កំពង់ចាម: ខណ្ឌរដ្ឋបាលជលផលខេត្តកំពង់ចាម សហការជាមួយកម្លាំងអធិការដ្ឋាននគរបាលស្រុកបាធាយ និងកម្លាំងប៉ុស្តិ៍នគរបាលរដ្ឋបាលត្រប់ នាព្រឹកថ្ងៃទី២១ ខែតុលា ឆ្នាំ២០១៨នេះ បានចុះបង្ក្រាបបទល្មេីលជលផលបានចំនួន០៤ករណី ដោយបំផ្លាញចោលនូវឧបករណ៍បទល្មើសនេសាទជាង៤ពាន់ម៉ែត្រ និងចាក់
ព្រលែងកូនត្រីចម្រុះទម្ងន់ជិត១ពាន់គីឡូក្រាម ចូលក្នុងបឹងធម្មជាតិវិញផងដែរ។
លោកអ៊ុក ណារិន នាយខណ្ឌរដ្ឋបាលជលផលខេត្តកំពង់ចាម ដែលបានដឹកនាំប្រតិបត្តិការណ៍នេះបានឲ្យដឹងថា ការចុះបង្ក្រាបនេះកម្លាំងចម្រុះ បានធ្វើឡើងជាបន្តបន្ទាប់ ដោយករណីទី១ បានធ្វើឡើងនៅចំណុចស្រះហុីង ឃុំត្រប់ ស្រុកបាធាយ រឹបអូសបានលូស្បៃមុងចំនួន៤៤មាត់ របាំងស្បៃមុងប្រវែង២២០០ម៉ែត្រ និងបង្គោលចម្រឹងចំនួន៦៦០ដេីម ព្រមទាំងចាក់លែងកូនត្រីចម្រុះទម្ងន់៦៧៥ គីឡូក្រាម ចូលក្នុងបឹងធម្មជាតិវិញ។ ករណីទី២ បានធ្វើឡើងនៅចំណុចគោកសំរោង ឃុំត្រប់ ស្រុកបាធាយ រឹបអូសបានលូស្បៃមុងចំនួន១៧មាត់ របាំងស្បៃមុងប្រវែង៨៥០ម៉ែត្រ និងបង្គោលចម្រឹងចំនួន២៥៥ដេីម ព្រមទាំងចាក់លែងកូនត្រីចម្រុះទម្ងន់៨៥ គីឡូក្រាម ចូលក្នុងបឹងធម្មជាតិវិញ។ ករណីទី៣ បានធ្វើឡើងចំណុចបឹងក្រសា ឃុំត្រប់ ស្រុកបាធាយ រឹបអូសបានលូស្បៃមុងចំនួន១៦មាត់ របាំងស្បៃមុងប្រវែង៨០០ម៉ែត្រ និងបង្គោលចម្រឹងចំនួន២៤០ដេីម ព្រមទាំងចាក់លែងកូនត្រីចម្រុះទម្ងន់៤៨ គីឡូក្រាម ចូលក្នុងបឹងធម្មជាតិវិញ។ និងករណីទី៤បានធ្វើឡើងនៅចំណុចទួលឬស្សីច្រាញ់ ឃុំត្រប់ ស្រុកបាធាយ រឹបអូសបានលូស្បៃមុងចំនួន៣២មាត់ របាំងស្បៃមុងប្រវែង៣២០ម៉ែត្រ និងបង្គោលចម្រឹងចំនួន៣២០ដេីម ព្រមទាំងចាក់លែងកូនត្រីចម្រុះទម្ងន់៩៦ គីឡូក្រាម ចូលក្នុងបឹងធម្មជាតិវិញផងដែរ។
លោកអ៊ុក ណារិន នាយខណ្ឌរដ្ឋបាលជលផលខេត្តកំពង់ចាម បានបន្តទៀតថា ក្នុងប្រតិបត្តិការណ៍បង្ក្រាបទាំង៤ករណីនេះ កម្លាំងចម្រុះធ្វើការរឹបអូសបាន លូស្បៃមុងចំនួន១០៩មាត់ របាំងលូស្បៃមុងប្រវែង៤១៧០ម៉ែត្រ និងបង្គោលចម្រឹងចំនួន១៤៧៥ដេីម ព្រមទាំងបានចាក់លែងកូនត្រីម្រុះទម្ងន់៩០៤គីឡូក្រាម ចូលក្នុងបឹងធម្មជាតិវិញ ដោយឡែកឧបករណ៍បទល្មើសទាំងនោះ ត្រូវបានធ្វើការដុតបំផ្លាញចោលនៅនឹងកន្លែងតែម្ដង ៕
