កំពង់ចាម: ឯកឧត្តម ហ៊ុន ម៉ានី សមាជិករដ្ឋសភា និងជាប្រធានសហភាពសហព័ន្ធយុវជនកម្ពុជា និងឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម បានអញ្ជេីញចូលរួមក្នុងកម្មវិធី ជួបសំណេះសំណាលជាមួយសមាជិក សមាជិកា សហភាពសហព័ន្ធយុវជនកម្ពុជា ខេត្តកំពង់ចាម ដែលពិធីនេះត្រូវបានប្រារព្ធឡើងនារសៀលថ្ងៃទី១៩ ខែកុម្ភៈ ឆ្នាំ២០១៩ នៅសាលប្រជុំសាលាខេត្តកំពង់ចាម ដោយមានការអញ្ជើញចូលរួមពី ថ្នាក់ដឹកនាំ និងសមាជិក សមាជិកា សហភាពសហព័ន្ធយុវជនកម្ពុជា ប្រមាណជាង៦០០នាក់។
ថ្លែងក្នុងពិធីនោះ ឯកឧត្តម គួច ចំរើន អភិបាលខេត្តកំពង់ចាម បានលើកឡើងថា រដ្ឋបាលខេត្តកំពង់ចាម បានផ្តល់ការគាំទ្រ និងសហការជានិច្ចចំពោះការអនុវត្តការងាររបស់ សហភាពសហព័ន្ធយុវជនកម្ពុជា គ្រប់លំដាប់ថ្នាក់ ដែលមានគោលដៅបម្រើផលប្រយោជន៍ សាធារណៈនៅគ្រប់មូលដ្ឋាន។ ជាមួយគ្នានោះ រដ្ឋបាលខេត្តកំពង់ចាម មានការប្តេជ្ញាចិត្តខ្ពស់ ក្នុងការចូលរួមចំណែកយ៉ាងខ្លាំងក្លា ប្រកបដោយចក្ខុវិស័យវែងឆ្ងាយ ក្នុងការអនុវត្តការងាររបស់ខ្លួន ដោយត្រូវសហការជាមួយដៃគូអភិវឌ្ឍនានា ទាំងវិស័យឯកជន អង្គការមិនមែនរដ្ឋាភិបាល និងអ្នកពាក់ព័ន្ធទាំងអស់ក្នុងសង្គម ក្នុងនោះយុវជនដែលជាធនធានមនុស្សប្រកបដោយចំណេះ ជំនាញ និងឆន្ទៈស្រឡាញ់ការអភិវឌ្ឍសង្គមជាតិ និងជាអ្នកបន្តវេណ ក៏ត្រូវបានយកចិត្តទុកដាក់ផងដែរ។ 
ឯកឧត្តមអភិបាលខេត្ត បានបន្តថា យុវជនយើងក្នុងសម័យនេះមានភ័ព្វវាសនាល្អ ព្រោះកម្ពុជាមានអ្នកដឹកនាំដ៏ឈ្លៀសវៃ ប៉ិនប្រសព្វ គឺ សម្តេចតេជោ ហ៊ុន សែន នាយករដ្ឋមន្ត្រី បានធ្វើឲ្យកម្ពុជាគេចផុតចេញពីសង្រ្គាម ជម្លោះផ្ទៃក្នុង និងការគៀបសង្កត់ ការធ្វើទុក្ខបុកម្នេញពីជនអគតិទាំងក្នុង និងក្រៅប្រទេស។ ខណៈដែលប្រជាពលរដ្ឋកម្ពុជាទូទាំងប្រទេស កំពុងរស់នៅក្រោមដំបូលនៃសុខសន្តិភាព យ៉ាងពេញលេញ។
មានប្រជាជនមួយចំនួននៅមួយចំហៀងទៀតនៃពិភពលោកនេះ ដូចជាប្រទេសស៊ីរី លីប៊ី អ៊ីរ៉ាក់ និងថ្មីៗនេះគឺប្រទេសវេណេហ្ស៊ុយអេឡា កំពុងរងគ្រោះដោយនយោបាយជ្រៀតជ្រែផ្ទៃក្នុងរបស់បរទេស ប្រជាជនរស់នៅក្នុងក្តីវេទនា ការរងគ្រោះដោយសារភេរវកម្ម ជម្លោះនយោបាយ សេដ្ឋកិច្ច និងភាពភ័យខ្លាចដោយសារសង្រ្គាម ការញុះញង់បំបែកបំបាក់ជាតិ។
