កំពង់ចាម: សត្វខ្យងសេះឬខ្យងថៃ ដែលតែងតែបំផ្លាញនូវផលដំណាំស្រូវ ប្រជាកសិករយើង កំពុងតែមានទីផ្សារនាំចេញទៅលក់នៅប្រទេសវៀតណាម នេះជាផលចំណេញមួយសម្រាប់កសិករយើង ហើយក៏ជាឱកាសរបស់បងប្អូនប្រជាពលរដ្ឋ ក្នុងការរកប្រាក់កម្រៃសម្រាប់ផ្គត់ផ្គង់ជីវភាពក្នុងគ្រួសារផងដែរ។
ឈ្មួញកណ្ដាលម្នាក់ឈ្មោះ សៀង ញិល ភេទប្រុស អាយុ៤៨ឆ្នាំ រួមនឹងប្រពន្ធ រស់នៅក្នុងភូមិអូរកណ្តុល ឃុំព្រែកក្របៅ ស្រុកកងមាស ខេត្តកំពង់ចាម ដែលប្រកបមុខរបរទិញ-លក់ ខ្យងសេះឬខ្យងថៃនេះ រយៈពេលជាង១ឆ្នាំមកហើយ ដោយទិញចូលក្នុង១គីឡូក្រាម តម្លៃ៣០០រៀល សម្រាប់ធ្វើការលក់ចេញក្នុង១គីឡូក្រាម តម្លៃ៣៥០រៀល គឺក្នុង១គីឡូក្រាម ចំណេញបានចំនួន៥០រៀន។
ឈ្មួញកណ្ដាលរូបនេះ បានបន្តទៀតថា ការប្រកបមុខរបរនេះ គឺគាត់ត្រូវជិះម៉ូតូរម៉កដើរប្រមូលទិញពីអ្នកភូមិជិតៗ ក្នុងនោះក៏មានអ្នកភូមិមួយចំនួនបានដឹកតាមម៉ូតូ យកមកលក់ដល់ផ្ទះតែម្ដង ដោយក្នុង១ថ្ងៃគាត់អាចទិញចូលបានចំនួន២ទៅ៣តោនឯណេះ ហើយក្នុងរយៈពេល២ថ្ងៃ ទើបឈ្មួញមកពីខេត្តតាកែវ យករថយន្តប្រភេទសាំងយ៉ុងមកទទួលយក ហើយដឹកយកទៅលក់បន្តនៅប្រទេសវៀតណាមផងដែរ។
ចំណែកឯកសិករឈ្មោះ ស្រឿន សុកនៅ ភេទប្រុស អាយុ៣២ឆ្នាំ រស់នៅភូមិពោធិសាលាទី២ ឃុំព្រែកក្របៅ ស្រុកកងមាស បានឲ្យដឹងដែរថា គាត់បានប្រកបមុខរបរធ្វើស្រែចំការ ហើយក៏ឆ្លៀតឱកាសដើររកខ្យងលក់ផងដែរ ព្រោះវាអាចរកប្រាក់កម្រៃសម្រាប់ផ្គត់ផ្គង់ជីវភាពក្នុងគ្រួសារបានមួយផ្នែក ហើយមួយផ្នែកទៀតគឺផលដំណាំស្រូវរបស់គាត់ក៏បាននៅល្អ ដោយមិនមានសត្វខ្យងកាត់បំផ្លាញទៀតទនោះទេ ៕
