កំពង់ចាម: ឯកឧត្ដម ងី ច័ន្ទ្រផល រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ សម្ដេចក្រឡាហោម ស ខេង ឧបនាយក រដ្ឋមន្ត្រី រដ្ឋមន្ត្រីក្រសួងមហាផ្ទៃ និងឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម បានអញ្ជើញជាគណៈអធិបតី ក្នុងអង្គសិក្ខាសាលាបូកសរុបលទ្ធផលការងារឆ្នាំ២០១៨ និងលេីកទិសដៅសកម្មភាពឆ្នាំ២០១៩ នៃការអនុវត្តការងាររបស់ច្រកចេញចូលតែមួយ និងការសម្រុះសម្រួលដោះស្រាយបណ្តឹងនៅរដ្ឋបាលថ្នាក់
ក្រោមជាតិ ដែលពិធីនេះត្រូវបានប្រារព្ធឡើងនាព្រឹកថ្ងៃទី២១ ខែកុម្ភៈ ឆ្នាំ២០៩ ដោយមានការអញ្ជើញចូលរួមពី លោក លោកស្រី តំណាងក្រសួងពាក់ព័ន្ធ អភិបាល ក្រុង ស្រុក ខណ្ឌ ប្រធានការិយាល័យប្រជាពលរដ្ឋ លោកនាយករដ្ឋបាល ប្រធានអង្គភាពច្រកចេញចូលតែមួយ រាជធានី-ខេត្ត ប្រធានការិយាល័យប្រជាពលរដ្ឋ ប្រធានការិយាល័យច្រកចេញចូលតែមួយ ក្រុង ស្រុក ខណ្ឌ ទូទាំងប្រទេស។
ថ្លែងក្នុងពិធីនោះ ឯកឧត្ដម គួច ចំរើន អភិបាលខេត្តកំពង់ចាម បានលេីកឡេីងថា ខេត្តកំពង់ចាម បច្ចុប្បន្ន បាននិងកំពុងអនុវត្តការផ្តល់សេវាសាធារណៈតាមរយៈច្រកចេញចូលតែមួយ ជូនដល់បងប្អូនប្រជាពលរដ្ឋ នៅអង្គភាពច្រកចេញចូលតែមួយខេត្ត ក្រុងកំពង់ចាម និងស្រុកជើងព្រៃៈ
– ការិយាល័យច្រកចេញចូលតែមួយនៅក្រុងកំពង់ចាម បានចាប់ផ្ដើមដំណើរការ ពីថ្ងៃទី២៥ ខែមេសា ឆ្នាំ២០១៤ ។ នៅក្នុងឆ្នាំ២០១៨ កន្លងមកក្រុងកំពង់ចាម បានទទួលសេវាសរុបចំនួន ១៨ ១៨៦ សេវា ទទួលបានប្រាក់ចំណូលចំនួន ១៦៧ ៥២៦ ០០០ រៀល ។
– នៅស្រុកជើងព្រៃ បានដាក់ឲ្យដំណើរការការិយាល័យច្រកចេញចូលតែមួយ ពី ថ្ងៃទី៤ ខែធ្នូ ឆ្នាំ២០១៧ ។ ហើយនៅក្នុងឆ្នាំ២០១៨ កន្លងទៅស្រុកជើងព្រៃ បានទទួលសេវាចំនួន ៥ ៩៦៧ សេវា ទទួលបាន ប្រាក់ចំណូលចំនួន ៤៣ ៣២១ ០០០ រៀល ។
