ស្វាយរៀងៈ បុរសជាមេភូមិម្នាក់ត្រូវរថយន្តម៉ាក Kia ដឹកកម្មករមួយគ្រឿងបុកលាន់សូរដូចរន្ទះ ហោះបុកនិងកញ្ចក់រថយន្ត ធ្លាក់បត់ករលើម៉ូតូ 
បណ្តាលឲ្យរងរបួសជាទម្ងន់ ហើយបានបាត់បង់ជីវិត ខណៈបញ្ជូនទៅសង្គ្រោះដល់មន្ទីរពេទ្យខេត្តស្វាយរៀង ។
ហេតុការណ៍គ្រោះថ្នាក់នេះ បានកើតឡើងកាលពីថ្ងៃទី ២០ ខែវិច្ឆិកា ឆ្នាំ២០១៨ វេលាម៉ោង ១៨និង៣០ នាទីយប់ ស្ថិតនៅលើផ្លូវបំបែកលេខ ៣១៥ ភូមិ ព្រៃឆ្លាក់ សង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង ។
ប្រភពពីសមត្ថកិច្ចមូលដ្ឋានបានប្រាប់ឲ្យដឹងថា រថយន្ដម៉ាក Kia ពណ៌ស ពាក់ស្លាកលេខ សៀមរាប ៣A ០១១៩ បើកបរពីត្បូងទៅជើង ហើយអ្នកបើកបរមិនត្រូវបានគេស្គាល់អត្ដសញ្ញាណនោះឡើយ បានរត់គេចខ្លួនបាត់ស្រមោល ពីកន្លែងកើតហេតុភ្លាមៗ ដោយបន្សល់ទុកតែរថយន្ដនៅកន្លែងកើតហេតុប៉ុណ្ណោះ ។ រីឯម៉ូតូវិញ ម៉ាក គុបមូល ពណ៌ សំបកឪឡឹក គ្មានស្លាកលេខ បើកបរដោយឈ្មោះ ម៉ៅ ខេម ភេទប្រុស អាយុ ៦៥ ឆ្នាំ មុខរបរ មេភូមិមេលោង រស់នៅភូមិ មេលោង សង្កាត់ចេក ក្រុងស្វាយរៀង ខេត្តស្វាយរៀង បើកបរពីកើតទៅលិច រងរបួសធ្ងន់ (ស្លាប់ពេលបញ្ជូនដល់មន្ទីរពេទ្យខេត្តស្វាយរៀង) ហើយម៉ូតូខូចខាតយ៉ាងដំណំ ។
ក្រោយកើតហេតុ សមត្ថកិច្ចជំនាញបានចុះវាស់វែង ហើយ មធ្យោបាយយានយន្ត ទៅរក្សាទុកនៅករិយាល័យចរាចរណ៍ខេត្តស្វាយរៀង ខណៈដែលសាកសព ត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ។
ទាក់ទងករណីគ្រោះថ្នាក់ចរាចរណ៍មួយករណីខាងលើនេះ សមត្ថកិច្ចអះអាងពីមូលហេតុថា បណ្តាលមកពីខាងម៉ូតូ មិនគោរពសិទ្ធិអាទិភាព ៕
