កំពង់ធំ៖ ឧត្តមសេនីយ៍ទោ សោម ស៊ុន មេបញ្ជាការរងយោធភូមិភាគទី៤ និងជាមេបញ្ជាការតំបន់ប្រតិបត្តិការសឹករងកំពង់ធំ អមដំណើរដោយ ម្ចាស់អំណោយ ដែលជាសប្បុរសធម៌របស់លោកវិស្វករ ប៉ែន ដុល្លា និងភរិយា បានលះបង់ទ្រព្យសម្បត្តិផ្ទាល់ខ្លួន ចូលរួមក្នុងវិស័យមនុស្សធម៌ ជួយដល់ពលរដ្ឋក្រីក្រ ដែលខ្វះលទ្ធភាពសាងសង់ជម្រកស្នាក់នៅ បានសមរម្យ ទើបលោកបាន ជួយសាងសង់ផ្ទះថ្មីមួយខ្នងជូនដល់លោកយាយចាស់ជរាទុរគត់ជនទីទ័ល់ក្ររ។
លោកវិស្វករ ប៉ែន ដុល្លា និងភរិយា បានសាងសង់ថ្មីមួយខ្នង ដែលមានទំហំ ៥មx៤ម សាងសង់ខ្ពស់ផុតពីដី ដំបូលនិងជញ្ជាំងសង្កសី រនាបក្តារ ដែលបានចំណាយថវិកាក្នុងការសាងសង់អស់ទឹកប្រាក់ ចំនួន ១,២០០ដុល្លារ តាមរយៈ ឯកឧត្តម ឧត្តមសេនីយ៍ទោ សោម ស៊ុន ដើម្បីសាងសង់ជូនគ្រួសារទុរគត លោកយាយ ញ៉ក់ គឿន អាយុ ៦៧ ឆ្នាំ ដែលចិញ្ចឹមចៅកំព្រារ ចំនួន ០២ នាក់ រស់នៅភូមិពោធិតាអ៊ុន សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ ។
លោកយាយ ញ៉ក់ គឿន បានទទួលផ្ទះថ្មី នៅព្រឹកថ្ងៃទី ១៨ ខែវិច្ឆិកា ឆ្នាំ២០១៨ ដែលបានប្រគល់ជូនដោយ ឯកឧត្តម ឧត្តមសេនីយ៍ទោ សោម ស៊ុន និងក្រុមការងារ រួមទាំងបាននាំយកអំណោយរបស់សម្ដេចអគ្គមហាសេនាបតីតេជោ ហ៊ុន សែន តាមរយៈ ឯកឧត្តម ឧត្ដមសេនីយ៍ឯក បណ្ឌិត ហ៊ុនម៉ាណែត បានផ្តល់ជូនគាត់បន្ថែមទៀតមាន អង្ករចំនួន ៥០ គីគីឡូក្រាម , មីយើងចំនួន ០២ កេស , ទឹកត្រីទឹកស៊ីអ៊ីវចំនួន ០២ យួរ និងថវិកាចំនួន ៣៥០,០០០ រៀល។ 
ឯកឧត្តម ឧត្តមសេនីយ៍ទោ សោម ស៊ុន បានសម្តែងនូវការគោរពដឹងគុណ ពីបងប្អូនប្រជាពលរដ្ឋ ដែលបានអញ្ជើញទៅបំពាញកាតព្វកិច្ច ជាពលរដ្ឋល្អ ក្នុងការទៅបោះឆ្នោត និងបានគាំទ្រសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ឲ្យមានលទ្ទភាពដើម្បីបន្តដឹកនំា នាវាកម្ពុជា រក្សាបានសន្តិភាព និងការអភិវឌ្ឍបន្តទៀត និងបានថ្លែងអំណរគុណចំពោះលោកវិស្វករ ប៉ែន ដុល្លា ដែលបានចំណាយថវិកា ផ្ទាល់ខ្លួន ចូលរួមក្នុងវិស័យមនុស្សធម៌ដែលកន្លងមកលោកតែងតែជួយឧបត្ថម្ភដល់បញ្ជាការដ្ឋានតំបន់ប្រតិបត្តិការសឹករងកំពង់ធំ ជាបន្ត បន្ទាប់ និងបានសាងសង់ផ្ទះថ្មីជូនជនក្រីក្រ ដែលមានជម្រកស្នាក់នៅមិនសមរម្យនៅពេលនេះជាដើម ក្នុងនោះអាជ្ញាធរដែនដី កងកម្លាំងប្រដាប់អាវុធ និងប្រជាពលរដ្ឋ មានការរីករាយ និងអបអរសាទរចំពោះលោកយាយញ៉ក់ គឿន ដែលបានទទួលផ្ទះថ្មីនៅថ្ងៃនេះ និងសូមបួងសួងសុំឲ្យអំពីល្អ និងការជួយ យកអាសាគ្នាទៅវិញទៅមក ស្ថិតនៅក្នុងដួងចិត្តកូនខ្មែរគ្រប់រូប ។
ដោយ ប៊ុន រដ្ឋា
