កំពង់ចាម:ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម បានជំរុញដល់អភិបាលស្រុកកោះសូទិន ត្រូវខិតខំអនុវត្តកម្មវិធីកំណែទម្រង់រដ្ឋបាលសាធារណៈ ក្នុងការបង្ខិតសេវាឲ្យនៅជិតកៀកនឹងប្រជាពលរដ្ឋ ការថ្លែងបែបនេះ ខណៈដែលឯកឧត្ដមបានអញ្ជើញជាគណៈអធិបតីក្នុងពិធីប្រកាសតែងតាំង ចូលកាន់មុខតំណែងជាអភិបាលនៃគណៈអភិបាលស្រុកកោះសូទិន ដែលពិធីនេះត្រូវបានប្រារព្ធឡើងនារសៀលថ្ងៃទី២៨ ខែកុម្ភៈ ឆ្នាំ២០១៩ នៅសាលាស្រុកកោះសូទិន ដោយមានការអញ្ជើញចូលរួមពី លោក លោកស្រី អភិបាលរងខេត្ត មន្ទីរអង្គភាពជុំវិញខេត្ត និងមន្ត្រីពាក់ព័ន្ធក្នុងស្រុក ជាច្រើនរូបផងដែរ។ 
ដោយពិធីប្រកាសតែងតាំងចូលកាន់មុខតំណែងនេះ គឺលោក យី វណ្ណៈ មកពីអភិបាលរងស្រុកកំពង់សៀម ត្រូវបានប្រកាសតែងតាំងជាអភិបាលនៃគណៈអភិបាលស្រុកកោះសូទិន ជំនួសលោក ផេន សុផល ដែលត្រូវផ្ទេរភារកិច្ចទៅកាន់មុខតំណែងជាអភិបាលស្រុកបាធាយវិញ ។ 
ថ្លែងក្នុងពិធីនោះឯកឧត្តម គួច ចំរើន អភិបាលខេត្តកំពង់ចាម បានលើកឡើងថា ការផ្លាស់ប្ដូរ និងការតែងតាំងមុខតំណែងថ្មីនេះ គឺជាភាពចាំបាច់មួយ ហើយក៏ជាការបន្តនិរន្តរភាពរដ្ឋបាល ស្របទៅតាមច្បាប់ របស់ក្រុមព្រឹក្សាស្តីពីការគ្រប់គ្រងរដ្ឋបាលរាជធានី ខេត្ត ពោលគឺមិនមែនដោយសារបញ្ហាប្រឈម ដែលត្រូវផ្លាស់ប្ដូរនោះទេ។
ឯកឧត្ដមអភិបាលខេត្ត បានលើកឡើងផងដែរថា កាលពីមុនយេីងអាចធ្វើការនៅកន្លែងណា អស់មួយជីវិតក៏បាន ប៉ុន្តែក្នុងការធ្វើកំណែទម្រង់របស់រាជរដ្ឋាភិបាល ដោយផ្អែកទៅតាមច្បាប់គ្រប់គ្រងក្រុមព្រឹក្សារាជធានី ខេត្ត ក្រុង ស្រុក ខ័ណ្ឌ គឺត្រូវបានកំណត់សម្រាប់គណៈអភិបាល ដែលម្នាក់ៗត្រូវមានអាណត្តិ៤ឆ្នាំ ប៉ុន្តែបើផ្អែកលើការបំពេញភារកិច្ចបានល្អ រាជរដ្ឋាភិបាល ក្រសួងមហាផ្ទៃ អាចនឹងបន្តអាណត្តិទី២ឲ្យគាត់ជាបន្តទៀត ដោយផ្តេីមចេញពីច្បាប់នេះហើយ ដែលយើងបានឃើញថាមន្ត្រីរបស់យើង ពិសេសនៅក្នុងគណៈអភិបាល ត្រូវតែធ្វើការផ្លាស់ប្ដូរជាបន្តបន្ទាប់ ប៉ុន្តែបេីត្រូវនៅបន្តអាណត្តិទៀតនោះ ក៏ត្រូវមានការប្រកាសតែងតាំងឲ្យកាន់កាប់អាណត្តិទី២របស់ខ្លួន៤ឆ្នាំបន្តទៀត ទាំងនេះដែលជាច្បាប់យើងមិនអាចធ្វើផ្ទុយបានឡើយ។ 
ជាមួយគ្នានោះ ឯកឧត្ដមអភិបាលខេត្ត ក៏បានជំរុញដល់ លោកអភិបាលស្រុកកោះសូទិន ដែលទើបតែទទួលចូលកាន់មុខតំណែងថ្មីនេះ គឺត្រូវខិតខំអនុវត្តកម្មវិធីកំណែទម្រង់រដ្ឋបាលសាធារណៈ ក្នុងការបង្ខិតសេវាឲ្យនៅជិតកៀកនឹងប្រជាពលរដ្ឋ គឺត្រូវអនុវត្តនូវចលនាប្រឡងប្រណាំង ឃុំ សង្កាត់ បម្រើសេវាល្អ ដេីម្បីផ្តល់សេវាសាធារណៈឲ្យមាន ប្រសិទ្ធភាព ប្រសិទ្ធផល តម្លាភាព គណនេយ្យភាព ផ្តល់ភាពងាយស្រួល បានឆាប់រហ័ស ដល់ខ្នងផ្ទះដើម្បីឆ្លើយតបនឹងតម្រូវការជាក់ស្តែងរបស់ប្រជាពលរដ្ឋ ផងដែរ ៕
