កំពង់ចាម: ប្រជាកសិករមួយចំនួនដែលរស់នៅតំបន់កោះប៉ែន ជាពិសេសអ្នកភូមិទី៧ ឃុំកោះសូទិន ស្រុកកោះសូទិន ខេត្តកំពង់ចាម ដោយពួកគាត់បានងាកមកដាំដុះពូជដំណាំពោតក្រហម របស់ក្រុមហ៊ុនស៊ីភី ព្រោះត្រូវចំណាយដើមទុនអស់តិច ដែលទទួលបានទិន្នផលខ្ពស់ ហេីយតម្លៃទីផ្សារគឺអាចទទួលយកបាន ។
កសិករដែលជាម្ចាស់ចំការពោតក្រហមខាងលេី បានលើកឡើងថា ក្រោយពីទទួលការណែនាំពីតំណាងក្រុមហ៊ុនស៊ីភី គាត់បានជ្រើសរើសយកពូជដំណាំពោតក្រហម២០១ និង៦៣៩ដោយត្រូវចំណាយដើមទុនអស់តិច និងទទួលបានទិន្នផលខ្ពស់ ព្រមទាំងមានទីផ្សារល្អ ដោយឈ្មួញមកប្រមូលទិញដល់ផ្ទះ និងចំការតែម្ដង ក្នុងតម្លៃសមរម្យដែលយើងទទួលយកបាន ពោលគឺក្នុងមួយគីឡូ ក្រាមប្រមាណជា៨២០រៀល ដែលតម្លៃនេះទូទាន់ទៅគឺអាចបាន ប្រាក់ចំណេញគួរសម ។
ក្នុងពិធីធ្វើបទបង្ហាញជាមួយបងប្អូនប្រជាកសិករប្រមាណជា៦០០នាក់ នារសៀលថ្ងៃទី២២ ខែកុម្ភៈ ឆ្នាំ២០១៩នេះ លោក សុវត្តិ ចៃខ្លា តំណាងក្រុមហ៊ុន ស៉ីភី បានលើកឡើងថា ក្រុមហ៊ុនចារើនផ្លែនថេរសិន រឺ CP Group បានមកចុះវិនិនៅប្រទេសកម្ពុជា តាំងពីឆ្នាំ១៩៩៦ ដែលមានរោងចក្រផលិតសត្វធំជាងគេនៅកម្ពុជា ក្នុងស្រុកអង្គស្នួល ខេត្តកណ្តាល ដែលទទួលទឹញពោតក្រហមពីកសិករផងដេរ ។
ជាមួយគ្នានោះ លោកចៅ សុផល ទីព្រឹក្សាបច្ចេកទេសក្រុមហ៊ុនស៉ីភី ផ្នែកដំណាំ និងជីគីមី បានណែនាំពីបច្ចេកទេសទំនើបៗ និងពូជពោតថ្មីដែលផ្តល់ទិន្នផលខ្ពស់ ជាពិសេសពូជពោត ស៉ីភី ២០១ ដែលមានអាយុកាលខ្លី ៩០ថ្ងៃប្រមូលផល និងពូជពោត ៦៣៩ ដែលមានផ្លែធំកាច់ងាយទិន្នផលខ្ពល់ប្រមូលផលជាស្នូលពី ១២-១៥តោន ក្នុងមួយហិកតា និងបានណែនាំពីជីស៉ីភីដែលមានគុណភាពខ្ពស់ផងដែរ ។
គួររំលឹកផងដែរថា កាលពីពេលកន្លងទៅថ្មីៗនេះ ខណៈដែលឯកឧត្ដម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានជួបសំណេះសំណាលជាមួយបងប្អូនប្រជាកសិករ នៅឃុំជីរោទី១ ស្រុកត្បូងឃ្មុំ ខេត្តត្បូងឃ្មុំ ដោយឯកឧត្តមបានលើកឡើងអំពី បញ្ហាតម្លៃពោត ជម្រាបជូនកសិករថា ថ្មីៗនេះ រដ្ឋាភិបាលបានយកពន្ធលើការនាំចូលពោត បំណងកាត់បន្ថយការនាំចូល រួចបង្វែរទិសដៅរបស់ក្រុមហ៊ុនផលិតចំណីសត្វ ឲ្យងាកមកប្រមូលទិញផលិតផលពោតក្នុងស្រុកវិញ ដើម្បីលើកកម្ពស់ផលិតកម្មក្នុងស្រុក ដែលនេះជាគោនយោបាយអាទិភាពមួយរបស់រាជរដ្ឋាភិបាល ៕
