ខេត្តកំពង់ឆ្នាំង នារដូវបិទនេសាទ ក្រោមការចង្អុលបង្ហាញពីលោក សេង ប៊ុនឈឿន នាយខ័ណ្ឌរដ្ឋបាលជលផល ខេត្តកំពង់ឆ្នាំង ដឹកនាំកម្លាំងដោយលោក តាត សីហៈ នាយផ្នែករដ្ឋបាលជលផលកំពង់ឆ្នាំង ចូលរួមដោយ នាយសង្កាត់រដ្ឋបាលជលផលកំពង់លែង លោក ពុំ សុផល
សហគមន៍នេសាទឃុំប្រឡាយមាស និងឃុំផ្លូវទូក រួមនិងអាជ្ញាធរមូលដ្ឋាន បានចុះបង្ក្រាបបទល្មើសនេសាទ ក្នុងរដូវបិទនេសាទនេះ ស្ថិតក្នុងភូមិសាស្ត្រឃុំប្រឡាយមាស និងឃុំផ្លូវទូក ស្រុកកំពង់លែង ខេត្តកំពង់ឆ្នាំង ។
ជាលទ្ធផល កម្លាំងចម្រុះរដ្ឋបាលជលផល ក្នុងយុទ្ធនាការបង្ក្រាបខាងលើនេះ បង្ក្រាបបាន ដោយរុះរើរបាំងកាត់ព្រែក ចំនួន០៣កន្លែង ស្មើនឹង៥០ម៉ែត្រ លបចំនួន១៨មាត់ បង្គោលចំនួន៧០០ដើម របាំងសាច់អួន៥កន្លែង ស្មើនឹង៨៥០ម៉ែត្រ និងចាក់លែងកូនត្រី ចំនួន៥០គីឡូក្រាម ចូលទៅក្នុងបឹងធម្មជាតិវិញ ។
លោក តាត សីហៈ នាឱកាសនោះផងដែរ បានធ្វើការផ្សព្វផ្សាយ និងណែនាំច្បាប់ស្តីពីជលផល ដល់ក្រុមអ្នកនេសាទនៅទីនោះ សូមធ្វើការនេសាទជៀសវាងប្រើឧបករណ៍ខុសច្បាប់ ដោយអនុវត្តតាមប្រកាសលេខ៤៥៨ ក.ស.ក ស្តីពីការប្រើប្រាស់ឧបករណ៍នេសាទ ជាលក្ខណៈគ្រួសារ និងជៀសវាងធ្វើការនេសាទ ក្នុងដែនអភិរក្ស ដែលជាហេតុនាំអោយជាប់ទោសទណ្ឌ ។
សូមអោយមានការគោរពច្បាប់ ជលផលទាំងអស់គ្នា នាំអោយមានការកើនឡើងវិញ នូវមច្ឆាជាតិទុកសម្រាប់កូនចៅជំនាន់ក្រោយ និងសូមរាយកាសរណ៍ជាបន្ទាន់ ជូនសមត្ថកិច្ចមូលដ្ឋាន ក៍ដូចជាសមត្ថកិច្ចជំនាញ ក្នុងករណីជួបបទល្មើស អោយបានទាន់ពេលវេលាផងដែរ ៕ 
