ខេត្តកំពង់ធំ៖ បន្ទាប់ពីសកម្មភាពបង្ក្រាបបទល្មើស ការដឹកជញ្ជូនឈើប្រណិត ឆ្លងកាត់ខេត្តកំពង់ធំ បណ្តា ឈ្មួញមួយចំនួន បានរាងចាល ខ្លះលបលួចដឹកទាំងភ្នែកនៅកញ្ចឹងករ រីឯខ្លះទៀតបង្វែរផ្លូវដឹកជញ្ជូន តែចំ ណែកឈ្មួញប្រដាប់អាវុធ បានសុខចិត្តយកស្បែកខ្លា មកពាក់ដើម្បីដឹកជញ្ជូនបទល្មើស ដោយពុំបានគិតពី កេក្ករ៍ឈ្មោះរបស់អង្គភាព ដោយយកលុយជាធំ ហ៊ានពាក់ស្បែកខ្លាក្រឡាជាសមត្ថកិច្ច ដើម្បីដឹកជញ្ជូនបទល្មើស។
ជាក់ស្តែង លោក អនុសេនីយ៍ឯក វ៉ាន់ រិន នៅអង្គភាពខុទ្ធកាល័យអគ្គបញ្ជាការ ភ្នំពេញ រស់នៅបច្ចុប្បន្ន អាយុ៤៥ឆ្នាំ ផ្ទះលេខ ៦២២ផ្លូវ២១១ សង្កាត់វាវង់ ខណ្ទ៧មករា រាជធានីភ្នំពេញ បានបើកបរដឹកឈើប្រណិត ប្រភេទនាងនួន តាមមធ្យោបាយរថយន្តម៉ាក់ស៊ើប ពណ៌ ត្រីអ៊ី ពាក់ស្លាកលេខ ខេមរៈភូមិន្ត ២-៣៦០៦ បាន ផ្ទុកឈើចំនួន ៣៧ធំ ប្រវែង១ម៉ែត្រកន្លះ ព្រមជាមួយនិងតៃកុងឡានស៊ីឈ្មួល ម្នាក់ឈ្មោះ លន នីន ភេទ ប្រុសអាយុ៣២ឆ្នាំ រួមជាមួយនឹងអាវុធខ្លីមួយដើមម៉ាក់ K54 សម្រាប់ជាមធ្យោបាយការពារក្នុងគ្រាដឹកជញ្ជូន បទល្មើសឈើប្រណិត ។
កិច្ចសហការបង្ក្រាបបទល្មើសនេះ ត្រូវបានដឹកនាំបង្ក្រាបដោយ លោក សុទ្ធ ម៉ារី នាយផ្នែករដ្ឋបាលព្រៃឈើ កំពង់ថ្ម និងលោក ហេង កាមិច សង្កាត់រដ្ឋបាលព្រៃឈើបារាយណ៍ បានសហការជាមួយលោក វរៈសេនីយ៍ ត្រី ឃ៊ុន ប៊ុនហួរ មេបញ្ជាការកងរាជអាវុធហត្ថស្រុកបារាយណ៍ ព្រមទាំងមន្ត្រីក្រោមឳវាទ ស្ទាក់ចាប់បាននៅ ចំនុចភូមិ ទួលដំណាក់ ឃុំ ចុងដូង ស្រុកបារាយណ៍ ខេត្តកំពង់ធំ ។
លោក សុទ្ធ ម៉ារី នាយផ្នែករដ្ឋបាលព្រៃឈើកំពង់ថ្ម បានឲ្យដឹងថា មុនពេលឈានដល់ការបង្ក្រាបរថយន្ត មួយគ្រឿងនេះ លោកបានទទួលពត៌មាន ពីបណ្តាញថា មានរថយន្តចំនួន១គ្រឿង បានលបលួចដឹកឈើ ប្រណិតឆ្លងកាត់ខេត្តកំពង់ធំ ទើបលោកសុំយោបល់លោក តិប ញាតា នាយខណ្ទរដ្ឋបាលព្រៃឈើកំពង់ធំ ដើម្បីសុំគោលការណ៍ បង្ក្រាបនៅវេលាម៉ោង ៧.៤០នាទីព្រឹក ថ្ងៃទី ៣០ ខែ មិថុនាឆ្នាំ ២០១៤ សម្រាប់វត្ថុតាង មានរថយន្តមួយគ្រឿង និងឈើប្រណិតនាងនួន ៣៧ដុំ ត្រូវបានរក្សាទុកនៅផ្នែករដ្ឋបាលព្រៃឈើ កំពង់ថ្ម រីឯលោកអនុសេនីយ៍ឯក វ៉ាន់ រិន ជាម្ចាស់ឈើ ត្រូវបានកសាងសំណុំរឿង បញ្ជូនទៅតុលការ ។
សូមបញ្ជាក់ផងដែរថា នៅក្នុងករណីបង្ក្រាបនេះ សមត្ថកិច្ច ពុំបានដាក់ខ្នោះ លោក អនុសេនីយ៍ឯក វ៉ាន់ រិន និង តៃកុងឡាននោះទេដោយសារតែជនល្មើស បានយល់ព្រមតាមការណែនាំរបស់សមត្ថកិច្ច ដោយគ្មាន បំណងចង់រត់ និងសមត្ថកិច្ចយល់ថា ជនល្មើសស្ថិតនៅក្នុងឯកសណ្ឋានទ័ព ត្រូវតែចាត់ការតាមវិន័យ កងកម្លាំង ។ 
