ក្រុងបាកដាដ៖ បន្ទាប់ពីបញ្ជូននាវាចម្បាំងទៅកាន់ឈូងសមុទ្រ ប្រធានាធិបតីអាមេរិក លោក បារ៉ាក់ អូបាម៉ា បានសម្រេចចិត្តបញ្ជូនកងកម្លាំងជាង ៣០០នាក់បន្ថែម ទៀតទៅកាន់ទីក្រុងបាកដាដ ប្រទេសអ៊ីរ៉ាក់ ដើម្បីការពារស្ថានទូតខ្លួន ខណៈសភាអ៊ីរ៉ាក់បានបើកកិច្ចប្រជុំ ស្វែង
ដំណោះស្រាយ ពាក់ព័ន្ធវិបត្តិផ្នែកនិកាយនៅថ្ងៃអង្គារនេះ។ ក្រសួងការពារប្រទេសអាមេរិកប្រកាសកាលពីថ្ងៃទី៣០ មិថុនា ថា សហរដ្ឋអាមេរិកបានសម្រេចបញ្ជូនកម្លាំងបន្ថែមនូវមនុស្ស៣០០នាក់ រួមទាំងបណ្តាឧទ្ធម្ភាគចក្រ និងយន្តហោះគ្មានមនុស្សបើកមកកាន់អ៊ីរ៉ាក់ ដែលនៅទីនោះពួកជីហាដនិយមបានវាយរុលទៅមុខយ៉ាងលឿនរយៈពេល ប៉ុន្មានសប្តាហ៍ចុងក្រោយនេះ ។ អ្នកនាំពាក្យមន្ទីរប៉ង់តាហ្គោន ឧត្តមនាវីចន ឃើរី ថ្លែងថា មនុស្សប្រមាណជា២០០នាក់បានបញ្ជូនមកដល់អីុរ៉ាក់កាលពីថ្ងៃទី២៩ មិថុនា ដើម្បីជួយពង្រឹងសន្តិសុខស្ថានទូតអាមេរិក និងព្រលានយន្តហោះអន្តរជាតិក្រុងបាដាដ ។ កម្លាំង១០០នាក់ទៀតក៏ត្រូវមកកាន់ក្រុងបាដាដ ដើម្បីជួយធានាសន្តិសុខ និងជួយទ្រទ្រង់ខាងភ័ស្តុភារដែរ ។
បើតាមប្រធានាធិបតីអាមេរិក លោក អូបាម៉ា បញ្ជាក់ច្បាស់ថា «កងកម្លាំងទាំងនេះ បានដាក់ពង្រាយ ក្នុងគោលបំណងការពារសន្តិសុខ ជូន ពលរដ្ឋ និងទ្រព្យសម្បត្តិរបស់អាម៉េរិក ហើយប្រសិនបើចាំបាច់ នឹងបើកការប្រយុទ្ធដើម្បីការពារខ្លួន»។ សូមបញ្ជាក់ថា មនុស្សជិត២.០០០នាក់ ត្រូវស្លាប់ក្នុងខែមិថុនា។ យោងតាមតួលេខផ្លូវការចេញផ្សាយកាលពីថ្ងៃទី៣០ មិថុនា ថាជនស៊ីវិល១.៤០០នាក់ ទាហាន៣៨០នាក់ ប៉ូលិស១៥០នាក់ បានត្រូវស្លាប់ក្នុងខែមិថុនានោះ ។ ម្យ៉ាងវិញទៀតមនុស្ស២៦.០០០នាក់ត្រូវរបួសក្នុងនោះជាងពាក់កណ្តាលជាជនស៊ីវិល ៕
