អ៊ីរ៉ង់ ៖ សារព័ត៌មាន Channel News Asia ចេញផ្សាយ ថ្ងៃទី២៦ ខែមិថុនា នេះ បានឲ្យដឹងថា រដ្ឋា ភិបាលអ៊ីរ៉ង់ បានស្នើឲ្យមានសំណើដ៏សមហេតុផលមួយ ទាក់ទងនឹងកិច្ចពិភាក្សាវិបត្តិនុយក្លេអែរ ដោយ លើកឡើងថា ការទាមទាររបស់ប្រទេស
មហាអំណាច ដែលជាសមាជិកអចិន្ទ្រៃ នៃក្រុមប្រឹក្សាសន្តិសុខអង្គការសហប្រជាជាតិ រួមជាមួយប្រទេស អាឡឺម៉ង ហៅកាត់ថា P5+1 ហាក់មានបំណងរារាំង មិនឲ្យ កិច្ចព្រមព្រៀង ត្រូវបានធ្វើឡើងឡើយ ។ នេះបើយោងតាម ការលើកឡើងរបស់រដ្ឋមន្ត្រីការបរទេស អ៊ីរ៉ង់ នាថ្ងៃព្រហស្បតិ៍នេះ ។
លោក Javad Zarif រដ្ឋមន្ត្រីការបរទេសអ៊ីរ៉ង់ បានលើកឡើងថា រដ្ឋាភិបាលរបស់លោក បានត្រៀមជា ស្រេច ចំពោះការស្វែងរកដំណោះស្រាយ និងសំណើដ៏សមរម្យមួយ។ ប៉ុន្តែការទាមទាររបស់ដៃគូពិភា ក្សារបស់លោក មានលក្ខណៈហួសហេតុ ហាក់មានបំណងចង់រារាំងមិនឲ្យមានដំណោះស្រាយណា មួយកើតឡើងទៅវិញ ។ លោកបន្តថា នៅក្នុងស្ថានភាពនេះ ពិភពលោកអាចដឹងថា តើភាគីណាមួយ ដែលបង្កការរារាំង ក្នុងដំណើរការ នៃកិច្ចពិភាក្សាក្នុងវិបត្តិនុយក្លេអែរនេះ ។
សូមបញ្ជាក់ថា អ៊ីរ៉ង់បានបដិសេធ ចំពោះការចោទប្រកាន់ថា បានផលិតអាវុធនុយក្លេអែរ ដោយបាន ស្នើឲ្យអាម៉េរិក និងលោកខាងលិច ដកទណ្ឌកម្មចេញ ស្របពេលដែលក្រុមប្រទេស P5+1 កំពុង ព្យាយាម ស្វែងរកដំណោះស្រាយមួយ ឲ្យបាននៅខែកក្កដាក្រោយ ដើម្បីរារាំងល្បឿន នៃកម្មវិធីអាវុធ នុយក្លេអែររបស់អ៊ីរ៉ង់ និងដើម្បីកាត់បន្ថយការព្រួយបារម្ភថា សាធារណរដ្ឋអ៊ីស្លាមមួយនេះ នឹងផលិតអាវុធអាតូមិក ក្នុងពេលឆាប់ៗខាងមុខ ៕