ស្របតាមគោលការណ៍ និង លិខិតណែនាំផ្សេងៗអំពីនីតិវិធីនៃការ ផ្ដល់សេវារដ្ឋបាលនៅអង្គភាពច្រកចេញចូលតែមួយ ខេត្តកំពង់ចាម បានដាក់ឲ្យដំណើរការជាបណ្ដោះអាសន្ននៅ ថ្ងៃទី២០ ខែកក្កដា ឆ្នាំ២០១៨ ។ នៅក្នុងឆ្នាំ២០១៨ កន្លងទៅអង្គភាព ច្រកចេញចូលតែមួយខេត្ត បានទទួលសេវាសរុបចំនួន ១០ ៩៤៦ សេវា ទទួលបានប្រាក់ចំណូលសរុប ៣២៦ ៧៥២ ៧២២ រៀល។
ក្នុងនោះ រដ្ឋបាលខេត្ត បានប្តេជ្ញាដាក់ឲ្យ ដំណើរការច្រកចេញចូលតែមួយ នៅស្រុកចំនួន ៣បន្ថែមទៀត នៅឆ្នាំ២០១៩នេះ និង ដាក់ឲ្យដំណើរការ ឲ្យបានគ្រប់ ក្រុង ស្រុកទាំង ១០ នៅឆ្នាំ២០២០។
ឯកឧត្ដមអភិបាលខេត្ត បានបន្តទៀតថា ចំពោះការទទួល សម្របសម្រួល និង ដោះស្រាយបណ្ដឹង របស់ការិយាល័យប្រជាពលរដ្ឋ ដោយការិយាល័យប្រជាពលរដ្ឋគឺជាកញ្ចក់ឆ្លុះបញ្ចាំងពីឥរិយាបទ របស់មន្ត្រីផ្ដល់សេវា ភាពត្រឹមត្រូវនៃកម្រៃសេវា និងការទទួលបណ្ដឹងរបស់ប្រជាពលរដ្ឋ ។ ជាក់ស្តែង នៅក្នុងឆ្នាំ២០១៨នេះ ការិយាល័យ ប្រជាពលរដ្ឋខេត្ត ក្រុងកំពង់ចាម និង ស្រុកជើងព្រៃ អនុវត្តបាន៖
– ការិយាល័យប្រជាពលរដ្ឋក្រុងកំពង់ចាម បានទទួល និង ដោះស្រាយបណ្ដឹងចំនួន ១៥ បណ្ដឹង
– ការិយាល័យប្រជាពលរដ្ឋស្រុកជើងព្រៃ បានទទួល និង ដោះស្រាយបណ្ដឹងចំនួន ១៦ បណ្ដឹង
– ដោយឡែកការិយាល័យប្រជាពលរដ្ឋខេត្តកំពង់ចាម មិនទាន់បានទទួល និង ដោះស្រាយបណ្ដឹងនៅឡើយទេ។
ឯកឧត្ដម ងី ចន្រ្ទផល រដ្ឋលេខាធិការក្រសួងមហាផ្ទៃ បានជម្រុញដល់មន្ត្រីច្រកចេញចូលតែមួយ ត្រូវផ្តល់សេវាសាធារណ: និងការដោះស្រាយរាល់បណ្តឹង របស់ប្រជាពលរដ្ឋឲ្យបានល្អប្រសេីរ និងដើម្បីរួមចំណែក ក្នុងការអនុវត្តកម្មវិធីកំណែទម្រង់រដ្ឋបាលសាធារណៈ ក្នុងការបង្ខិតសេវាឲ្យកៀកជិតនឹងប្រជាពលរដ្ឋ ជាក់ស្ដែងដូចជារដ្ឋបាលខេត្តកំពង់ចាម បានដាក់ចេញឲ្យអនុវត្តនូវចលនាប្រឡងប្រណាំង ឃុំ សង្កាត់ បម្រើសេវាល្អទូទាំងខេត្តកំពង់ចាម ក្នុងគោលបំណងផ្តល់សេវាសាធារណៈ ឲ្យមានប្រសិទ្ធភាព ប្រសិទ្ធផល តម្លាភាព គណនេយ្យភាព ផ្តល់ភាពងាយស្រួល និងឆាប់រហ័ស ដល់ខ្នងផ្ទះដើម្បីឆ្លើយតបនឹងតម្រូវការរបស់បងប្អូនប្រជាពលរដ្ឋផងដែរ ៕
