ខេត្តកំពង់ឆ្នាំង៖ ប្រធានមន្ទីរក៍ដូចជាប្រធានការិយាល័យគណនេយ្យនៅតាមមន្ទីរមួយចំនួនក្នុងខេត្តកំពង់ឆ្នាំងបានទំលាយឲ្យដឹងថា រហូតមកដល់ពេលនេះមន្ទីររបស់ពួកគាត់នៅតែជួបការ លំបាកក្នុងការរត់ការដកសាច់ប្រាក់បុរេប្រទាននិងប្រាក់ទូទាត់ត្រង់យកមកចំណាយសំរាប់ការងារផ្សេងៗដែលជាភាកិច្ចរបស់មន្ទីរ មូលហេតុដោយដោយសារតែលោកប្រធានមន្ទីរហិរញ្ញវត្ថុខេត្ត កំពង់ឆ្នាំង អ៊ូ ជួបកុសល និងមន្ត្រីមួយចំនួនក្នុងមន្ទីរបាននាំគ្នាទាប្រាក់ទឹកតែពីលើខ្ទង់ប្រាក់របស់ មន្ទីរនីមួយៗសំរាប់យកមកចំណាយនោះ។
តាមប្រភពដដែលបានឲ្យដឹងថា សំរាប់ប្រាក់បុរេប្រទាននិងប្រាក់ទូទាត់ត្រង់ ក្រៅពីប្រាក់ បៀវត្តន៍នៅពេលរត់ឯកសារសុំដកសាច់ប្រាក់នេះម្តងៗ តែងតែត្រូវបានលោកប្រធាន មន្ទីរហិរញ្ញវត្ថុនិងប្រធានការិយាល័យថវិការរួមនិងមន្ត្រីពាក់ព័ន្ធនៅក្នុងមន្ទីរមួយនេះទាមទារប្រាក់ទឹកតែអស់មិនតិចជាង១០%នៃទឹកប្រាក់សរុបដែលត្រូវរត់ការដកយកមកចំណាយនានា។
ប៉ុន្តែក្នុងនោះអ្នកដែលទាមទារប្រាក់ទឹកតែខ្ពស់ជាងគេគឺលោកប្រធានមន្ទីរ អ៊ូ ជួបកុសល និងប្រធានការិយាល័យថវិការតែម្តង។ ដោយមានបញ្ហាបែបនេះធ្វើឲ្យមន្ទីរជាច្រើននៅមុនពេលរត់ឯកសារសុំដកសាច់ប្រាក់គឺត្រូវត្រៀមប្រាក់មួយចំនួនដើម្បីទុកបង់ប្រាក់ទឹកតែជូនមន្ទីរហិរញ្ញវត្ថុ។ បញ្ហានេះបានធ្វើឲ្យប្រធាន មន្ទីរនិងប្រធានការិយាល័យគណនេយ្យនៅតាមមន្ទីរត្រូវតេប្រព្រឹត្តខុសខ្ទង់និងកឹបកេងប្រាក់មួយចំនួនសំរាប់ការចំណាយដើម្បីបង់ប្រាក់ទឹកតែជូនប្រធានមន្ទីរហិរញ្ញវត្ថុនិងមន្ត្រីមួយចំនួននៅក្នុងមន្ទីរនេះ។
ប្រភពដដែលបានបញ្ជាក់ឲ្យដឹងថា ខណៈពេលរាជរដ្ឋាភិបាលបានធ្វើកំណែទំរង់ស៊ីជម្រៅ លុបបំបាត់អំពើពុករលួយគឺមន្ទីរនានាក្នុងខេត្តមានសេចក្តីត្រេអរនិងគាំទ្រលើគោលនយោបាយនេះ។ ផ្ទុយទៅវិញមន្ទីរហិរញ្ញវត្ថុខេត្តកំពង់ឆ្នាំងពុំបានធ្វើកំណែទំរង់តាមទេគឺគេនៅតែប្រព្រឹត្ត អំពើពុករលួយទាមទារប្រាក់ទឹកតែពីតាមមន្ទីរជុំវិញខេត្តដដែល ចំពោះមន្ទីរណាដែលមានការ តវ៉ាគឺតែងតែមានជួបការលំបាកក្នុងការរត់ឯកសារសុំដកសាច់ប្រាក់ ហើយចុងបញ្ចប់គឺជៀស មិនផុតពីការបង់ប្រាក់ទឹកតែដដែល។ ដោយមានករណីបែបនេះមន្ត្រីថ្នាក់ដឹកនាំមន្ទីរជាច្រើននៅក្នុងខេត្តបានអំពាវនាវឲ្យស្ថាប័នពាក់ព័ន្ធជាពិសេសគឺអង្គភាពប្រឆាំងអំពើពុករលួយគួបើកការស៊ើបអង្កេតណ៍លើករណីនេះដើម្បីជាការប្រមានមន្ត្រីមន្ទីរហិរញ្ញវត្ថុនៅតាមខេត្តដទៃទៀត។
