ភ្នំពេញ ៖ សមត្ថកិច្ចចម្រុះខណ្ឌចំការមនបានធ្វើការចុះឃាត់ខ្លួនជនសង្ស័យមួយក្រុមដែលសង្ស័យថាមានមុខសញ្ញាលួច- ប្លន់យ៉ាងសកម្មក្នុងរាជធានីភ្នំពេញ នាពេលកន្លងមក ។ ប្រតិបត្តការឃាត់ខ្លួនជនសង្ស័យ ខាងលើនេះធ្វើឡើងកាលពីវេលាម៉ោង១១និង២០នាទីយប់ថ្ងៃទី២៦
មិថុនា ២០១៤ នៅចំណុចផ្ទះមួយកន្លែង តាមផ្លូវ២០៥ ម្តុំកៅដាយ ស្ថិតនៅក្នុងសង្កាត់ទួលស្វាយព្រៃ២ ខណ្ឌចំការមន។
ប្រភពព័ត៌មានបានឱ្យដឹងថា តាមរយៈការស្រាវជ្រាវរបស់កម្លាំងសមត្ថកិច្ចចម្រុះខណ្ឌចំការមនបានកំណត់មុខសញ្ញាថាមានក្រុមជនសង្ស័យមួយក្រុមដែលកំពុងតែប្រមូលផ្តុំគ្នាធ្វើសកម្មភាពប្រព្រិត្តបទល្មើស ដោយក្នុងនោះសមត្ថកិច្ចមានការសង្ស័យថា នៅក្នុងក្រុមនេះគឺមានជនសង្ស័យដែលជាមុខសញ្ញាលួច ឆក់ប្លន់ដ៏សកម្មនៅក្នុងរាជធានីភ្នំពេញនាពេលកន្លងមក ទើបកម្លាំងសមត្ថកិច្ចបានចុះប្រតិបត្តិការឃាត់ខ្លួនជនសង្ស័យទាំងនោះជាក់ស្តែងតែម្តង ។
នៅក្នុងហេតុការណ៍នេះដែរអ្នកសារព័ត៌មានចុះទៅយកព័ត៌មាននិងផ្តិតយករូបភាពសម្រាប់ធ្វើការចុះផ្សាយ ប៉ុន្តែត្រូវបានលោក យឹម ហួង ប្រធានផ្នែកព្រហ្មទណ្ឌខណ្ឌចំការមនបាន រារាំងចាប់ដៃមិនឱ្យអ្នកសារព័ត៌មានធ្វើការថតរូបនោះទេ ដូចជាមានអ្វីលាំងបាំងនិងករីណខាងលើនេះចឹង។
ទាក់ទងទៅនិងការដែលសមត្ថកិច្ចមិនឱ្យអ្នកសារព័ត៌មានថតរូបភាពពីសកម្មភាពឃាត់ខ្លួននេះត្រូវបានលោក យឹម ហួង ប្រធានផ្នែកព្រហ្មទណ្ឌខណ្ឌចំការមនបានប្រាប់ឱ្យដឹងថា សមត្ថកិច្ចខ្លាចបែកការណ៍ពីព្រោះពេលនេះសមត្ថកិច្ចកំពុងធ្វើការចឹងមិនមានអ្នកការសែតមកថតយកទៅផ្សារនោះទេ តែទោះជាយ៉ាងណាក៏សមត្ថកិច្ចនៅមិនទាន់អាចបញ្ចាក់ថា រាល់ការឃាត់ខ្លួនជនសង្ស័យខាងលើនេះពាក់ព័ន្ធករណីអ្វីនៅឡើយនោះទេ ?
