កំពង់ចាម: ក្រោយពីទទួលបានព័ត៌មានពីប្រជាពលរដ្ឋល្អ រាយការណ៍អំពីបទល្មើសនេសាទខុសច្បាប់ ដោយមានជនសង្ស័យប្រើប្រាស់នូវឧបករណ៍ និងធ្វើសកម្មភាពឆក់តាមដងទន្លេមេគង្គ លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានចាត់បញ្ជា លោកវរសេនីយ៍ឯក ស្រេង ធារី នាយការិយាល័យប្រឆាំងបទល្មើសសេដ្ឋកិច្ច និងដឹកនាំដោយលោកឧត្តមសេនីយ៍ត្រី អ៊ិត តារា ស្នងការរងទទួលការងារប្រឆាំងបទល្មើសសេដ្ឋកិច្ច នាព្រឹកថ្ងៃទី១៦ ខែវិច្ឆិកា ឆ្នាំ២០១៨នេះ បានចុះបង្ក្រាបបទល្មើសជលផល នៅចំណុច ភូមិចុងថ្នល់ទី១ សង្កាត់បឹងកុក ក្រុងកំពង់ចាម ខេត្តកំពង់ចាម។ 
សមត្ថកិច្ចបានឲ្យដឹងថា ជាលទ្ធផលក្នុងប្រតិបត្តិការណ៍នេះ កម្លាំងជំនាញដកហូតបានវុត្ថុតាងរួមមាន ឧបករណ៍ឆក់ត្រី ចំនួន ២ គ្រឿង (ក្នុងនោះមានក្តៅ ចំនួន ០១គ្រឿង និងត្រជាក់ ចំនួន ០១គ្រឿង) អាគុយ ចំនួន០២ ទូកម៉ាសុីន ចំនួន ០១គ្រឿង ដងឆក់ ចំនួន ០១គូរ និងត្រីចម្រុះ ចំនួន ៣០គីឡូក្រាម។ 
ជាមួយគ្នានោះសមត្ថកិច្ចបានធ្វើការឃាត់ខ្លួនជនសង្ស័យ ចំនួន០២នាក់: ១-ឈ្មោះ ថាំង លី ភេទប្រុស អាយុ៣៩ឆ្នាំ ជនជាតិវៀតណាម មានលំនៅភូមិចុងថ្នល់ទី១ សង្កាត់បឹងកុក ក្រុងកំពង់ចាម។ 
២-ឈ្មោះ គឹម នី ភេទប្រុស អាយុ៣៤ឆ្នាំ ជនជាតិខ្មែរ មានលំនៅភូមិចុងថ្នល់ទី១ សង្កាត់បឹងកុក ក្រុងកំពង់ចាម។ បច្ចុប្បន្ន ជនសង្ស័យទាំង២នាក់ រួមនឹងវុត្ថុតាង ត្រូវបានប្រគល់ជូនខណ្ឌរដ្ឋបាលជលផលខេត្តកំពង់ចាម ដើម្បីចាត់ការបន្តតាមនីតិវិធីច្បាប់៕
