កំពង់ធំ៖ ឧត្តមេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ រួមទាំងមេបញ្ជាការរង និង នាយទាហានជាច្រើនរូប បានអញ្ជើញចុះសួរសុខទុក្ខនៅ ថ្ងៃទី១២ ខែកុម្ភៈ ឆ្នាំ២០១៩ ដល់មន្រ្តីក្រោមឳវាទ លោកវរសនីយ៍ទោស៊ុន សារិន នាយការិយាល័យទី៣ ដែលកំពុងតែសម្រាកព្យា បាលរបួស ដោយសារគ្រោះថ្នាក់ចរាចរណ៍ ខណៈពេលកំពុងធ្វើដំណើរដោយទោចក្រយានយន្តមកបំពេញការងារនៅក្នុងបញ្ជាការដ្ឋានតំបន់ប្រតិបត្តិការសឹករងកំពង់ធំ ។
លោកវរសនីយ៍ទោស៊ុន សារិន អាយុ៥៥ ឆ្នំា បានចូលបម្រើក្នុងជួរកងទ័ពនៅឆ្នាំ ១៩៨៦ ហើយជាមិត្តរួមអាវុធ ដែលធ្លាប់បានឆ្លងកាត់ ជាច្រើនសមរភូមិប្រយុទ្ធនៅលើទឹកដីខេត្តកំពង់ធំ រួមចំណែកការពារអាយុជីវិតទ្រព្យសម្បត្តិប្រជាជន និងទប់ស្កាត់មិនឲ្យរបបប្រល័យពូជសាសន៍ប៉ុលពត វឹលត្រឡប់មកវិញ បានជួបគ្រោះថ្នាក់ចរាចរណ៍ នៅលើដងផ្លូវជាតិលេខ៦ ចំនុចភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ បណ្តាលឲ្យរងរបួសយ៉ាងធ្ងន់ធ្ងរ ពាក់ព័ន្ឋនឹងបំពង់បង្ហួរនោម បច្ចុប្បន្ន កំពុងតែសម្រាកព្យាបាលរបួសនៅក្នុងមន្ទីរពេទ្យព្រះកេតុមាលា (១៧៩) នារាជធានីភ្នំពេញ អស់រយៈពេល៧ថ្ងៃហើយ ដោយបានការយកចិត្តទុកដាក់ព្យាបាលដោយអស់ពីចិត្តពីថ្លើមពីសំណាក់លោកគ្រូ អ្នកគ្រូពេទ្យ មកដល់ថ្ងៃនេះស្ថានភាពរបួស បានធូរស្រាលជាងមុនហើយ ។
ឯកឧត្ដមឧត្ដមសេនីយ៍ទោសោម ស៊ុន បានមានប្រសាសន៍ កោតសរសើរ ចំពោះបងប្អូនមិត្តរួមអាវុធ នៃអង្គភាពតំបន់ប្រតិបត្តិការសឹករងកំពង់ធំ ដែលចេះស្រឡាញ់គ្នា ជួយគ្នាទៅវិញទៅមក និង ចែករំលែកថវិការ ដើម្បីផ្តល់ជូន លោកវរសនីយ៍ទោស៊ុន សារិន ដើម្បីជាជំនួយជួយដល់ការចំណាយក្នុងការរក្សាព្យាបាល ក្នុងថ្ងៃនេះ ឧត្ដមសេនីយ៍ទោសោម ស៊ុន បានពាំនាំនូវថវិកាដែលជាការរួមចំណែករបស់បងប្អូននាយទាហាន នាយទាហានរង និងពលទាហានក្នុងអង្គភាពតំបន់ប្រតិបត្តិការសឹករងកំពង់ធំ មកប្រគល់ជូនលោកវរសេនិយទោស៊ុន សារិន និងក្រុមគ្រួសារចំនួន១,១១០ $ ដើម្បីប្រើប្រាស់ក្នុងការព្យាបាលរបួសនេះ ។
លោកវរសនីយ៍ទោស៊ុន សារិន និងក្រុមគ្រួសារមានសេចក្តីរំភើបចិត្តយ៉ាងខ្លាំង ដែលបានថ្នាក់ដឹកនាំនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ព្រមទាំងបងប្អូនរួមអាវុធ រួមការងារទាំងអស់ដែលបានយកចិត្តទុកដាក់ពីសុខទុក្ខ និងជួយដោះស្រាយនូវការលំបាកនេះ និងសូមគោរពជូនពរឯកឧត្តម លោកជំទាវ លោកលោកស្រី និងបងប្អូនទាំងអស់ សូមបានជួបប្រទះតែសេចក្ដីសុខ សេចក្តីចម្រើន និងសម្រេចជោគជ័យគ្រប់ភារកិច្ច ។ ដោយ ប៊ុន រដ្ឋា
