កំពង់ធំ៖ ឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជាខេត្តកំពង់ធំ បានដឹកនាំសហការី រួមជាមួយ ឯកឧត្តមឧត្ដមសេនីយ៍ត្រីឃួន សុវណ្ណ នាយករង នៃអធិការដ្ឋានអគ្គបញ្ជាការ នៃកងយោធពលខេមរភូមិន្ទ ព្រះសង្ឃ អាជ្ញាធរដែនដី និងប្រជាពលរដ្ឋជាច្រើនកុះករ បានទៅចូលរួមសំណេះសំណាលសាកសួរសុខទុក្ខ និងប្រគល់ផ្ទះថ្មីជូនអតីតយុទ្ធពិការឈ្មោះនៅ ហ៊ាន ។
លោក នៅ ហ៊ាន ជាអតីតយុទ្ធពិការមានឋានៈពលទោ អតីតអង្គភាពយោធាស្រុកបារាយណ៍ ខេត្តកំពង់ធំ ត្រូវរបួសពិការ ក្នុងសមរភូមិ នៅឆ្នាំ១៩៩១ បានទទួលផ្ទះថ្មី ដែលជាខ្នងផ្ទះខ្នងផ្ទះទី១០៨ អំណោយដ៏ថ្លៃថ្លារបស់សម្ដេចតេជោហ៊ុន សែន ប្រធានសមាគមអតីតយុទ្ធជនកម្ពុជាបានប្រគល់ជូនអតីតយុទ្ធជនពិការ ដែលមានជីវភាពខ្វះខាត រស់ នៅស្រុកបារាយណ៍ ខេត្តកំពង់ធំនៅរសៀលថ្ងៃទី០៨ ខែមករា ឆ្នាំ២០១៩ ។
ឧត្តមសេនីយ៍ទោ សោម ស៊ុន មេបញ្ជាការរងយោធភូមិភាគទី៤ មេបញ្ជាការតំបន់ប្រតិបត្តិការសឹករងកំពង់ធំ បានមានប្រសាសន៍ថា ក្រោយពីបានសិក្សាស្វែងពីជីវភាពរស់នៅ របស់ក្រុមគ្រួសារលោក នៅ ហ៊ាន ដែល មានជីវភាពខ្វះខាត មានភរិយាឈ្មោះជុំ ស៊ីថុល អាយុ៥៧ ឆ្នាំ មានកូនចំនួន១២ នាក់ ប្រុស ៦នាក់ និងស្រី៦ នាក់ មានឈ្មោះក្នុងបញ្ជីបោះឆ្នោតរួចហើយចំនួន ១០ នាក់ បច្ចុប្បន្នរស់នៅភូមិខ្លុយខាងលិច ឃុំសូយោង ស្រុកបារាយណ៍ ខេត្តកំពង់ធំ ។ 
ក្នុងឳកាសប្រគល់ផ្ទះថ្មីជូនក្រុមគ្រួសារអតីតយុទ្ធជន ដែលបានសាងសង់រួច គឺមានទំហំ៤ម៉ែត្រx៦ម៉ែត្រ សង់ពីឈើខ្ពស់ផុតពីដី រនាបនិងជញ្ជាំងក្តារ ប្រក់ស័ង្កសី ដែលបានចំណាយថវិកាក្នុងការសាងសង់អស់ទឹកប្រាក់ចំនួន៧,២៥០,០០០ រៀល ក្នុងពិធីនេះក្រុមការងារ បានពាំនាំនូវអំណោយរបស់សម្ដេចតេជោហ៊ុន សែន ប្រធានសមាគមអតីតយុទ្ធជនកម្ពុជា ផ្ដល់ជូនគាត់បន្ថែមទៀតមានអង្ករចំនួន៥០គីឡូក្រាម មីយើងចំនួន២កេស ទឹកត្រីទឹកស៊ីអ៊ីវចំនួន២យួរ មុងជ្រលក់ថ្នាំចំនួន ២ និងថវិកាចំនួន៧២០,០០០ រៀល អតីតយុទ្ធជនពិការ រំភើបចិត្តទ្រហ៊ោយំ មិននឹកស្មានថាមានថ្ងៃនេះ ដែលបានទទួលផ្ទះថ្មី ព្រោះគាត់គិតថា អាចរស់នៅក្នុងផ្ទះតូចចង្អៀត ដែលមានសមាជិកចំនួន១២ នាក់កន្លងមកជារៀងរហូតហើយ ។
ដោយ ប៊ុន រដ្ឋា
