ភ្នំពេញ ៖ រថយន្តកូរ៉េ២គ្រឿងសណ្ដោងគ្នាធ្វើដំណើរចុះពីស្ពានព្រះមុនីវង្សថ្មី បំណងបត់ឆ្វេងឆ្ពោះឡើងស្ពានព្រះមុនីវង្សចាស់ ក៏ដាច់ខ្សែរអូសរថយន្តធ្វើអោយរថយន្តដែលសណ្ដោងនៅពីក្រោយជ្រុលបុករបាំងថ្មពុះចែកផ្លូវចំពេញទំហឹងរងការខូចខាត។
ហេតុការណ៍នេះបានកើតឡើងកាលពីវេលាម៉ោង៩និង១០នាទីយប់ថ្ងៃទី២៦ខែមិថុនាឆ្នាំ២០១៤ ត្រង់ចំណុចគល់ស្ពានព្រះមុនីវង្សថ្មីត្រើយខាងកើត ស្ថិតក្នុងសង្កាត់ច្បារអំពៅ ខណ្ឌមានជ័យ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញរថយន្តកូរ៉េ២គ្រឿងបានសណ្ដោងគ្នាឡើងស្ពានព្រះមុនីវង្សថ្មី លុះពេលចុះពីលើស្ពានបំណងបត់ឆ្វេងឡើងស្ពានព្រះមុនីវង្សចាស់ ស្រាប់រថយន្តដាច់ខ្សែរសណ្ដោង ធ្វើអោយរថយន្តកូរ៉េ ពណ៌ខៀវ ពាក់ស្លាកលេខ កណ្ដាល 3A-0092 ជ្រុលទៅបុករបាំងថ្មពុះចែកផ្លូវចំពេញទំហឹងរងការខូចខាតទៅមុខលែងរួច សំណាងដែលពុំមានមនុស្សរងគ្រោះថ្នាក់។
បន្ទាប់ពីកើតហេតុ សមត្ថកិច្ចមូលដ្ឋានបានចុះមកត្រួតពិនិត្យនិងបានអោយរថយន្តកូរ៉េដែលសណ្ដោងមួយគ្រឿងទៀតនោះអូសរថយន្តថយក្រោយ ហើយយករថយន្តទៅទុកនៅអធិការដ្ឋាននគរបាលខណ្ឌមានជ័យដើម្បីធ្វើការដោះស្រាយតាមនីតិវិធីច្បាប់៕
