កំពង់ចាម: រដ្ឋបាលខេត្តកំពង់ចាម នាព្រឹកថ្ងៃទី៨ ខែមករា ឆ្នាំ២០១៩នេះ បានរៀបចំពិធីមីទ្ទីញ រំឭកខួបអនុស្សាវរីយ៍លើកទី៤០ ទិវាជ័យជំនះ ៧មករា ឆ្នាំ១៩៧៩-២០១៨ ក្រោមអធិបតីភាពដ៏ខ្ពង់ខ្ពស់ឯកឧត្តម យឹម ឆៃលី ឧបនាយករដ្ឋមន្ត្រី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងជាប្រធានក្រុមការងារថ្នាក់ជាតិចុះជួយខេត្តកំពង់ចាម ឯកឧត្តម ហ៊ុន ណេង អ្នកតំណាងរាស្ត្រមណ្ឌលកំពង់ចាម និងជាអនុប្រធានទី១ ការងារថ្នាក់កណ្តាលចុះជួយខេត្តកំពង់ចាម ដោយមានការអញ្ជើញចូលរួមពី ឯកឧត្តម លោកជំទាវ សមាជិកព្រឹទ្ធសភា សមាជិករដ្ឋសភា ទីប្រក្សារាជរដ្ឋាភិបាល ឯកឧត្ដម គួច ចំរើន អភិបាលខេត្តកំពង់ចាម និងជាប្រធានគណបក្សប្រជាជនកម្ពុជាខេត្តកំពង់ចាម និងឯកឧត្ដម ប្រធានក្រុមប្រឹក្សាខេត្ត លោក លោស្រី ប្រធានមន្ទីរ អង្គភាពពាក់ព័ន្ធជុំវិញខេត្ត ព្រមទាំងកងកម្លាំងប្រដាប់អាវុធទាំងបី ព្រះសង្ឃ យាយជីតាជី លោកគ្រូ អ្នកគ្រូ ប្អូនៗសិស្សានុសិស្ស និងប្រជាពលរដ្ឋ បងប្អូនខ្មែឥស្លាមប្រមាណជាង៨០០០នាក់។
ឯកឧត្តម គួច ចំរើន ប្រធានគណៈកម្មាធិការគណបក្សប្រជាជនកម្ពុជាខេត្តកំពង់ចាម បានឡើងអានសុន្ទរកថាប្រកបដោយអត្ថន័យ និងខ្លឹមសារយ៉ាងជ្រាលជ្រៅរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា ដែលសម្តេចបានថ្លែងកាលពីថ្ងៃទី០៧ ខែមករា ឆ្នាំ២០១៩ ជូនអង្គមិន្ទីញទាំងមូលបានជ្រាប។
ឆ្លៀតក្នុងឱកាសនោះដែរ ឯកឧត្តម យឹម ឆៃលី ឧបនាយករដ្ឋមន្ត្រី បានលើកឡើង អំពីគុណបំណាច់ នៃថ្ងៃជ័យជំនះ ៧មករា ឆ្នាំ១៩៧៩ ដែលយុវជនជំនាន់មុនបានធ្វើការតស៊ូ ដោយលះបង់សាច់ស្រស់ ឈាមស្រស់ របស់ថ្នាក់ដឹកនាំគណបក្សប្រជាជន ដើម្បីរំដោះជាតិមាតុភូមិ ពីរបបប្រល័យពូជសាសន៍ ប៉ុល ពត ៣ឆ្នាំ ៨ខែ និង២០ថ្ងៃ។
ឯកឧត្តមបានសង្កត់ធ្ងន់ថា ថ្ងៃ៧ មករា គឺជាអាយុជីវិតទី២ របស់បងប្អូនប្រជាពលរដ្ឋខ្មែរទូទាំងប្រទេស ដែលបានរស់រានមានជីវិតឡើងវិញ ថ្ងៃ៧ មករា បានផ្តល់អាយុជីវិត និងសិទ្ឋិសេរីភាពពេញលេញដល់ពលរដ្ឋ ជាមួយនិងឱកាសគ្រប់យ៉ាង ក្នុងការកសាងសង្គមគ្រួសារ និងការអភិវឌ្ឍសង្គមជាតិទាំងមូលឲ្យកាន់តែរីកចម្រើន ដោយមានថ្ងៃ ៧ មករា ទើបយើងមានអ្វីៗគ្រប់យ៉ាងមកទល់នឹងសព្វថ្ងៃនេះ ៕
