កំពង់ចាម: ក្រោមការយកចិត្តទុកដាក់ពីសំណាក់ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម ដែលតែងតែ
ឆ្លើយតបតាមសំណូមពររបស់ប្រជាពលរដ្ឋ ក្នុងការអភិវឌ្ឍន៍នៅតាមមូលដ្ឋានជាបន្តបន្ទាប់ ជាក់ស្ដែងផ្លូវចាក់កៅស៊ូប្រភេទDBST ចំនួន២ខ្សែ ដែលរដ្ឋបាលសាលាខេត្តកំពង់ចាម បានសម្រេចផ្ដល់ឲ្យប្រជាពលរដ្ឋក្នុងភូមិបឹងកុក២ និងភូមិឡឥដ្ឋ សង្កាត់បឹងកុក ក្រុងកំពង់ចាម ដែលប្រជាពលរដ្ឋមានការត្រេកអរជាខ្លាំង។
លោក ឆន រិន ក្រុមប្រឹក្សាសង្កាត់បឹងកុក ដែលជាអ្នកចុះអនុវត្តន៍គម្រោងស្ថាបនាផ្លូវខាងលើនេះដោយផ្ទាល់ លោកបានឲ្យដឹងថា គម្រោងដែលកំពុងតែចាប់ផ្ដើមស្ថាបនានេះ គឺរដ្ឋបាលសាលាខេត្ត បានទម្លាក់ចុះមកឲ្យមន្ទីរសាធារណការនិងដឹកជញ្ជូនខេត្តកំពង់ចាម ជាអ្នកអនុវត្តន៍បន្ត ជាប្រភេទផ្លូវកៅស៊ូ DBST ទទឹង៦ម៉ែត្រ ប្រវែង១១៧៧ម៉ែត្រ ចាប់ពីចំណុចជាប់ផ្លូវវត្តថ្មគោល ស្រុកកំពង់សៀម តែស្ថិតនៅក្នុងភូមិឡឥដ្ឋ មកទល់នឹងផ្លូវមុខវត្តបឹងកុក ស្ថិតនៅក្នុងភូមិបឹងកុក២ សង្កាត់បឹងកុក ក្រុងកំពង់ចាម។
លោក ឆន រិន បានបន្តទៀតថា កំណាត់ផ្លូវប្រវែង១១៧៧ម៉ែត្រនេះ សម្រាប់ភូមិបឹងកុក២ មានប្រវែង៣៨៧ម៉ែត្រ សាច់កៅស៊ូទទឹង៥ម៉ែត្រ ប្រអប់សង្ខាង២ម៉ែត្រ ស្មើនឹង៧ម៉ែត្រ ដោយឡែកភូមិឡឥដ្ឋមានប្រវែង៧៩០ម៉ែត្រ សាច់កៅស៊ូទទឹង៦ម៉ែត្រ ប្រអប់សង្ខាង២ម៉ែត្រ ស្មើនឹង៨ម៉ែត្រ ផងដែរ។
ការស្ថាបនាផ្លូវទាំង២ខ្សែនេះ ធ្វើឲ្យប្រជាពលរដ្ឋក្នុងតំបន់ខាងលើ មានការត្រេកអរជាខ្លាំង ព្រោះងាយស្រួលក្នុងការធ្វើដំណើរ ហើយហាងឆេងដីធ្លីក៏មានតម្លៃខ្ពស់ទៅតាមហ្នឹងផងដែរ ៕
