កំពង់ចាម: ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម និងឯកឧត្ដម សុះ មូស៊ីន សមាជិករដ្ឋសភា និងជាអនុប្រធាន ស.ស.យ.ក តំណាងឯកឧត្តម ហ៊ុន ម៉ានី ប្រធានគណៈកម្មការទី៧ នៃរដ្ឋសភា និងជាប្រធានសហភាពសហព័ន្ធយុវជនកម្ពុជា បានអញ្ជើញជាគណៈអធិបតីក្នុងពិធីបិទបញ្ចប់
គម្រោង ស្តីពីការចូលរួមរបស់យុវជន ក្នុងការងារអនាម័យសំរាម នៅទីសាធារណ:ក្នុងក្រុងកំពង់ចាម។ ដែលពិធីនេះត្រូវបានធ្វើឡើងនាព្រឹកថ្ងៃទី២៩ ខែតុលា ឆ្នាំ២០១៨ នៅសាលសន្និសីទសាលាខេត្តកំពង់ចាម ដោយមានការអញ្ជើញចូលរួមពីសំណាក់ ឯកឧត្ដម លោជំទាវ លោក លោកស្រី ប្រធានមន្ទីរ អង្គភាពពាក់ព័ន្ធជុំវិញខេត្ត និងប្អូនៗសមាជិកសហភាពសហព័ន្ធយុវជនកម្ពុជា ជាច្រើនរូបផងដែរ។
ថ្លែងក្នុងពិធីនោះ ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម បានលើកឡើងថា ការទុកដាក់សំរាម សំណល់រឹង នៅតែជាបញ្ហាសង្គមនៅឡើយ ដូច្នេះយុវជនយើង និងប្រជាពលរដ្ឋក្នុងក្រុងកំពង់ចាម ត្រូវតែចូលរួមកាន់តែខ្លាំង ដើម្បីអប់រំ ណែនាំ ផ្សព្វផ្សាយ និងបង្ហាញភាពជាគំរូ ស្តីពីការទុកដាក់សំរាម សំណល់រឹងជាសាធារណៈ ក្នុងក្រុងកំពង់ចាម ដើម្បីឲ្យក្រុងកំពង់ចាម ទាំងមូលមានសោភណ្ឌភាពល្អ។
ឯកឧត្ដម អភិបាលខេត្ត បានថ្លែងបន្តទៀតថា ការរួមចំណែកក្នុងសកម្មភាពរបស់យុវជន ជាពិសេស សហភាពសហព័ន្ធយុវជនកម្ពុជាខេត្ត ក្នុងការងារអនាម័យសំរាមក្នុងក្រុងកំពង់ចាម រយៈពេលកន្លងមក គឺពិតជាការចូលរួមចំណែកយ៉ាងសកម្មមួយ ក្នុងការបញ្ជ្រាបការយល់ដឹងអំពីអនាម័យសំរាម ការលើកកំពស់បរិស្ថាន និងសោភណ៌ភាពរបស់ទីក្រុងយើង ដែលទទួលបានជ័យលាភីផ្ការំដួល៣ទង នាពេលកន្លងមក។
ជាមួយគ្នានោះ ឯកឧត្ដម អភិបាលខេត្ត ក៏បានសម្ដែងការជឿជាក់និងសង្ឃឹមថា យុវជនទាំងអស់នឹងបន្តអនុវត្តសកម្មភាពនេះ ឲ្យកាន់តែផុសផុល និងចូលរួមបណ្តុះគំនិតស្មារតីប្រជាពលរដ្ឋយើង ឲ្យចេះទុកដាក់ វេចខ្ជប់សំរាមឲ្យបានត្រឹមត្រូវ នៅតាមទីសាធារណៈ ដើម្បីផ្លាស់ប្តូរនូវឥរិយាបថអសកម្ម មកជាមានទំនូលខុសត្រូវចំពោះសំរាម ដែលកើតចេញពីសកម្មភាពរបស់ពួកគាត់ផ្ទាល់ ផងដែរ ៕
