ខេត្តកែប៖ នៅព្រឹកថ្ងៃទី០៥ ខែមេសា ឆ្នាំ២០១៩ គណៈប្រតិភូខេត្តគៀងយ៉ាង ដឹកនាំដោយលោកជំទាវ ដាំង ង្វៀតអែម អនុលេខាធិការគណកម្មាធិការបក្សខេត្ត និងជាប្រធានក្រុមប្រិក្សាប្រជាជនខេត្តគៀងយ៉ាង អញ្ជើញមកសំណេះសំណាលសួរសុខទុក្ខ និងជូនពរថ្នាក់ដឹកនាំ មន្រ្តីរាជការទូទាំងខេត្តកែប ក្នុងឱកាសបុណ្បចូលឆ្នាំថ្មី ប្រពៃណីជាតិខ្មែរដែលឈានមកដល់នាពេលខាងមុខនេះ នៅសាលប្រជុំសាលាខេត្តកែប។
ក្នុងជំនួបស្វាគមន៍នេះ ឯកឧត្តម កែន សត្ថាអភិបាល នៃគណអភិបាលខេត្ត បានមានប្រសាសន៍ថា ការអញ្ជើញមកជូនពរនាពេលនេះពិតជាមានសារៈសំខាន់ ក្នុងន័យដើម្បីរិតចំណងសាមគ្គីភាពឲ្យកាន់តែស្អិតល្មួត រវាងខេត្តកែប និងខេត្តគៀងយ៉ាង ក្នុងនាមជាបងប្អូន និងជាអ្នកជិតខាងល្អនិងគ្នា ។ ទន្ទឹមនេះដែរ កិច្ចសហប្រតិបត្តិការការពារសន្តិសុខតាមបន្ទាត់ព្រំដែនរវាងខេត្តទាំងពីរជាសាច់ញាតិ បងប្អូន បានសួរសុខទុក្ខគ្នា និងប្រកបរបររកស៊ី មានភាពសុខសាន្ត និងរីកចម្រើនជាលំដាប់។
ការទទួលជួបគណៈប្រតិភូខេត្តគៀងយ៉ាង នាព្រឹកនេះ ក៏មានវត្តមានអញ្ជើញចូលរួមដោយ ឯកឧត្តម លោកជំទាវ ជាអភិបាលរងខេត្ត លោកនាយក នាយករងរដ្ឋបាលសាលាខេត្ត កងកម្លាំងទាំង៣ប្រភេទ នាយកទីចាត់ការ អង្គភាពចំណុះសាលាខេត្ត និងមន្ទីរអង្គភាពពាក់ព័ន្ធនានាផងដែរ៕
