ភ្នំពេញ ៖ យុវជន២នាក់ជិះម៉ូតូមួយគ្រឿងបោះពួយដល់ចំណុចផ្លូវបែកជាបួនមិនបន្ថយល្បឿន ស្រាប់តែមានរថយន្តហាយឡែនឌ័រមួយគ្រឿងបើកមកបុកម៉ូតូចំពេញទំហឹងបណ្ដាលអោយយុវជន២នាក់រងរបួសធ្ងន់ស្រាល។
ហេតុការណ៍នេះបានកើតឡើងកាលពីវេលាម៉ោង១០និង៤៥នាទីយប់ថ្ងៃទី១ខែកក្កដាឆ្នាំ២០១៤ ត្រង់ចំណុចផ្លូវលេខ១៥៥ កែងនិងផ្លូវ៤៣២ក្បែររបងវិទ្យាល័យទួលទំពូង ស្ថិតនៅក្នុងសង្កាត់ទួលទំពូងទី១ ខណ្ឌចំការមន។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តហាយឡែនឌ័រមួយគ្រឿង ពណ៌ស្ករ ពាក់ស្លាកលេខ ភ្នំពេញ 2Y-6771 បើកធ្វើដំណើរដោយបុរសម្នាក់និងនារីម្នាក់ទៀត តាមបណ្ដោយផ្លូវលេខ១៥៥ ទិសដៅពីជើងទៅត្បូង ក្នុងល្បឿនលឿន ស្របពេលជាមួយគ្នាដែរក៏មានម៉ូតូហុងដាឌ្រីមសេ១២៥មួយគ្រឿង ពណ៌ខ្មៅ ពាក់ស្លាកលេខ ភ្នំពេញ 1CL-5333 ជិះដោយយុវជន២នាក់ ធ្វើដំណើរតាមបណ្ដោយផ្លូវ៤៣២ ទិសដៅពីលិចទៅកើត យ៉ាងលឿនដូចគ្នា ស្រាប់តែមកដល់ចំណុចកើតហេតុក៏ត្រូវបានរថយន្តហាយឡែនឌ័របុកចំមុខពេញទំហឹងខ្ទាតម៉ូតូទៅជំហៀង បណ្តាលឱ្យយុវជនជិះម៉ូតូទាំង២នាក់រងរបួសធ្ងន់ស្រាល ហើយម៉ូតូខូចខាតទាំងស្រុង ចំណែករថយន្តបង្កមិនទាន់អស់ល្បឿនក៏ជ្រុលបុករានទេវតាមុខផ្ទះប្រជាពលរដ្ឋបោកផ្ទប់និងបង្គោលភ្លើងខូចខាតផ្ទុះពោងសុវត្តិភាពទាំង២និងបែកកង់រថយន្តចំនួន៣ទៅមុខលែងរួច ហើយអ្នកជិះក្នុងរថយន្តទាំង២នាក់រងរបួសស្រាលក៏បានគេចខ្លួនដោយបន្សល់ទុករថយន្តនៅកន្លែងកើតហេតុ។ បន្ទាប់ពីកើតហេតុជនរងគ្រោះត្រូវបានគេបញ្ជូន ទៅសង្គ្រោះបន្ទាន់នៅមន្ទីរពេទ្យភ្លាមៗ ចំណែកម៉ូតូនិងរថយន្តត្រូវសមត្ថកិច្ចធ្វើការវាស់វែងយកទៅរក្សាទុកនៅការិយាល័យចរាចរជើងគោកនៃស្នងការដ្ឋាននគរបាលរាជធានីភ្នំពេញរង់ចាំធ្វើការដោះស្រាយតាមនីតិវិធីច្បាប់៕
