កំពង់ធំ៖ ប្រជាពលរដ្ឋ២គ្រួសារ ដែលមានជីវភាពទីទ័ល់ក្រ និងកំពុងតែមានជំងឺប្រចាំកាយ នៅស្រុកប្រាសាទបល្ល័ង្ល ត្រូវបាន ឯកឧត្តម ឧត្តមសេនីយ៍ទោ សោម ស៊ុន មេបញ្ជាការរងយោធភូមិភាគទី៤ និងជា មេបញ្ជាការតំបន់ប្រតិបត្តិការសឹករងកំពង់ធំ ដឹកនាំសហការី អមដំណើរដោយ លោកវរសេនីយ៍ឯក ផល ធឿន អធិការដ្ឋាន នគរបាលស្រុកប្រាសាទបល្ល័ង្ក រួមជាមួយអាជ្ញាធរដែនដីចុះសួរសុខទុក្ខនៅរសៀលថ្ងៃទី ៤ ខែមករា ឆ្នាំ ២០១៩ ។
ប្រជាពលរដ្ឋដែលមានជំងឺប្រចាំកាយ និងត្រូវបានចុះសួរសុខទុក្ខ មានឈ្មោះ ដៀប ហូយ អាយុ ៨៤ ឆ្នាំ មានរាងកាយស្គម នៅសល់តែស្បែកដណ្ដប់ឆ្អឹង ដោយសារមានជម្ងឺរាំរ៉ៃប្រចាំកាយ ជាបុរសពោះម៉ាយ ដោយភរិយាទទួលមរណភាពចោល បន្សល់កូនប្រុសម្នាក់នៅថែរក្សាគាត់ បច្ចុប្បន្នរស់នៅភូមិវាលល្ពាក់ ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ ។
ចំណែកគ្រួសារទី២ គឺលោកតា រស់ យួន អាយុ ៦៥ ឆ្នាំ មានជម្ងឺប្រចាំកាយ វះកាត់ពោះវៀនដុះសាច់ ជាបុរសពោះម៉ាយត្រូវបានភរិយាទទួលមរណភាពចោល បច្ចុប្បន្នរស់នៅជាមួយកូន២ នាក់ ដែលមានជីវភាពក្រីក្រលំបាក ក្នុងនោះមានកូនស្រីម្នាក់ជាជនពិការជើង មិនអាចប្រកបមុខរបរអ្វីបាន បច្ចុប្បន្នរស់នៅភូមិខ្មាក់ ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ ។
ឯកឧត្តម ឧត្តមសេនីយ៍ទោ សោម ស៊ុន បានពាំនាំនូវប្រសាសន៍ផ្តាំផ្ញើរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជូនដល់បងប្អូនប្រជាពលរដ្ឋទាំងអស់ត្រូវចេះថែរក្សាសុខភាព ក្នុងរដូវរងារនេះ រាល់ប្រជាពលរដ្ឋដែលជួបការលំបាក ត្រូវជួយដោះស្រាយជូនពួកគាត់ភ្លាមៗទៅតាមលទ្ធភាព ដោយមិនទុកឲ្យប្រជាពលរដ្ឋណាម្នាក់ស្លាប់ដោយសារអត់អាហារនោះទេ និងបានថ្លែងអំណរគុណដល់បងប្អូនប្រជាជន ដែលបានបំពេញកាតព្វកិច្ចជាពលរដ្ឋដ៏ល្អក្នុងការចូលរួមបោះឆ្នោតគាំទ្រសម្តេចតេជោ ហ៊ុន សែន ធ្វើជានាយករដ្ឋមន្ត្រី ដើម្បីដឹកនាំប្រទេសបន្តទៀត ក្នុងគោលការណ៍សន្តិភាព និងការអភិវឌ្ឍ និងសូមជូនពរដល់បងប្អូនប្រជាពលរដ្ឋទាំងអស់ក្នុងឱកាស ចូលឆ្នាំថ្មី ឆ្នាំសកល ២០១៩ សូមប្រកបរបររកទទួលទានមាន បាន មាស ប្រាក់ ហូរចូលច្រើនៗ និងជួបប្រទះតែនឹងពុទ្ធិពរ បួន ប្រការ។
ក្នុងឳកាសចុះសួរសុខទុក្ខនេះ ក្រុមការងារ បាននាំយកអំណោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី តាមរយៈ ឯកឧត្ដម ឧត្ដមសេនីយ៍ឯក បណ្ឌិត ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងទ័ពជើងគោក ឧបត្ថម្ភជូនគាត់ក្នុងមួយគ្រួសារទទួលបាន អង្ករចំនួន ៥០ គីឡូក្រាម , មីយើងចំនួន ០២ កេស , ទឹកត្រីទឹកស៊ីអ៊ីវចំនួន ២យួរ និងមុងជ្រលក់ថ្នាំ ចំនួន ០១ ក្នុងនោះលោកតា ដៀប ហួយ ទទួលបានថវិកា ចំនួន ១០០,០០០ រៀល និងលោកតា រស់ យួន ទទួលបានថវិកា ចំនួន ១៥០,០០០ រៀល ផងដែរ ។
ដោយ ប៊ុន រដ្ឋា
