កំពង់ចាម: ធូរ៉េន បែកអន្លូង នឹងកាន់តែល្បីល្បាញ នៅពេលដែលកសិករទាំង៩០នាក់ ឯកភាពគ្នា បង្កើតជាសហគមន៍ នេះជាការថ្លែងរបស់ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម គ្រាដែលលោកបានដឹកនាំមន្ត្រីជំនាញ នៃមន្ទីរកសិកម្ម រុក្ខាប្រមាញ់ និងនេសាទ អញ្ជើញចុះជួបសំណេះសំណាល ជាមួយប្រជាកសិករប្រមាណជា៩០គ្រួសារ ដែលធូរ៉េនរបស់ពួកគាត់កំពុងមានបញ្ហា ស្ថិតនៅក្នុងភូមិគីឡូ១០ ឃុំអារក្សត្នោត ស្រុកស្ទឹងត្រង់ ខេត្តកំពង់ចាម កាលពីព្រឹកថ្ងៃទី១១ ខែធ្នូ ឆ្នាំ២០១៨ ។ 
ឯកឧត្ដម គួច ចំរើន អភិបាលខេត្តកំពង់ចាម បានថ្លែងថា ការបង្កើតសហគមន៍ឡើង គឺមានផលប្រយោជន៍ជាច្រើន សម្រាប់កសិករយើង ដែលអាចផ្តល់ព័ត៌មានឲ្យមន្ត្រីជំនាញ ចុះជួយសង្គ្រោះផលដំណាំបងប្អូនបានទាន់ពេលវេលា នៅពេលដែលជួបបញ្ហាផ្សេងៗ ដូចជាមេរោគផ្សិតកំពុងតែវាយលុកដំណាំធូរ៉េនបងប្អូនក្នុងពេលនេះ ពិសេសជាងនេះទៀតនោះ គឺធូរ៉េនបែកអន្លូងនឹងកាន់តែមានភាពល្បីល្បាញ ដោយពុំមានអ្នកយកធូរ៉េនផ្សេងមកក្លែងបន្លំបានទៀតឡើយ។ ហើយក៏អាចកែប្រែតំបន់ចំការធូរ៉េនទាំងមូល ឲ្យក្លាយទៅជា តំបន់កសិកម្មទេសចរណ៍ ដើម្បីទាក់ទាញភ្ញៀវទេសចរណ៍ មកទស្សនាកំសាន្ត ដែលជាឱកាស សម្រាប់សហគមន៍យើង រកប្រាក់កម្រៃផងដែរ។
បើយោងតាមរបាយការណ៍របស់លោក គឹម សាវឿន ប្រធានមន្ទីរ កសិកម្ម រុក្ខាប្រមាញ់ និងនេសាទ ខេត្តកំពង់ចាម បានឲ្យដឹងថា នៅក្នុងស្រុកស្ទឹងត្រង់ មានផ្ទៃដីដាំធូរ៉េន ចំនួន ៣០៣,៧៨ហិកតា ក្នុងនោះ ធូរ៉េន ដែលដល់អាយុត្រូវប្រមូលផលមានផ្ទៃដី ២៣០,៥០ហិកតា ដោយក្នុង១ឆ្នាំៗមានតែជាង២ខែទេ ដែលម្ចាស់ចំការធូរ៉េនបែកអន្លូងត្រូវទទួលផល ៕