ឯកឧត្តមអភិបាលខេត្ត បានបន្តទៀតថា ក្នុងរយៈពេល២០ឆ្នាំ ជាប់គ្នាចុងក្រោយនេះ កម្ពុជាកំពុងរីករាយជាមួយនឹងកំណើនសេដ្ឋកិច្ចក្នុងអត្រា ៧% ក្នុង ១ ឆ្នាំ ដែលនេះមានន័យថា ប្រជាពលរដ្ឋកម្ពុជា មានជីវភាពល្អប្រសើរជាងមុន សមដូចនឹងសេចក្តីប្រកាស របស់ធនាគារពិភពលោក កាលពីឆ្នាំ២០១៦ ថាកម្ពុជាបានចាកចេញផុតពីប្រទេសក្រីក្រហើយ ហើយបានឈានឡើងដល់កម្រិតសេដ្ឋកិច្ចថ្មីមួយ នោះគឺជាប្រទេសមានសេដ្ឋកិច្ចចំណូលមធ្យមកម្រិតទាប។ ដោយឈរលើមូលដ្ឋាននេះហើយទើប សម្តេចតេជោនាយករដ្ឋមន្ត្រី បានប្រកាសនូវមហិច្ឆតា ប្រកបដោយចក្ខុវិស័យវែងឆ្ងាយថា ប្រទេសកម្ពុជា នឹងត្រូវក្លាយជាប្រទេសមានសេដ្ឋកិច្ចចំណូលមធ្យមកម្រិតខ្ពស់ នៅឆ្នាំ២០៣០ និងប្រទេសមានចំណូលខ្ពស់នៅឆ្នាំ២០៥០ ផងដែរ។
ថ្លែងក្នុងពិធីនោះដែរ ឯកឧត្តម ហ៊ុន ម៉ានី សមាជិករដ្ឋសភា និងជាប្រធានសហភាពសហព័ន្ធយុវជនកម្ពុជា មានប្រសាសន៍ថា សហភាពសហព័ន្ធយុវជនកម្ពុជា នៅទូទាំងប្រទេស សម្រេចបាននូវសមិទ្ធផល ទាំង រូបវ័ន្ត និងអរូបវ័ន្ត ជាច្រើនតាមរយៈព្រឹត្តិការណ៍ជាប្រវត្តិសាស្ត្រនានា រួមមាន កម្មវិធីអង្គរសង្រ្កាន្គ ការបំបែកឯកត្តកម្មកម្ពុជាក្នុងកំណត់ត្រាពិភពលោកខាងនំអន្សម យក្សធំជាងគេ ការរាំចង្វាក់ម៉ាឌីហ្ស៉ុនមានអ្នករាំច្រើនជាងគេ ចំនួន២០១៥នាក់ ក្រម៉ាខ្មែរវែងជាងគេ ទូក ង ប្រណាំងវែងជាងគេ និងព្រឹត្តិការណ៍ដ៏អស្ចារ្យផ្សេងទៀត ដែលជាការចូលរួមចំណែកយ៉ាងសំខាន់ក្នុងការបង្កើត និងលើកស្ទួយ នូវគុណតម្លៃដ៏វិសេសវិសាលលើផ្នែកវប្បធម៌ សង្គមកិច្ច និងសេដ្ឋកិច្ច នាំឲ្យកិត្យានុភាព និងមោទនភាពជាតិរីកសាយភាយស្គុះស្គាយទាំងនៅក្នុងប្រទេស និង នៅលើឆាក អន្តរជាតិ។
ជាមួយគ្នានោះ ឯកឧត្ដម ហ៊ុន ម៉ានី បានលើកឡើងផងដែរថា យើងត្រូវប្រឹងប្រែងដោយខ្លួនឯង ដេីម្បីបន្តឆ្ពោះទៅមុខបន្ថែមទៀត។ បើមិនប្រឹងរស់ដោយខ្លួនឯង មានភាពម្ចាស់ការ និងសិទ្ធសម្រេចលើខ្លួនឯងទេ យើងនឹងក្លាយទៅជាមនុស្សដែលចាំទទួលការបញ្ជាពីគេរហូត។ គ្មាននរណាស្រឡាញ់យើង ជាងយើងខ្លួនឯងនោះទេ ៕
