កំពង់ធំ៖ ថ្នាក់ដឹកនាំ មេបញ្ជាការគ្រប់បណ្ដាកងឯកភាព នៃបញ្ជាការដ្ឋានតំបន់ប្រតិបត្តិការសឹកកំពង់ធំបានមូលមតិចូលរួមចាប់កោសល្យផលបុណ្យ បានបច្ច័យចំនួន ១,០៣៨ $ សម្រាប់ការសាងសង់ ព្រះពុទ្ធបដិមាករធ្វើអំពីស្ពាន់ នៅវត្ត ឥន្ទ្រីសំវរ:ហៅហៅវត្តកំពង់ធំ ដែលបានដឹកនាំបង្កើតកម្មវិធីចូលរួមជាមួយវិស័យព្រះពុទ្ធសាសនា ត្រូវបានដឹកនាំដោយ ឯកឧត្តម ឧត្តមសេនីយ៍ទោ សោម ស៊ុន មេបញ្ជាការងយោធភូមិភាគទី៤ និងមេបញ្ជាការតំបន់ប្រតិបត្តិការសឹករងកំពង់ធំ ។
ពិធីប្រគេនបច្ច័យចំនួន ១,០៣៨ ដុល្លា បានយកទៅប្រគេនព្រះតេជគុណព្រះសត្ថាបារមី សៀង សុខ ព្រះមេគណខេត្តកំពង់ធំ នៅវេលាម៉ោង១០:០០ នាទីព្រឹក ថ្ងៃទី៦ ខែកញ្ញា ឆ្នាំ២០១៨ សម្រាប់ការជួយសាងសង់ព្រះពុទ្ធបដិមាករ ដែលត្រូវបានសាងសង់អំពីស្ពាន់ និងបានឧបត្ថម្ភអង្ករចំនួន២០០គីឡូក្រាម មីយើងចំនួន១០កេស ទឹកបរិសុទ្ធចំនួន១០ កេស សម្រាប់ព្រះសង្ឃដែលគង់ចាំព្រះវស្សា និងរៀនសូត្រនៅវត្តឥន្ទ្រីសំវរ:ហៅហៅវត្តកំពង់ធំ។
ឯកឧត្តម ឧត្តមសេនីយ៍ទោ សោម ស៊ុន បានមានប្រសាសន៍ថា សម្តេចតេជោ ហ៊ុន សែន បានយកចិត្តទុកដាក់យ៉ាងសំខាន់មកលើ វិស័យព្រះពុទ្ធសាសនា ដែលជាសាសនារបស់រដ្ឋ និងជាសាសនាមានវ័យចំណាស់ ជាងគេ បានធ្វើឲ្យមានការរីកចំរើនយ៉ាងខ្លាំង ទោះជានៅចំកាត់មាត់ញក ដាច់ស្រយ៉ាលក៏ដោយ ជាពិសេស នៅក្នុងព្រៃឬនៅលើភ្នំ ក៏មានវត្តអារាម មានអាស្រម មានកន្លែងជាទីស្ការៈ សម្រាប់ឲ្យបងប្អូនយើងគោរពប្រនិបត្តិរក្សានូវទំនាមទំលាប់ប្រពៃណីខ្មែរដែរ ប្រទេសជាតិមានការរីកចំរើន ប្រទេសមានសន្តិភាព ក៏មាន វិស័យព្រះសាសនាបានចូលរួមចំណែក ការពារកសាងអភិវឌ្ឍន៍ដ៏សំខាន់មួយដែរ។
ឧត្តមសេនីយ៍ទោ សោម ស៊ុន បានបញ្ជាក់ថា ប្រទេសកម្ពុជា ជាប្រទេសមានសិល្ប៍ ក្នុងសម័យសម្តេចតេជោ ប្រជាពលរដ្ឋគ្រប់រូបមានសិល្ប៍ មានការចេះដឹង មានការអន់អោនអធ្យាស្រ័យ អភ័យឲ្យគ្នា រួមទាំងការជួយគ្នាទើបបានធ្វើឲ្យមានសន្តិភាពរហូតមកដល់សព្វថ្ងៃ ដែលវាខុសឆ្ងាយពីរបស់បនក្បត់ប៉ុលពត ប្រជាជនរងទុក្ខវេទនា កាប់សំលាប់ បង្ហូរឈាម ព្រះពុទ្ធសាសនាត្រូវបានលុបបំបាត់ចោល ព្រះវិហារក្លាយជាកន្លែងចិញ្ចឹមសត្វ ឬជ្រុកស្រូវ ម្តាយព្រាត់កូន ប្រពន្ឋព្រាត់ប្តី ក៏ដោយសារការដឹកនាំដោយគ្មានសិល្ប៍ក្នុងខ្លួន បានធ្វើឲ្យទទួលបរាជ័យ និងសូមអំពាវនាវដល់បងប្អូនប្រជាពលរដ្ឋ ចូលរួមថែរក្សាទ្រព្យសម្បត្តិក្នុងវត្តអារាម រក្សានូវតំលៃព្រះពុទ្ធសាសនាបន្តទៀត ដើម្បីសន្តិភាពនិងការអភិវឌ្ឃន៍។
ដោយ ប៊ុន រដ្ឋា 
