កំពង់ចាម: ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម អមដំណើរដោយប្រធានមន្ទីរអប់រំយុវជននិងកីឡា និងមន្ត្រីពាក់ព័ន្ធ នាព្រឹកថ្ងៃទី៣០ ខែវិច្ឆិកា ឆ្នាំ២០១៨នេះ បានអញ្ជើញ បើកវិញ្ញាសារប្រឡងជ្រើសរើសគ្រូបង្រៀន កម្រិតបឋមសិក្សា និងមត្តេយ្យសិក្សា នៅក្នុងសាលាគរុកោសល្យភូមិភាគ ខេត្តកំពង់ចាម។ 
ឆ្លៀតក្នុងឱកាសនោះដែរ ឯកឧត្ដម គួច ចំរើន អភិបាលខេត្តកំពង់ចាម បានថ្លែងថា បច្ចុប្បន្ននេះរាជរដ្ឋាភិបាលកម្ពុជា បានកំណែទម្រង់លើវិស័យអប់រំ ដោយផ្តោតលើការប្រឡងឲ្យមានតម្លាភាព ដូច្នេះគ្រប់វិញ្ញាទាំងអស់សុទ្ធតែ បានរៀបចំទុកដាក់យ៉ាងត្រឹមត្រូវ និងនាំយកមក ឲ្យក្មួយៗដែលជាបេក្ខជន បានត្រួតពិនិត្យជាមុនរួចរាល់សិន ហើយបានកាត់បើកវិញ្ញាសារនេះ នៅចំពោះមុខបេក្ខជនតែម្តង ធ្វើយ៉ាងនេះ ដើម្បីផ្តល់នូវភាពយុតិធម៌ ដល់ក្មួយៗបេក្ខជនទាំងអស់ ក្នុងការប្រឡងប្រជែងចូលបម្រើការងារជាមន្ត្រីរាជការ ដោយពឹងអាងលើសមត្ថភាពផ្ទាល់ខ្លួន។ ទាំងនេះគឺជាការខិតខំរបស់រាជរដ្ឋាភិបាល ក៏ដូចជាមន្ត្រីអាជ្ញាធរ បានអនុវត្តន៍នូវគោលការតម្លាភាពឲ្យបានត្រឹមត្រូវ ក្នុងគោលបំណងធ្វើយ៉ាងណាដើម្បីឲ្យក្មួយៗ ដែលចូលរួមប្រឡងទទួលបានយុត្តិធម៌ផងដែរ។ 
ជាមួយគ្នានោះ ឯកឧត្ដម អភិបាលខេត្ត ក៏បានផ្តាំផ្ញើដល់ក្មួយៗបេក្ខជន បេក្ខនារីទាំងអស់ធ្វើយ៉ាងណាត្រូវខិតខំប្រឹងប្រែងព្យាយាមប្រឡង ឲ្យអស់ពីសមត្ថភាពដែលខ្លួនមាន ដើម្បីទទួលបានលទ្ធផលល្អក្នុងឱកាសនៃការប្រឡងនេះផងដែរ។
លោក លី ម៉េងសាន ប្រធានមន្ទីរអប់រំយុវជននិងកីឡាខេត្តកំពង់ចាម បានឲ្យដឹងថា ស្ថិតិបេក្ខជនសរុបរួមមាន ៣៣១៧នាក់ ក្នុងនោះមានស្រី ២៤១០នាក់ ដែលបានដាក់ពាក្យប្រឡងជ្រើសរើសគ្រូបង្រៀនបឋមសិក្សា-មត្តេយ្យសិក្សា តាមប្រព័ន្ធបណ្តុះបណ្តាល ១២+៤ និង១២+២ ទៅតាមបណ្ដាស្រុកទាំង៩ ដែលបេក្ខជនបានជ្រើសរើស នៅទូទាំងខេត្តកំពង់ចាម លើកលែងតែក្រុងកំពង់ចាម។
មណ្ឌលប្រឡង មានចំនួន៧មណ្ឌល ក្នុងនោះតាមប្រព័ន្ធបណ្តុះបណ្តាល ១២+៤ និង១២+២
ដែលមាន ១.មណ្ឌលវិទ្យាល័យព្រះសីហនុ មានចំនួន២០បន្ទប់ បេក្ខជន(១២+២) ៥០០នាក់ ជ្រើសរើសស្រុកកោះសូទិន ស្រីសន្ធរ និងជើងព្រៃ។ ២.មណ្ឌលវិទ្យាល័យតេជោបឹងកុក មានចំនួន២០បន្ទប់ បេក្ខជន(១២+២) ៥០០នាក់ ជ្រើសរើសស្រុកជើងព្រៃ និងស្រុកព្រៃឈរ។
៣.មណ្ឌលវិទ្យាល័យដីដុះ មានចំនួន២០បន្ទប់ បេក្ខជន(១២+២) ៥០០នាក់ ជ្រើសរើសស្រុកព្រៃឈរ កងមាស និងស្រុកបាធាយ។ 
៤.មណ្ឌលបឋមឧត្តរ មានចំនួន២០បន្ទប់ បេក្ខជន(១២+២) ៥០០នាក់ ជ្រើសរើសស្រុកបាធាយ និងស្រុកចំការលើ។ ៥.មណ្ឌលអនុវិទ្យាល័យទួលថ្ម មានចំនួន២០បន្ទប់ បេក្ខជន(១២+២) ៥០០នាក់ ជ្រើសរើសស្រុកចំការលើ កំពង់សៀម និងស្រុកស្ទឹងត្រង់។ ៦.មណ្ឌលសាលាគរុកោសល្យ និងវិក្រឹតការខេត្ត មានចំនួន២០បន្ទប់ បេក្ខជនបឋម(១២+២) ៣១១នាក់ ជ្រើសរើសស្រុកស្ទឹងត្រង់ និងបេក្ខជនមត្តេយ្យ ជ្រើសរើសស្រុកកោះសូទិន ស្រីសន្ធរ ជើងព្រៃ ព្រៃឈរ និងស្រុកកងមាស។ ៧.មណ្ឌលមជ្ឈមណ្ឌលគរុកោសល្យភូមិភាគ មានចំនួន១៤បន្ទប់ បេក្ខជនបឋមសិក្សា(១២+៤) ១២៧នាក់ គ្រប់ស្រុកទាំង៩ និងបេក្ខជនមត្តេយ្យសិក្សាជ្រើសរើសស្រុកបាធាយ ចំការលើ កំពង់សៀម និងស្រុកស្ទឹងត្រង់។ ដោយឡែកគណៈមេប្រយោគក្នុងខេត្តសរុបមានចំនួន៣៩៧នាក់ ផងដែរ ៕
