ខេត្តកំពង់ឆ្នាំង៖ នារសៀលថ្ងៃចន្ទ ១២រោច ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០១ ខែ មេសា ឆ្នាំ២០១៩ នេះវេលាម៉ោង ១៥:០០ លោកឧត្តមសេនីយ៍ទោ ខូវ លី ស្នងការនគរបាលខេត្តកំពង់ឆ្នាំង បានអញ្ជើញជាអធិបតីក្នុងពិធីសំណេះសំណាល សាកសួរសុខទុក្ខ និងដាក់ទិសដៅអនុវត្តការងារ ព្រមទាំងត្រួតពិនិត្យកន្លែងធ្វេីការរបស់មន្ត្រីនគរបាល នៃអធិការដ្ឋាននគរបាលក្រុងកំពង់ឆ្នាំង។
ដោយមានការចូលរួមពីលោក លោកស្រីស្នងការរង នាយ-នាយរងការិយាល័យបុគ្គលិក អធិការ-អធិការរង នាយ-នាយរងប៉ុស្តិ៍ និងមន្ត្រីនគរបាលទាំងអស់សរុបចំនួន
៥៦នាក់ ស្រី៤នាក់។ ក្នុងពិធីនោះដែរ លោកឧត្តមសេនីយ៍ទោ បានណែនាំអោយមន្ត្រីនគរបាលទាំងអស់ខិតខំពង្រីកនូវជំនាញផ្សេងៗ និងយកចិត្តទុកដាក់ក្នុងការងាររក្សាសន្តិសុខ សណ្តាប់ធ្នាប់ និងគោលនយោបាយភូមិ-ឃុំមានសុវត្ថិភាពជូនប្រជាពលរដ្ឋ។
បន្ទាប់មកលោកឧត្តមសេនីយ៍ទោស្នងការ ក៏បានឧបត្ថម្ភនូវថវិការ សម្ភារៈការិយាល័យ និងសម្ភារៈនគរបាលដល់អធិការដ្ឋាន និងបណ្តាប៉ុស្តិ៍នគរបាលរដ្ឋបាលទាំង៤ ដោយអធិការដ្ឋាននគរបាលក្រុងកំពង់ឆ្នាំងទទួលបានថវិការ ៥០០,០០០៛ និងប៉ុស្តិ៍នគរបាលរដ្ឋបាលនីមួយៗទទួលបាន ១០០,០០០៛ ផងដែរ៕គឹមសៀន
