កំពង់ធំ៖ នេះជាការយកចិត្តទុកដាក់ ពីសំណាក់ មេបញ្ជាការតំបន់ប្រតិបត្តិការសឹករងកំពង់ធំ ចំពោះយុទ្ធមិត្តរៀមច្បងដែល កន្លងមកធ្លាប់បានរួមអាវុធជាមួយគ្នាជាង២ ទសវត្សរ៍ បានអញ្ជើញចុះសួរសុខទុក្ខ លោកវរសនីយ៍ទោឃួន សួន អតីតយុទ្ធជនពិការ បច្ចុប្បន្នរស់នៅភូមិអង្គរជា ឃុំច្រនៀង ស្រុកបារាយណ៍ ខេត្តកំពង់ធំ នៅព្រលប់ថ្ងៃទី០៨ខែមករា ឆ្នាំ២០១៩។
ឯកឧត្តម ឧត្តមសេនីយ៍ទោ សោម ស៊ុន មេបញ្ជាការងយោធភូមិភាគទី៤ បានមានប្រសាសន៍ថា នេះគឺជាការនឹករលឹកនូវវីរភាពដ៏អង់អាចក្លាហាន របស់យុទ្ធមិត្តរៀមច្បង និងបានចែករំលែកបទពិសោធន៍ ដ៏មានតំលៃរបស់រៀមច្បង បាននាំមកនូវភាពជោគជ័យ ទាំងចេតសាស្រ្ត និងយុទ្ធសាស្រ្ត ក្នុងការដឹកនាំ យុទ្ធមិត្តរួមអាវុធជំនាន់ក្រោយ និងក្មួយដែលជាកងកម្លាំង នៃកងយោធពលខេមរភូមិន្ទ ដើម្បីបន្តវេនដឹកនាំការពារ ជាតិ សាសនា ព្រះមហាក្សត្រ និងការពាររាជរដ្ឋាភិបាលស្របច្បាប់ដែលកើតឡើងពីការបោះឆ្នោត ដើម្បីការពារជាតិមាតុភូមិ ការពារបូរណៈភាពទឹកដី នាំយកនូវសេចក្តីសុខ សន្តិភាពជូនប្រជាពលរដ្ឋ ទូទាំងប្រទេស ក្រោមការដឹកនាំ របស់សម្តេចអគ្គមហាសេនាបតីតេជោ ហ៊ុន សែន ជាប្រមុខរាជរដ្ឋាភិបាល នាំមកសិទ្ធសេរីភាព ស្ថេរភាពនយោបាយ រួមទាំងការអភិវឌ្ឍន៍រីកចំរើន ។
ឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជាខេត្ត រួមជាមួយឯកឧត្តមឧត្ដមសេនីយ៍ត្រីឃួន សុវណ្ណ នាយករងនៃអធិការដ្ឋានអគ្គបញ្ជាការ នៃកងយោធពលខេមរភូមិន្ទ និងលោកជំទាវទ្រី ណាត បានបន្តដំណើ ទៅសំណេះសំណាលសាកសួរសុខទុក្ខ លោកវរសនីយ៍ទោឃួន សួន អតីតយុទ្ធជនពិការ ធ្លាប់មានគុណបំណាច់ចំពោះជាតិ ដោយបានបំពេញភារកិច្ចក្នុងភាពស្មោះត្រង់ ម៉ឺងម៉ាត់ក្នុងការងារ សម្រេចគ្រប់ភារកិច្ចដែលថ្នាក់លើបានប្រគល់ជូន ។
លោកវរសនីយ៍ទោឃួន សួន ធ្លាប់បំពេញភារកិច្ចជាគ្រូបង្រៀននយោបាយនៅសាលាយោធភូមិភាគទី២ ក្នុងទសវត្សរ៍ឆ្នាំ១៩៨០ ជាអនុប្រធានយោធាស្រុកបារាយណ៍ ជាប្រធាននយោបាយបាយយោធាស្រុកស្ទោង នៃយោធាខេត្តកំពង់ធំ ក្នុងទសវត្សរ៍ឆ្នាំ១៩៩០ និងចុងក្រោយជានាយការិយាល័យទី២ និងជានាយសេនាធិការរង នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ក្នុងទសវត្សរ៍ឆ្នាំ២០០០ ។
លោកវរសនីយ៍ទោឃួន សួន បច្ចុប្បន្នគាត់មានជំងឺប្រចាំកាយ រស់នៅជាមួយភរិយា ដោយមិនអាចប្រកបមុខរបរអ្វីបាន ក្រៅពីប្រាក់បៀវត្សប្រចាំខែ ដែលរាជរដ្ឋាភិបាលបានផ្ដល់ជូនឡើយ គាត់រស់នៅ ក្នុងជីវភាពលំបាកខ្វះខាត ក្នុងឱកាសសំណេះសំណាលសាកសួរសុខទុក្ខនេះ ក្រុមការងារយេីងបានឧបត្ថម្ភជូនគាត់នូវអង្ករចំនួន៥០ គីឡូក្រាម មីចំនួន១ កេស ទឹកត្រី ទឹកស៊ីអ៊ីវចំនួន២យួរ និងថវិកាចំនួន ៤០០,០០០ រៀល ។
ដោយ ប៊ុន រដ្ឋា
