កំពង់ចាម: ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម បានដឹកនាំកិច្ចប្រជុំពិភាក្សាការងារ ស្តីពីការ រៀបចំការតាំងពិពរណ៍បង្ហាញសមិទ្ធិផលគម្រោងអភិវឌ្ឍន៍សំខាន់ៗរបស់ខេត្តកំពង់ចាម ក្នុងពិធីសម្ពោធវិមាន អនុស្សាវរីយ៍នយោបាយ ឈ្នះ ឈ្នះ និងការរៀបចំ ខួបអនុស្សាវរីយ៍លើកទី៤០ នៃទិវាជ័យជម្នះ៧មករា ដែលពិធីនេះត្រូវបានធ្វើឡើងនាព្រឹកថ្ងៃព្រហស្បតិ៍ ៧ រោច ខែកត្តិក ឆ្នាំច សំរឹទ្ធិស័កពុទ្ធសករាជ២៥៦២ ត្រូវនឹងថ្ងៃទី២៩ ខែវិច្ឆិកា ឆ្នាំ២០១៨ នៅសាលប្រជុំសាលាខេត្តកំពង់ចាម ដោយមានការអញ្ជើញចូលរួមពីឯកឧត្តម លោកជំទាវ លោក លោកស្រី មន្ទីរអង្គភាពពាក់ព័ន្ធជុំវិញខេត្តជាច្រើនផងដែរ។
ឯកឧត្តម គួច ចំរើន អភិបាលខេត្តកំពង់ចាម បានថ្លែងថា រូបគំនូរព្រាងរថយន្តដង្ហែក្បួនព្យុហយាត្រាត្រៀមសម្រាប់អបអរសាទរ ខួបអនុស្សាវរីយ៍លើកទី៤០ ទិវាជ័យជម្នះ ៧មករា ឆ្នាំ១៩៧៩-២០១៨ របស់ខេត្តកំពង់ចាម គួរត្រូវយករូបភាពប្រាសាទនគរបាជ័យ ដោយប្រាសាទនគរបាជ័យ បានបង្ហាញឲ្យឃើញនូវភាពវ័យចំណាស់ នៃខេត្តកំពង់ចាម ដែលមានការរីកចម្រើនយ៉ាងខ្លាំងនាសម័យមហានគរ និងជាប្រាសាទបុរាណមួយដែលបានសាងសង់ឡើង នៅចុងសតវត្សទី១២ ដោយព្រះបាទជ័យវរ្ម័នទី៧ តាមរចនាបថបាយ័ន ដើម្បីឧទ្ទិសដល់ព្រះពុទ្ធសាសនាមហាយាន នៅ
ក្នុងបរិវេណប្រាសាទមានសសរពេជ្រខ្ពស់ៗ ឈរទប់ទ្រផ្កែរប្រាសាទយ៉ាងរឹងមាំ រីឯទ្វារទាំង៤ទិសរបស់ប្រាសាទ ដែលអមដោយជញ្ជាំងទាំងឡាយក៏នៅរឹងមាំ។ ទស្សនៈវិស័យដើមនៃសំណង់ប្រាសាទនេះ គឺឧទ្ទិសដល់ព្រះពុទ្ធសាសនា និងព្រហ្មញសាសនា រហូតមកដល់បច្ចុប្បន្នស្ថានភាពប្រាសាទនេះ គឺនៅរឹងមាំល្អ ផ្ទាំងសិលាចារឹក និងចម្លាក់នានាស្ថិតនៅក្នុងលំនាំដើមទាំងអស់ ចំណែកសំណង់ព្រះវិហារព្រះពុទ្ធសាសនា ដែលស្ថាបនាក្រោយសម័យអង្គរនោះក៏ស្ថិតនៅល្អតាមលំនាំស្ថាបត្យកម្មដើមផងដែរ។
ជាមួយគ្នានោះ ឯកឧត្តម អភិបាលខេត្តបានបញ្ជាក់ថា ការដាក់តាំងបង្ហាញពិព័រណ៍ ពីសមិទ្ធផលក្នុងខេត្តនាឱកាសនោះដែរ គឺដើម្បីឆ្លើយតបនឹងការរីកចម្រើនរបស់ខេត្តដែលបានធ្វើការអភិវឌ្ឍន៍ រយៈពេល២០ឆ្នាំចុងក្រោយ ក្រោមការដឹកនាំរបស់សម្តចតេជោ ហ៊ុន សែន នាយករដ្ឋមន្ត្រី ធ្វើឱ្យ ប្រទេសជាតិមានសុខសន្តិភាព និងការអភិវឌ្ឍលើគ្រប់វិស័យ និងចង់បង្ហាញអំពី សក្ដានុពលដែលជាប្រភពចំណូលក្នុងការយកមកធ្វើការអភិវឌ្ឍរបស់ខេត្តរួមមាន វិស័យ សេដ្ឋកិច្ច ទេសចរណ៍ និងឧស្សាហកម្មដើម្បីជូនដល់ប្រជាពលរដ្ឋនៅទូទាំង ប្រទេសបានទស្សនានិងបានឈ្វេងយល់អំពីសក្ដានុពលដែលខេត្តមានផងដែរ ៕
