ក្រចេះ : ប្រជាជនកម្ពុជាទូទាំងប្រទេស ពិតជាមិនអាចបំភ្លេចបានឡើយ នូវអតីតកាលដ៏ងងឹតសូន្យសុង ដែលពោរពេញទៅដោយទុក្ខវេទនា ការឈឺចាប់ខ្លោចផ្សា និរាសព្រាត់ប្រាស់ ក្នុងរយៈពេល៣ឆ្នាំ ៨ខែ និង២០ថ្ងៃ ក្រោមរបបកម្ពុជាប្រជាធិបតេយ្យខ្មែរក្រហម ។
ដោយឡែកប្រជាពលរដ្ឋ រួមនឹងអាជីវករ លោកគ្រូ អ្នកគ្រូ និងសិស្សានុសិស្ស នៅក្នុងខេត្តក្រចេះ នៅថ្ងៃទី០៥ ខែមករា ឆ្នាំ២០១៩នេះបានលើកឡើងដូចៗគ្នាថា «៧មករា ជាថ្ងៃកំណើតទីពីររបស់ប្រជាពលរដ្ឋខ្មែរដែលរួចផុតពីរបបប៉ុលពត» និងមានអត្ថន័យយ៉ាងជ្រាលជ្រៅបំផុតចំពោះប្រជាពលរដ្ឋខ្មែរ ជាពិសេសបានផ្លាស់ប្តូរជីវិតរបស់ប្រជាជនពីនរក មកជាមនុស្សមនា មានសិទ្ធិសេរីភាពគ្រប់សព្វបែបយ៉ាង។
ពួកគាត់ថាក្នុងនាមជាប្រជាជនកម្ពុជាមិនគួរមើលរំលងថ្ងៃជ័យជម្នះ៧មករាឆ្នាំ១៩៧៩នោះទេ ព្រោះជាថ្ងៃដែលធ្វើឲ្យប្រជាជនខ្មែរទូទាំងប្រទេសរួចផុតពីរបបប្រល័យពូជសាសន៍កម្ពុជាប្រជាធិបតេយ្យ ដែលជារបបដែលកាប់ សម្លាប់ប្រជាជនខ្លួនឯងយ៉ាងព្រៃផ្សៃនោះ។
ពួកគាត់ថា ដោយសារមានស្ថាបនិកសម្តេចអគ្គមហាធម្មពោធិសាល ជា ស៊ីម សម្តេចអគ្គមហាពញាចក្រី ហេង សំរិន សម្តេចអគ្គមហា សេនាបតីតេជោ ហ៊ុន សែន រួមនិងវីរជនខ្មែរ បានប្រឹងប្រែងអស់ពីកម្លំាងកាយចិត្តក្នុងបុព្វ ហេតុជាតិនិងប្រជាជនព្រមទាំងបានយក អាយុ ជីវិតប្តូរនឹងសេចក្តីសុខរបស់ប្រជាជន និងការរីកចម្រើនប្រទេសជាតិ ជាពិសេសខេត្តក្រចេះយេីងបានអភិវឌ្ឍន៍ស្ទេីរតែគ្រប់វិស័យ៕ ដោយ រដ្ឋា
