កំពង់ចាម៖ ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម និងឯកឧត្តម ពេជ្រ សម្បត្តិ អនុរដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ បានអញ្ជើញជាអធិបតីក្នុងកិច្ចប្រជុំផ្សព្វផ្សាយអនុក្រិត្យលេខ៦៦ អ ន ក្រ.ប ក ស្តីពីវិធានការ និងនីតិវិធី នៃការគ្រប់គ្រងបញ្ជីសារពេីភណ្ឌទ្រព្យសម្បត្តិរដ្ឋ ដែលពិធីនេះត្រូវបានប្រារព្ធឡើងនាព្រឹកថ្ងៃទី១២ ខែកុម្ភៈ ឆ្នាំ២០១៩ នៅសាលប្រជុំធំសាលាខេត្តកំពង់ចាម ដោយមានការអញ្ជើញចូលរួមពី លោក អភិបាលរងខេត្ត និងមន្ទីរ អង្គភាពពាក់ព័ន្ធជុំវិញខេត្ត ព្រមទាំងមន្ត្រីរដ្ឋបាលក្រុង-ស្រុក និងឃុំសង្កាត់ ប្រមាណជា៣០០នាក់។ 
ឆ្លៀតក្នុងឱកាសនោះដែរ ឯកឧត្ដម គួច ចំរើន អភិបាលខេត្តកំពង់ចាម បានថ្លែងថា ទាក់ទងជាមួយនឹងការគ្រប់គ្រងទ្រព្យសម្បត្តិរដ្ឋ ការចុះបញ្ជី ការចាត់ចែង និងការបែងចែកសមត្ថកិច្ចការគ្រប់គ្រង រយៈពេលកន្លងទៅ ទោះជាមិនទាន់មានអនុក្រឹត្យលេខ៦៦ ចេញក៏ដោយ ក៏រដ្ឋបាលគ្រប់ថ្នាក់របស់យើង បានធ្វើការគ្រប់គ្រងជាបន្តបន្ទាប់ ទាំងមានការខ្វះចន្លោះ នៃការគ្រប់គ្រងខ្លះ ប៉ុន្តែផ្អែកទៅលើស្មារតីអនុក្រឹត្យលេខ៦៦នេះ សមត្ថកិច្ច នៃការចាត់ចែងបានធ្លាក់ទៅដល់រដ្ឋបាលថ្នាក់ឃុំសង្កាត់ ដូច្នេះការពង្រីកវិសាលភាព នៃការចាត់ចែងកាន់តែរីកធំឡើង ដោយសមត្ថកិច្ចក្នុងការគ្រប់គ្រងសម្បិត្តរដ្ឋនេះ អនុញ្ញាតឲ្យត្រឹមក្របខណ្ឌប្រើប្រាស់ប៉ុណ្ណោះ ដោយមិនអាចចាត់ចែង រហូតដល់ធ្វើការលក់ដូរនោះឡេីយ។
ជាមួយគ្នានោះ ឯកឧត្តម ពេជ្រ សម្បត្តិ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងថា អនុក្រឹត្យនេះមានគោលបំណងធានា ការគ្រប់គ្រងបញ្ជី សារពើភណ្ឌ ទ្រព្យសម្បត្តិរដ្ឋ ប្រកបដោយប្រសិទ្ធភាព តម្លាភាព គណនេយ្យភាពនិងបូរណភាព ។ អនុក្រឹត្យនេះ មានគោលដៅកំណត់នូវវិធាន និងនីតិវិធីនៃការគ្រប់គ្រងបញ្ជីសារពើភ័ណ្ឌទ្រព្យ សម្បត្តិរដ្ឋ ។ អនុក្រឹត្យនេះមានវិសាល ភាពអនុវត្តចំពោះគ្រប់ក្រសួងស្ថាប័នអង្គភាពសាធារណៈប្រហាក់ប្រហែលរដ្ឋបាលរាជធានី ខេត្ត ក្រុង ស្រុក ខណ្ឌ ឃុំ សង្កាត់ និងនីតិបុគ្គលសាធារណៈ ផងដែរ ៕
