ភ្នំពេញ ៖ ជនសង្ស័យម្នាក់ កំពុងធ្វើសកម្មភាពកាច់ក ម៉ូតូរបស់គេដែលទុកក្រោមផ្ទះតែមិនសម្រេចហើយត្រូវម្ចាស់គេមកទាន់ស្រែកផ្អើលដល់ប្រជាពលរដ្ឋនាំគ្នាដេញចាប់បានវាយម្នាក់មួយដៃម្នាក់មួយជើងស្ទើរស្លាប់ស្ទើររស់ ។
ហេតុការណ៍នេះកើតឡើងកាលពីវេលាម៉ោង៨និង៣០នាទីយប់ ថ្ងៃទី ២៦មិថុនា ២០១៤ នៅក្បែរហាងស៊ីធីឡាយ ស្ថិតនៅក្នុងសង្កាត់មិត្តភាព ខណ្ឌ៧មករា ។
យោងតាមប្រភពព័ត៌មានពីជនរងគ្រោះឈ្មោះ អ៊ុំសុធុន ភេទប្រុស អាយុ ២៦ ឆ្នាំ ស្នាក់នៅផ្ទះ លេខ ៣១ តាមបណ្តោយផ្លូវ ១៨២ ក្នុងសង្កាត់អូឬស្សី ៤ ខណ្ឌ៧មករា ដែលជាម្ចាសម៉ូតូបានឱ្យដឹងថា នៅមុនពេលកើតហេតុគាត់បានមកលេងផ្ទះបងស្រីរបស់គាត់នៅទីតាំងកើតហេតុខាងលើ ដោយគាត់បានចតម៉ូតូទុកចោលនៅជាន់ផ្ទាល់ដី និងមានបិទទ្វារផងដែរ ហើយគាត់បានឡើងទៅលេងបងស្រីរបស់គាត់នៅជាន់លើរយៈពេលមួយម៉ោង ។
បន្ទាប់មកគាត់ក៏បានលាបងស្រីត្រឡប់ទៅវិញ ហើយពេលចុះមកយកម៉ូតូជិះក៏ប្រទះឃើញជនសង្ស័យកំពុងយកដែកអក្សរទេ កាច់កម៉ូតូរបស់គាត់ម៉ាកវីវ៉ា ពណ៌ខ្មៅ ពាក់ស្លាកលេខភ្នំពេញ 1AB-7570 ដោយកាច់បែកគ្រាប់សោម៉ូតូអស់ហើយ ពេលនោះខ្លួនក៏បានស្រែកចាចោរៗ ធ្វើឱ្យជនសង្ស័យភ័យ រត់គេចខ្លួនតាមផ្លូវ ហើយគាត់ក៏រត់ដេញតាមនិងស្រែកថាចោរៗ បង្កឱ្យមានការភ្ញាក់ផ្អើលដល់ប្រជាពលររដ្ឋក៏នាំគ្នាជួយដេញព័ទ្ធចាប់បាននៅចំណុច មុខក្រុមហ៊ុនទេសចរណ៍ សេនស៏ ជើនី ។ ដោយស្អប់ពាក្យថា ចោរ បានធ្វើឱ្យប្រជាពលរដ្ឋផ្ទុះជាកំហឹង នាំគ្នាព្រួតវាយជនសង្ស័យម្នាក់មួយដៃ ម្នាក់មួយជើង ស្ទើររស់ស្ទើរស្លាប់។
បន្ទាប់ពីកើតហេតុកម្លាំងនគរបាលប៉ុស្តិ៍មិត្តភាព សហការគ្នាជាមួយកម្លាំងនគរបាលខណ្ឌមកអន្តរាគមន៍និង នាំយកជនសង្ស័យឈ្មោះ ចាន់ វាសនា ភេទ ប្រុស អាយុ ៣៣ឆ្នាំមុខរបរនិងកន្លែងស្នាក់ នៅមិនពិត ប្រាកដ ទៅសួរនាំ ហើយទទួលយកពាក្យបណ្តឹងរបស់ជនរងគ្រោះដើម្បីដោះស្រាយទៅតាមនិតិវិធីច្បាប់ ៕
