកសិកម្ម ត្រូវបំផុសដល់ប្រជាពលរដ្ឋអោយខិតខំលើកស្ទួយផ្នែកកសិម្មទាំងការដាំដុះនិងការចិញ្ចឹមត្រី /បង្គារ តាមលក្ខណៈបច្ចេកទេសទំនើបដើម្បីបង្កើនផលិតផលក្នុងស្រុក ខណៈដែលសព្វថ្ងៃនេះខេត្តព្រះសីហនុ បន្លែ ត្រី សាច់ ភាគច្រើននាំចូលពីតំបន់ផ្សេងសំរាប់ផ្គត់ផ្គង់។ប្រសិនជាកសិករយើងអាចធ្វើបាននោះនឹងអាចកាត់បន្ថយការនាំចូលប្រហែល និងអាចលើកស្ទួយជីវភាពគ្រួសារពួកគាត់បានមួួយកំរិតថែមទៀត៕(សាវ៉ុន)
