កំពង់ចាម: ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម អមដំណើរដោយមន្ត្រីរាជការ នារសៀលថ្ងៃទី២៨ ខែវិច្ឆិកា ឆ្នាំ២០១៨នេះ បានអញ្ជើញចុះជួបសំណេះសំណាលសាកសួរសុខទុក្ខ និងនាំយកអំណោយមួយចំនួនឧបត្ថម្ភ ជូនដល់ក្រុមកីឡាករចំណុះទូក ង ឈ្មោះ មហាបទុមរតនដីដុះសែនជ័យ របស់វត្តបទុមរតនដីដុះ ស្ថិតនៅក្នុងសង្កាត់វាលវង់ ក្រុងកំពង់ចាម ខេត្តកំពង់ចាម ដែលបានចូលរួមប្រកួត ក្នុងព្រះរាជពិធីបុណ្យអុំទូក អកអំបុក សំពះព្រះខែ និងបណ្តែតប្រទីប កាលពីថ្ងៃទី២១ ២២ ២៣ នៅរាជធានីភ្នំពេញ។
ឆ្លៀតក្នុងឱកាសនោះដែរ ឯកឧត្ដម គួច ចំរើន អភិបាលខេត្តកំពង់ចាម បានលើកទឹកចិត្តនិងកោតសសើរចំពោះការលះបង់តស៊ូ ខិតខំប្រឹងប្រែង សាមគ្គីភាពគ្នារហូតឈានដល់ទទួលបានជយជម្នះ ធ្វើឲ្យខេត្តកំពង់ចាមមានមុខមាត់ ក្នុងពិធីបុណ្យជាតិប្រពៃណីខ្មែរយើង ធ្វើឲ្យការដើរលេងកម្សាន្ត មានភាពសប្បាយរីករាយ ក្រោមដំបូងនៃសុខសន្តិភាព។ 
ជាមួយគ្នានោះ គណៈកម្មការទូក ង ឈ្មោះបទុមរតនដីដុះសែនជ័យ ក៏បានថ្លែងអំណរគុណចំពោះ ឯកឧត្តម គួច ចំរើន អភិបាលខេត្តកំពង់ចាម និងលោកជំទាវ ដែលបានឧបម្ភត្តនូវឯកសណ្ឋាន គ្រឿងឧបភោគ អាហារហូបចុកទាំងបីថ្ងៃ នៃព្រះរាជពិធីបុណ្យអុំទូក អកអំបុក សំពះព្រះខែ និង បណ្តែតប្រទីប សម្រាប់បងប្អូនកីឡាករចំណុះទូក ង រហូតឈានដល់ទទួលបានជយលាភី និងការនាំយកអំណោយមកផ្តល់ជូនបងប្អូនកីឡាករក្នុងពេលនេះផងដែរ ៕
