ភ្នំពេញ ៖ នារីម្នាក់ត្រូវសមត្ថកិច្ចឃាត់ខ្លួន បន្ទាប់ពីធ្វើសកម្មភាពលួចលុយនិងទូរស័ព្ទពីជនបរទេសម្នាក់រយៈពេលជិត២ខែ ហើយត្រូវបានបុរសជនជាតិបរទេសនោះប្រទះឃើញក៏ឃាត់ខ្លួនអោយសមត្ថកិច្ចជួយអន្តរាគមន៍។
ហេតុការណ៍នេះបានកើតឡើងកាលពីវេលាម៉ោង៩និង៥០នាទីយប់ថ្ងៃទី២៦ខែមិថុនាឆ្នាំ២០១៤ ត្រង់ចំណុចផ្ទះសំណាក់ រ៉ាវុធ តាមបណ្ដោយផ្លូវលេខ១១១ ស្ថិតក្នុងសង្កាត់បឹងព្រលិត ខណ្ឌ៧មករា។
ប្រភពព័ត៌មានបានអោយដឹងថា កាលពីវេលាម៉ោង១១យប់ថ្ងៃទី២ខែឧសភាឆ្នាំ២០១៤កន្លងទៅ នារីជាជនសង្ស័យបានកំពុងដើរតាមផ្លូវ ហើយបុរសជនជាតិបរទេសរងគ្រោះជិះម៉ូតូមួយគ្រឿង បានឃើញនារីសង្ស័យក៏ឈប់និយាយគ្នា បន្ទាប់មកក៏ត្រូវរ៉ូវគ្នា រួចក៏ធ្វើដំណើរមកផ្ទះណាក់ រ៉ាវុធ ក្រោយពេលរួមមេត្រីគ្នារួចបុរសជាជនជាតិបរទេសនោះក៏បានដេកលក់បាត់ដោយព្រោះស្រវឹងខ្លាំងពេក ឃើញឱកាសល្អនារីសង្ស័យក៏បានធ្វើសកម្មភាពយកលុយពីក្នុងកាបូបចំនួន៤០០ដុល្លារ និងទូរស័ព្ទIphone4 មួយគ្រឿង ហើយគេចខ្លួនបាត់។ បន្ទាប់ពីភ្ញាក់ដឹងទើបបុរសជនជាតិបរទេសដឹងថាបាត់លុយនិងទូរស័ព្ទក៏បានទៅដាក់ពាក្យបណ្ដឹងនៅប៉ុស្ដិ៍នគរបាលបឹងព្រលិត។
រហូតនៅយប់កើតហេតុស្រាប់តែបុរសជនជាតិបរទេស ប្រទះឃើញនារីជនសង្ស័យកំពុងដើរតាមផ្លូវក៏បានចាប់ឡើងជិះម៉ូតូយកផ្ទះសំណាក់ រ៉ាវុធ និងបានអោយម្ចាស់ផ្ទះសំណាក់ទំនាក់ទំនងទៅសមត្ថកិច្ចចុះមកអន្តរាគមន៍ផងដែរ។ បើតាមសម្ដីបុរសជនជាតិបរទេសបានអោយដឹងថា រូបគាត់គ្រាន់តែចង់បានលុយចំនួន៤០០ដុល្លារនិងទូរស័ព្ទរបស់គាត់មកវិញ ប៉ុន្តែនារីជាជនសង្ស័យបានយកលុយទាំងនោះចាយអស់ហើយចំណែកទូរស័ព្ទក៏បានយកទៅដាក់បញ្ចាំទៀត ហើយបុរសជនជាតិបរទេសថាបើគ្មានលុយអោយគាត់វិញទេ គាត់និងអោយសមត្ថកិច្ចចាត់ការតាមផ្លូវច្បាប់។ក្រោយពេលកើតហេតុសមត្ថកិច្ចបានសម្រេចយកនារីជាជនសង្ស័យនិងបុរសជនជាតិបរទេសទៅប៉ុស្ដិ៍នគរបាលបឹងព្រលិតដើម្បីធ្វើការដោះស្រាយតាមផ្លូវច្បាប់។ គួរបញ្ជាក់ថាចំពោះអត្តសញ្ញាណនារីសង្ស័យនិងបុរសជនជាតិបរទេស សមត្ថកិច្ចនៅមិនទាន់បញ្ជាក់ប្រាប់នៅឡើយទេ៕
