ខេត្តក្រចេះ ៖ សូម្បីតែ នាយឧត្តមសេនីយ៏ សៅ សុខា ប្រធានគណៈកម្មការជាតិទប់ស្កាត់ និងបង្ក្រាបបទល្មើសព្រៃ ក៏មិនអាចធ្វើឲ្យ លោកឧកញ៉ា ស៉ុឹង សំអុល ដែលជាឧញ៉ាបានងារជាឧកញ៉ាដោយសារតែរកស៊ីឈើខុសច្បាប់ម្នាក់នេះ ព្រឺសម្បុរសបានដែរ ហើយក៏មិនអាច ទប់ស្កាត់សកម្មភាព ដឹកឈើរបស់លោក ឧកញ៉ា ស៉ឹង សំអុល រាំងស្ទះការដឹកជញ្ជួនឈើប្រណិត ។
សេចក្តីរាយការណ៏ បានឲ្យដឹងថា ឧកញ៉ា ស៊ឹង សំអុល បានដើរអួតក្តែងៗថា បើលោកនាយឧត្តមសេនីយ សៅ សុខា មិនអាចចាប់អញបានផង អ្នកណាហ៊ានចាប់អញទេ ជាពិសេសអភិបាលខេត្តក្រចេះមិនហ៊ានធ្វើអីអញផងនោះ ត្រឹមសម្បត្តិពួកឯង គ្រាន់តែជាសារព័ត៌មាន ឬក៏ជាកសែតខ្ចប់ប្រហុក អាចរារាំងអញបានដែរឬ? ចំណែកអាជ្ញាធរនិង មន្ត្រីជំនាញពាក់ពន្ធ័ ក៏រស់ដោយសារអញ ឲ្យពួកវារស់ដែរ ជាក់ស្តែងកន្លងមកនេះ ក្បួនរថយន្តប្រភេទវេអង ប្រមាណ៣០គ្រឿង នៅក្នុងក្រុមហ៊ុនចំនួន២ គឺក្រុមហ៊ុន « ម៉ាស្ទ័រខេសាន់ » របស់ឧកញ៉ា តុប វីយ៉ារ៉ាដា នឹងក្រុមហ៊ុន « យូនីហ្គ្រីន » របស់ឧកញ៉ា ស៊ឹង សំអុល ស្ថិតក្នុងឃុំសុខសាន្ត ស្រុកកោះញ៉ែក ខេត្តមណ្ឌល់គិរី ទៅកាន់ស្រុកយួន តាមច្រកសំពោច កាត់ស្រុកស្នួល ដូចហែរកឋិន។
កន្លងមកនេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានស្តីបន្ទោសលោក ស្វាយ សំអៀង ខេត្តមណ្ឌលគិរី បណ្តែតបណ្តោយ អោយក្រុមឈ្មួញឧក្រិដ្ឋជនព្រៃឈើ ដូចជា ឧកញ៉ា ស៊ឹង សំអុល អតីតជាកូនឈ្នួលឧកញ៉ាខ្នា ថ្លើមធំ ដឹកឈើដោយរលូន មិនបង្ក្រាបបទល្មើសព្រៃឈើ បែរជា បទល្មើសព្រៃឈើ នៅតែបន្តកើតមាន នៅក្នុងទឹកដីខេត្តមណ្ឌលគិរី និង ខេត្តក្រចេះ ព្រមទាំងបានបញ្ជាក់ថា បើលោក ស្វាយ សំអៀង អភិបាលខេត្តមណ្ឌលគិរី នៅមិនបង្ក្រាបបទល្មើសព្រៃឈើនោះទេ ប្រាកដជាមានបញ្ហាជាក់ជាមិនខានឡើយ។
ប្រជាពលរដ្ឋ បានកោតសរសើរ ពីស្នាដៃការ បង្រ្កាបបទល្មើសព្រៃឈើ របស់លោក នាយឧត្តមសេនីយ៏ សៅ សុខា ប្រធានគណៈកម្មការជាតិទប់ស្កាត់ និងបង្ក្រាបបទល្មើសព្រៃ ដែលអាចកាត់ចរន្តសរសៃឈាមរបស់ ឧក្រិដ្ឋជនព្រៃឈើ របស់លោកឧកញ៉ាមួយចំនួន ដែលរស់ដោយសារការបំផ្លាញព្រៃឈើ ស្ទើរគ្រប់ទីកន្លែង ក្នុងនោះក៏នៅតែមានការ ទទឹមរងចាំមើលថា តើ លោកនាយឧត្តមសេនីយ៏ សៅ សុខា អាចកាត់ចង្វាក់សសៃឈាមរបស់លោក ឧកញ៉ាបញ្ជីរខ្មៅ ស៊ឹង សំអុល បានដែរឬទេ ហើយអាចបឈ្ឈប់ការដឹកជញ្ជូនឈើ ដោយខុសច្បាប់របស់ ឆ្លងដែនទៅវៀតណាម បានដែរឬទេ? ។
ដោយ ប៊ុន រដ្ឋា
