កំពង់ធំ៖ ឯកឧត្តម ឧត្តមសេនីយ៍ទោ សោម ស៊ុន មេបញ្ជាការរង យោធភូមិភាគទី៤ មេបញ្ជាការ តំបន់ប្រតិបត្តិការសឹករងកំពង់ធំ រួមជាមួយថ្នាក់ដឹកនាំ មេបញ្ជាការរង នាយសេនាធិការ នាយរងសេនាធិការ នាយការិយាល័យ ក្រុមប្រឹក្សាសង្កាត់អាចារ្យលាក់ សរុបចំនួន ១៦៨ នាក់ បានគោរពវិញ្ញាណក្ខន្ធ កម្មាភិបាល យុទ្ធជន យុទ្ធនារី ដែលបានពលីជីវិត ដើម្បីបុព្វហេតុជាតិ និងប្រជាជនកម្ពុជា នៅវិមានរំលឹកគុណយុទ្ធជនពលី នៃបញ្ជាការដ្ឋានតំបន់ប្រតិបត្តិការសឹករងកំពង់ធំ នៅភូមិក្រចាប់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ។
ដើម្បីជាការដឹងគុណចំពោះកម្មាភិបាល យុទ្ធជន យុទ្ធនារី ដែលបានពលីជីវិតដើម្បីបុព្វហេតុជាតិ និងប្រជាជនកម្ពុជា រួមចំណែកក្នុងការផ្តួលរំលំ និងទប់ស្កាត់មិនឲ្យរបបប្រល័យពូជសាសន៍ប៉ុល ពត វឹលត្រឡប់មកវិញ ពិធីនេះបានធ្វើឡើង នៅព្រឹក ថ្ងៃទី ០៧មករា ឆ្នាំ២០១៩ ដើម្បីជាការរំលឹកខួបអនុស្សាវរីយ៍លើកទី៤០ ទិវាជ័យជម្នះ( ៧ មករា ១៩៧៩ – ៧ មករា ២០១៩ )។
គួររំលឹកផងដែរថា នៅមុនឆ្នាំ១៩៧៩ ប្រទេសកម្ពុជា បានធ្លាក់ចូលក្នុងរបបវាលពិឃាតគុកឥតជញ្ជាំង លុបបំបាត់ជំនឿសាសនា វត្តអារាម សាលារៀន ហើយបានប្រើមនុស្សធ្វើការលើសកម្លាំង កាត់បន្ថយការហូបអាហារ ដោយក្នុងមួយពេលទទួលបានបបរមួយវែក ករណីជំទាស់ ឬមិនព្រមធ្វើតាមអង្គការ គេនិងយកទៅសម្លាប់ចោលដោយគ្មានការតវ៉ា នេះហើយជាការធ្វើទារុណកម្មក្រៅប្រព័ន្ធ ធ្វើឲ្យព្រាត់ប្រាស់ក្រុមគ្រួសារបាត់បង់អាយុជីវិត ឪពុកម្តាយ ប្រពន្ធកូន ដែលជាទីស្រលាញ់ និងប្រជាពលរដ្ឋស្លូតត្រង់ផ្សេងៗទៀតនៅទូទាំងប្រទេសកម្ពុជាអស់ជាងបីលាននាក់ ។ 
តែជាភ័ព្វសំណាងដែលមានគុណបុណ្យថ្ងៃ ៧មករា ឆ្នាំ១៩៧៩ ជាចលនាវាយរំដោះសង្គ្រោះជាតិកម្ពុជា ក្រោមការដឹកនាំដោយ សម្តេចអគ្គមហាសេនាបតីតេជោ ហ៊ុន សែន សម្តេចធម្មពោធិសាល ជា ស៊ីម និងសម្តេចពញាចក្រី ហេង សំរិន បានរំដោះប្រទេសជាតិ ធ្វើឲ្យប្រទេសកម្ពុជា មានភាពសំបូរសប្បាយ សុខសន្តិភាព និងការអភិវឌ្ឍប្រទេសឲ្យមានអ្វីៗគ្រប់យ៉ាងដូចថ្ងៃនេះ ជាក់ស្តែងកាលពីថ្ងៃទី២៩ ខែធ្នូ កម្ពុជា បានប្រារព្ធពិធីអបអរសាទរខួបអនុស្សាវរីយ៍លើកទី ២០នៃទិវា នយោបាយឈ្នះឈ្នះ ដែលសកម្មភាពនេះបានស្តែងឲ្យឃើញយ៉ាងច្បាស់ថា កម្ពុជាទទួលបាន សុខសន្តិភាព ពេញលេញ និងអភិវឌ្ឍបានយ៉ាងច្រើន ដូចជា ផ្លូវថ្នល់ ស្ពាន សាលារៀន មន្ទីរពេទ្យ វត្តអារាម អគារតូចធំ ហេដ្ឋារចនាសម្ព័ន្ធ ប្រព័ន្ធធារាសាស្ត្រ តំបន់អេកូទេសចរណ៍ និងវិស័យផ្សេងៗជាច្រើនទៀត ។
ដោយ ប៊ុន រដ្ឋា
