កំពង់ធំៈ ឧត្ដមសេនីយ៍ទោសោម ស៊ុន ប្រធានសមាគមអតីតយុទ្ធជនខេត្តកំពង់ធំ និងមន្រ្តីសុរិយោដីស្រុកសន្ទុក រួមជាមួយក្រុមការងារសមាគមអតីតយុទ្ធជន និងអាជ្ញាធរដែនដី ចុះពិនិត្យទីតាំងដីជាលើកទី២ ដែល ជាដីសប្បទានសង្គមកិច្ចសម្រាប់ចែកជូន ដល់ក្រុមគ្រួសារអតីតយុទ្ធជនកម្ពុជា ដែលរស់នៅក្នុងខេត្តកំពង់ធំ មានជីវភាពខ្វះខាត ឬមានជម្រកស្នាក់នៅមិនសមរម្យ គ្មានដីគ្មានផ្ទះ រស់នៅពិតប្រាកដដែលមានចំនួន២០១ គ្រួសារ ជាអំណោយដ៏ថ្លៃថ្លា របស់សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា។
ដីសម្បទានសង្គមកិច្ចសម្រាប់ផ្តល់ជូនអតីតយុទ្ធជន ត្រូវបាន រៀបចំជាប្លង់សាងសង់លំនៅដ្ឋាន ផ្លូវថ្នល់ សាលារៀន និងដីបង្ករបង្កើនផល ក្រោមការចង្អុលបង្ហាញពីសំណាក់ ឯកឧត្តមនាយឧត្ដមសេនីយ៍គន់ គីម ទេសរដ្ឋមន្រ្តី ទទួលបន្ទុកបេសកកម្មពិសេស ទទួលបន្ទុកអតីតយុទ្ធជន និងជនពិការ អគ្គលេខាធិការសមាគមអតីតយុទ្ធជនកម្ពុជា និងការណែនាំរបស់ឯកឧត្តមសុខ លូ អភិបាលខេត្ត ប្រធានកិត្តិយសសមាគមអតីតយុទ្ធជនកម្ពុជា ខេត្តកំពង់ធំ ដែលមានទីតាំង នៅតំបន់ចំបក់ធំ ឃុំក្រយា ស្រុកសន្ទុក ខេត្តកំពង់ធំ ។
សកម្មភាពក្រុមការងារចុះពិនិត្យ ត្រូវបានដឹកនាំដោយ ឯកឧត្តម ឧត្ដមសេនីយ៍ទោសោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នៅព្រឹកថ្ងៃពុធទី២៧ ខែកុម្ភៈ ឆ្នាំ២០១៩ បន្ទាប់ពីបានធ្វើការត្រួតពិនិត្យ ទីតាំងដី និងភូមិសាស្រ្ត ក្រុមការងារបានធ្វើការប្រជុំវាយតម្លៃលទ្ធផលការងារគ្រប់គ្រងផ្ទៃដី និងបញ្ហាប្រឈម នៅសាលាឃុំក្រយាស្រុកសន្ទុក ខេត្តកំពង់ធំ ហើយបានដាក់ចេញនូវផែនការបន្តសម្រាប់អនុវត្ត៣ចំនុច ។
ក្នុងនោះមាន ១/អាជ្ញាធរដែនដី និងស្ថាប័ននានាដែលមានការពាក់ព័ន្ធ ត្រូវគ្រប់គ្រងផ្ទៃដីដែលមានស្រាប់ មិនអនុញ្ញាតឲ្យមានការរំលោភបំពានកាន់កាប់ខុសច្បាប់ តទៅទៀតបានឡើយ។
២/សំណូមពរជំនាញពាក់ព័ន្ធ អាជ្ញាធរដែនដី ចាត់វិធានការតាមផ្លូវច្បាប់ចំពោះជនទាំងឡាយណាដែលរំលោភកាន់កាប់ដីរដ្ឋខុសច្បាប់ តាមនិតិវិធីច្បាប់ដើម្បីដកហូតជូនរដ្ឋវិញ លើកលែងតែបងប្អូនប្រជាពលរដ្ឋដែលគ្មានដីរស់នៅពិតប្រាកដ ដើម្បីរៀបចំជូនគាត់កាន់កាប់ស្របច្បាប់ ។
៣/ ប្រុងប្រៀប កិច្ចការលើគ្រប់វិស័យ ដើម្បីរៀបចំប្លង់សាងសង់លំនៅដ្ឋាន ផ្លូវថ្នល់ សាលារៀន មន្ទីរពេទ្យ នៅពេលខាងមុខ ជូនដល់បងប្អូនអតីតយុទ្ធជនរបស់យេីង ដែលធ្លាប់បូជាសាច់ស្រស់ ឈាមស្រស់ រួមចំណែកអនុវត្តន៍នូវគោលនយោបាយឈ្នះ ឈ្នះ ធ្វើឲ្យប្រទេសជាតិយើងមានសន្តិភាព និងការអភិវឌ្ឍន៍ ក្រោមការដឹកនាំរបស់សម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រធានសមាគមអតីតយុទ្ធជនកម្ពុជា ។
សូមបញ្ជាក់ជូនផងដែរថា កន្លងមកនេះថ្នាក់ដឹកនាំខេត្តកំពង់ធំ បានរៀបចំគ្រោងទុកដីសម្បទានសង្គមកិច្ចសម្រាប់ផ្តល់ជូនអតីតយុទ្ធជនខេត្តកំពង់ធំ នៅតំបន់ចំបក់ធំ ឃុំក្រយា ស្រុកសន្ទុក ខេត្តកំពង់ធំនេះ មានចំនួន១៩៧៨ ហិកតា តែបច្ចុប្បន្ននេះ មានជនមួយចំនួនបានរំលោភយកកាន់កាប់ និងប្រជាជនដែលខ្វះខាតដីរស់នៅបានមកាន់កាប់សាងសង់លំនៅដ្ឋាន បណ្តោយឲ្យបាត់បង់ដីមួយចំនួន ដែលត្រូវដោះស្រាយសមស្រប
ដោយ ប៊ុន រដ្ឋា
