កំពង់ចាម: សម្តេចព្រះមហាសុមេធាធិបតីកិត្តិឧទ្ទេសបណ្ឌិត នន្ទ ង៉ែត សម្តេចសង្ឃនាយកនៃព្រះរាជាណាចក្រកម្ពុជា និងឯកឧត្តម ហ៊ុន ណេង សមាជិកគណៈកម្មាធិការអចិន្ត្រៃយ៍ និងជាប្រធានគណៈកម្មការទី៤នៃរដ្ឋសភាជាតិ និងលោកជំទាវ បាននិមន្តនិងអញ្ជើញជាគណៈអធិបតីក្នុងពិធីប្រកាសតែងតាំង និងស្រោចស្រពសុគន្ធវារី 
ព្រះមេគណខេត្តកំពង់ចាម និងសហការី ព្រមទាំងព្រះអនុគណស្រុកកំពង់សៀម និងសហការី ដែលពិធីនេះត្រូវបានប្រារព្ធឡើងនារសៀល ថ្ងៃទី១៣ ខែមីនា ឆ្នាំ២០១៩ នៅវត្តខែលជ័យ សិរីសោភណមុនីរតនៈ ស្ថិតក្នុងភូមិខែលជ័យ ឃុំអូរស្វាយ ស្រុកកំពង់សៀម ខេត្តកំពង់ចាម ដោយមានការអញ្ជើញចូលរួមពី ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម និងលោកជំទាវ ព្រមទាំងមន្ទីរអង្គភាពពាក់ព័ន្ធ និងព្រះសង្ឃ ពុទ្ធបរិស័ទ ប្រមាណជា១៥០០អង្គ នាក់។
បេីយោងតាមរបាយការណ៍របស់ លោកស្រី សុភ័ក្ដ្រ ប្រធានមន្ទីរធម្មកានិងសាសនា ខេត្តកំពង់ចាម បានឲ្យដឹងថា ចាប់ពីក្រោយឆ្នាំ១៩៧៩មក គណៈសង្ឈខេត្តកំពង់ចាម គឺដឹកនាំដោយ ព្រះគ្រូ ស៊ិន ស៊ឹម ដែលកាលនោះ គេហៅថា ប្រធានគណៈកម្មាធិការសង្ឈខេត្តកំពង់ចាម និងជាព្រះឧបជ្ឍយ៍ប្រចាំខេត្ត ដែលមានតែមួយអង្គគត់ ក្នុងខេត្តកាលនោះ។ ព្រះអង្គ បានដឹកនាំសមាគមន៍សង្ឈខេត្ត រហូតដល់កំឡុងឆ្នាំ១៩៨៨។ ជំនាន់ទឺ២ព្រះគ្រូ យ៉ង សុខ ត្រូវបានប្រែក្លាយជាព្រះនាគមុនីមេគណខេត្តកំពង់ចាម ព្រះអង្គបានដឹកនាំសហគមន៍សង្ឈ រហូតដល់ថ្ងៃដែលព្រះអង្គទទួលអនិច្ចកម្ម ក្នុងអំឡុងឆ្នាំ ២០០៦ ។ 
ជំនាន់ទី៣ ព្រះបីដកធម្ម ខៀវ ហម ព្រះរាជាគណៈថ្នាក់ចត្វា បានដឹកនាំបន្តរហូតដល់ថ្ងៃដែលព្រះអង្គទទួលអនិច្ចកម្ម នៅឆ្នាំ២០១៣ ។ ជំនាន់ទី៤ ព្រះឧត្ដមប្រិយ៍ជា អន ធាងអាន ដឹកនាំបន្តរហូតដល់ថ្ងៃដែលព្រះអង្គលាចាកសិក្ខាបទ នៅចុងឆ្នាំ ២០១៨ ។ ហើយត្រូវបានតំឡើងតាមឋានានុក្រម ដោយតែងតែព្រះមុនីសោភ័ណ ប៊ត តាំងឆេង ជាព្រះនាគមុនីមេគណខេត្តកំពង់ចាម ជំនាន់ទី៥ នាពេលនេះតែម្ដង ។
ជាមួយគ្នានោះ ឯកឧត្ដម ហ៊ុន ណេង អ្នកតំណាងរាស្ត្រមណ្ឌលកំពង់ចាម បានថ្លែងថា វត្តអារាមនៃព្រះពុទ្ធសាសនា បានក្លាយជាឃ្លាំងការពារមរតកវប្បធម៌ ប្រពៃណី ទំនៀមទម្លាប់ អក្សរសាស្ត្រជាតិ និងប្រវត្តិសាស្ត្ររាប់ពាន់ឆ្នាំ របស់យើងរហូតមក។ បេីយើងសិក្សាប្រវត្តិសាស្ត្រដ៏វែងឆ្ងាយរបស់កម្ពុជាយើង នោះយើងនឹងមេីលឃើញថា មានឯកសារយោងជាច្រើន ត្រូវបានរក្សាទុកនៅនឹងវត្ថុតែម្ដង។ បច្ចុប្បន្ននេះប្រទេសយើងបានរីកចម្រើនហើយ តែវត្តអារាមនៅតែដេីរតួរនាទីដើមបានយ៉ាងល្អ ដូចជាថែរក្សាបាននូវសំណង់អគារ ដែលមានរចនាបថខ្មែរសុទ្ធសាធជាដេីម។ ព្រះពុទ្ធសាសនា ក៏ជាកត្តាមួយ ដែលបានចូលរួមធ្វើឲ្យខ្មែរគ្រប់ភាគីដែលធ្លាប់បែកបាក់សាមគ្គីគ្នា ធ្លាប់មានសង្រ្គាមផ្ទៃក្នុងជាមួយគ្នា ឲ្យព្រមទទួលយកលទ្ធផលនៃការចរាចរ បញ្ចប់សង្គ្រាមដ៏រាំរ៉ៃដែលបានអូសបន្លាយនៅលើទឹកដីដ៏កំសត់របស់យើង អស់រយៈពេលជាង២ទសវត្ស ប្រែក្លាយពីកម្ពុជាមួយដែលមានតំបន់ត្រួតត្រាច្រើន មកមានតំបន់ត្រួតត្រាតែមួយ ផងដែរ ៕
