កំពង់ធំ៖ ឯកឧត្តម ឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជាខេត្តកំពង់ធំ អមដំណើរដោយលោក ម៉ាក ប៊ុនហុង អភិបាលក្រុងស្ទឹងសែន ប្រធានកិត្តិយសសមាគមអតីតយុទ្ធជនកម្ពុជា ក្រុងស្ទឹងសែន បានដឹកនាំសហការី រួមជាមួយអាជ្ញាធរ ភូមិ-សង្កាត់ បានឆ្លៀតឳកាសចុះសួរសុខទុក្ខអតីតយុទ្ធជនពិការ ០១ គ្រួសារ រស់នៅភូមិពោធិ៍បាក់ក សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ ។
ការចុះសាកសួរសុខទុក្ខអតីតយុទ្ធជនពិការ ដែលជាអតីតពលទោ ជួន វន អាយុ ៥៧ឆ្នាំ បានធ្វើឡើងនៅ ថ្ងៃទី៣០ ខែធ្នូ ឆ្នាំ ២០១៨ អតីតយុទ្ធជន ធ្លាប់ចូលបម្រើក្នុងជួរកងទ័ពនៅថ្ងៃទី១៥ ខែ ឧសភា ឆ្នាំ១៩៨៥ នៅអង្គភាពវរសេនាតូចលេខ៥៥ នៃយោធាខេត្តកំពង់ធំ ហើយបានត្រូវរបួសដាច់ជើងខាងឆ្វេងត្រឹមភ្លៅ នៅសមរភូមិតំបន់អូរកូនមាន់តាមបណ្ដោយដងស្ទឹងសែនខេត្តកំពង់ធំ នៅឆ្នាំ១៩៨៦ ។
លោកពលទោ ជួន វន មានភរិយាឈ្មោះ ជា ឡូន អាយុ៦០ ឆ្នាំ មានកូនចំនួន ០២ នាក់ ពុំមានប្រកបមុខរបរអ្វីទេ ដោយសារមានជម្ងឺប្រចាំកាយទាំងពីរនាក់ភរិយា (ពីមុនប្រកបមុខរបរប៉ះកង់) ហើយមានជីវភាពលំបាកខ្វះខាត ដោយរស់នៅជាមួយកូន ដែលប្រកបរបរលក់ជី និងបន្លែបង្ការផ្សេងៗ គ្រាន់បានប្រាក់ចិញ្ចឹមជីវិត គួបផ្សំនិងប្រាក់បៀវត្សប្រចាំខែដែលរាជរដ្ឋាភិបាលផ្តល់ជូនចំនួន៤១០,០០០ ៛ផងដែរ ។
ឧត្តមសេនីយ៍ទោ សោម ស៊ុន មេបញ្ជាការរង យោធភូមិភាគទី៤ មេបញ្ជាការតំបន់ប្រតិបត្តិការសឹករងកំពង់ធំ បានមានប្រសាសន៍ថា ដោយទទួលបានព័ត៌មាន ពីជីវភាពរស់នៅ របស់អតីតយុទ្ធជនពិការ ដែលកំពុងតែ ជួបនឹងការលំបាកខ្វះខាត ទើបឆ្លៀតឳកាស នាំយកអំណោយរបស់សម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជនកម្ពុជា តាមរយៈ ឯកឧត្តម ឧត្ដមសេនីយ៍ឯក បណ្ឌិត ហ៊ុន ម៉ាណែត អគ្គលេខាធិការរងសមាគមអតីតយុទ្ធជនកម្ពុជា នូវអង្ករចំនួន ៥០ គីគីឡូក្រាម , មីយើងចំនួន ០២ កេស , ទឹកត្រី ទឹកស៊ីអ៊ីវចំនួន ០២ យួរ និងថវិកាចំនួន ២០០,០០០ រៀល ។
អាជ្ញាធរនិងប្រជាពលរដ្ឋរួមទាំងក្រុមគ្រួសារអតីតយុទ្ធជន បានថ្លែងអំណរគុណសម្តេចតេជោ ហ៊ុន សែន ដែលបានបង្កើតសមាគមអតីតយុទ្ធជនកម្ពុជា សម្រាប់ជួយដល់គ្រួសារអតីតយុទ្ធជនគ្រប់រូប ដោយមិនបាន បោះបង់ចោល ឬមិនអើពើនោះឡើយ ធ្វើឲ្យក្រុមគ្រួសារអតីតយុទ្ធជន ទទួលបាននូវភាពកក់ក្តៅ ពីក្រុមការងារសមាគមរបស់សម្តេច ដែលប្រចាំនៅតាមរាជធានីខេត្តក្រុង ជាពិសេសអាជ្ញាធរមូលដ្ឋាន ។
ដោយ ប៊ុន រដ្ឋា
