កំពង់ចាម: ខណ្ឌរដ្ឋបាលជលផលខេត្តកំពង់ចាម សហការជាមួយកម្លាំងប៉ុស្តិ៍នគរបាលរដ្ឋបាលព្រែកដំបូក និងប៉ុស្តិ៍នគរបាលរដ្ឋបាលស្វាយសាច់ភ្នំ បានចុះបង្ក្រាបបទល្មើសជលផលជាបន្តបន្ទាប់ ដោយរឹបអូសបាននូវឧបករណ៍ខុសច្បាប់រួម
មាន លូស្បៃមុងចំនួន៨២មាត់ របាំងស្បៃមុងប្រវែង៤១០០ម៉ែត្រ ឧបករណ៍រ៉ាវចំនួន១២មាត់ របាំងរ៉ាវប្រវែង៦០៥ម៉ែត្រ និងបង្គោលចម្រឹងចំនួន៤០៣ដើម ព្រមទាំងចាក់ព្រលែងកូនត្រីចម្រុះសរុបទម្ងន់៤៣៤គីឡូក្រាម ចូលក្នុងបឹងធម្មជាតិវិញផង។
លោក អ៊ុក ណារិន នាយខណ្ឌរដ្ឋបាលជលផលខេត្តកំពង់ចាម បានឲ្យដឹងថា ក្នុងរដូវត្រីពងកូន និងជារដូវបិទការនេសាទផងនោះ កម្លាំងរដ្ឋបាលជលផល តែងតែសហការជាមួយអាជ្ញាធរពាក់ព័ន្ធ ចុះបង្ក្រាបបទល្មើសនេសាទជាបន្តបន្ទាប់ ជាក់ស្ដែងកាលពីព្រឹកថ្ងៃទី២៣ ខែកញ្ញា ឆ្នាំ២០១៨នេះ កម្លាំងរដ្ឋបាលជលផល រួមនឹងអាជ្ញាធរមូលដ្ឋាន បានចុះបង្ក្រាបបទល្មើសជលផលចំនួន០៣ករណី និងដុតបំផ្លាញចោលនូវវត្ថុតាងរួមមាន: ករណីទី១-បានធ្វើឡើង នៅចំណុចបឹងស្នាយដួច ឃុំបារាយណ៍ ស្រុកស្រីសន្ធរ រឹបអូសបាន លូស្បៃមុងចំនួន៣៥មាត់ របាំងស្បៃមុងប្រវែង១៧៥០ម៉ែត្រ និងបង្គោលចម្រឹងចំនួន៦៩៨ដេីម ព្រមទាំងចាក់លែងកូនត្រីចម្រុះទម្ងន់១៧៥គីឡូក្រាម ចូលក្នុងបឹងធម្មជាតិវិញ។
ករណីទី២-បានធ្វើឡើង នៅចំណុចបឹងវាម ឃុំប្រាំយ៉ាម ស្រុកស្រីសន្ធរ រឹបអូសបាន លូស្បៃមុង៤៧មាត់ របាំងស្បៃមុងប្រវែង២៣៥០ម៉ែត្រ និងបង្គោលចម្រឹង៩៤០ដើម ព្រមទាំងចាក់លែងកូនត្រីចម្រុះ២៣៥គីឡូក្រាម ចូលក្នុងបឹងធម្មជាតិវិញ។
ករណីទី៣-បានធ្វើឡើង នៅចំណុចចុងព្រែកដំបូក ឃុំព្រែកដំបូក ស្រុកស្រីសន្ធរ រឹបអូសបាន ឧបករណ៍រ៉ាវចំនួន១២មាត់ របាំងរ៉ាវប្រវែង៦០៥ម៉ែត្រ និងបង្គោលចម្រឹងចំនួន២៤០ដើម ព្រមទាំងចាក់លែងកូនត្រីចម្រុះចំនួន២៤គីឡូក្រាម ចូលក្នុងបឹងធម្មជាតិវិញ ផងដែរ ៕
