ខេត្តក្រចេះ ៖ ក្យូសផ្ទះទឹក នៅតំបន់រមណីយដ្ឋានទឹកជួរទន្លេមេគង្គកាំពី ស្ថិតនៅក្នុងឃុំសំបុក ស្រុកចិត្របុរី ខេត្តក្រចេះ ប្រមាណេជាង៥០០រយ ក្យូសផ្ទះទឹក សម្រាប់ទទួលភ្ញៀវទេសចរណ៍ក្នុងរដូវប្រាំងធ្លាក់ខ្យល់នេះ ត្រូវបានទឹកជំនន់នារដូវប្រាំង ជន់លិច យ៉ាងគំហុក កាលពីល្ងាចថ្ងៃទី២០ ខែមករានេះ។
ពលរដ្ឋនៅក្នុងសហគមន៍រមនីយដ្ឋានកាំពីលាន់មាត់គ្រប់គ្នាថា ប្លែកពិតជាពុំធ្លាប់កើតមាននោះទេ ខណៈដែលរដូវប្រាំងទឹកស្រកចុះ បែរជាមានបាតុភូតទឹកជំនន់ទៅវិញនោះ ។
ពួកគាត់បញ្ជាក់ថា ក្យូសផ្ទះទឹកទើបបានសង់តាមជួរខ្សែទឹកហូរលើថ្មដា ក្នុងរមណីយដ្ឋានកំាពីសម្រាប់ទទួលភ្ញៀវទេសចរ មកលេងកម្សាន្តទើបបានប្រមាណជិតមួយខែសោះ ឥឡូវបែរត្រូវទឹកជន់លិចអស់ ។ ពលរដ្ឋលើកឡើងថា ទឹកជំនន់ខុសរដូវ មិនមែនជាបាតុភូតធម្មជាតិនោះទេ បណ្តាលមកពីការបើកផ្លូវទឹកពីទំនប់វារីអគ្គិសនីនៅប៉ែកខាងលើនៃដងទន្លេមេគង្គ ទើបធ្វើឲ្យទឹកបានហូរជន់យ៉ាងគំហុកតាមទន្លេប៉ែកខាងក្រោម ។
ការជន់ឡើងនូវជំនន់ទន្លេរមេគង្គ នារដូវប្រាំងនេះបានធ្វើឲ្យមានការភ្ញាក់ផ្អើលដល់ពលរដ្ឋនៅតាមបណ្តោយដងទន្លេមេគង្គ ពួកគាត់ចាត់ទុកថា ជាបម្រែបម្រួលអាកាសធាតុដែលមិនធ្លាប់ជួប ពិសេសបងប្អូនអាជីវករលក់ដូរនៅក្នុងសហគមន៍រមនីយដ្ឋានមួយនេះដែលមានភ្ញៀវទេសចរជាតិអន្តរជាតិមកលេងកម្សាន្តជាហូរហែរ ហើយពួកគាត់អាចលក់ដូរប្រចាំថ្ងៃផងដែរ ។
មន្ត្រីនៃទេសចរខេត្តក្រចេះ បានអោយដឹងថា ស្ថានភាពទឹកជនន់ គឺបន្តជន់ឡើង ក្នុងអំឡុងរយៈពេល២ថ្ងៃជាប់ៗគ្នា ពលរដ្ឋដែលមានរបរលក់នំចំនី ត្រីសាច់ និងជួលរោងក្យូសសម្រាប់ភ្ញៀវ ក្នុងរមណីយដ្ឋានកាំពីក៏បានរុះរើរោងក្យូសផ្ទះទឹក និងជម្លៀសសម្ភារដែលដាក់លក់ក្នុងរមណីយដ្ឋានឡើងមកលើគោកវិញដើម្បីគេចពីការលិចលង់ និងខូចខាត ។ដោយ ម៉េង គាង
